Nuĭh Rđe kơt nău way tĭng ur, jêng bu ur geh nău ƀư dŭt khlay tâm rnăk, tâm nê nău dơi nđăp sai lah ngoăy tâm ăp nău dơi khlay. Nău way tâm nđăp bah nuĭh Rđe rlău 4 njuat: Nău way ôp wăng sai (Nao hul), Nău way tâm ban ŭch (Knăm), Nău way wơt sĭt sai (Tuhan) n’hanh Nău way sĭt gŭ jay sai lôch nđăp (Siê Knăm).

Rnôk ŭch bu klô he kơnh sĭt ƀư sai, bu druh Rđe ân đă nuĭh ndranh hăn ôp wăng. Nê way lah oh bu klô I me mô lah bu kuâng ranh tâm rnoi deh rnăk bu ur, geh nsing nơm, ngăch dăng, gĭt wât nău way, mbơh ngơi hăr blău...

Che Ama H’loan ta buôn Akô Dhông, phường Buôn Ma Thuột, n’gor Dak Lak an gĭt: Ơm bah ri aơ, nuĭh Rđe mĭn lah rnôk deh kon, n’hâm suan pêt mât, ntreo jâk, deh ji lah n’hâm suan bah me. Oh kon deh luh ân tĭng rnoi me, bu ur ân hăn ôp wăng sai. Yor kơt nê̆, rnôk tât năm gŭ sai, ăp bu ur Rđe mbra lah nuĭh lor nchrăp lor drăp ndơ nđăp nsao ri mơ dơi ƀư nsĭt sai ta jay. N’hanh nău way nsĭt sai lah nău uĕh văn hóa way ơm mpơl nău way tĭng ur tâm nău way gŭ ur sai bah nuĭh Rđe.

Rnôk dja, rnăk bu ur nchrăp du yăng ndrănh n’hanh du mblâm kông koh gay bu ndranh hăn tât jay bu klô ôp wăng sai. Lôch nê, ntơh măt bar ding rnăk wâl mâp măt, nkoch bri, bu klô dơn nău ôp wăng sai rnăk bu ur mbra dơn kông koh ƀư ndơ tâm nkol kuăt ndrôi.

Lôch nê, rnăk bu ur mbra leo său druh bah he hăn tât jay bu klô tâm ban ŭch mpeh nău way njuăl ƀăn gŭ jay sai. Tâm rnôk dja, rnăk bu klô ntul nuih n’hâm jăp gơih, đăp dêh bah bu ur tâm mông nar jŏ dah găp. Nău dja mbra uănh tĭng nău tâm ban ŭch, dơn ngoăy bah bar ding.

Ta nău way njuăl ƀăn gŭ sĭt mpeh jay sai geh nău way đă joi ăp ndơ ôp răch, mpeh rnăk bu ur ân joi geh ăp tŏng. Nău dja gay mpơl nuih n’hâm nkah gĭt nsĭt n’glĭng n’hâm suan pêt mât bah me bơ̆ bu klô đah sai he let năp tay bah bu bu ur Rđe.

Lôch jŏ nar njuăl ƀăn, lah rnăk bu klô ŭch bu bu ur druh ri mbra ŭch an rnăk bu ur ƀư nău way wơt nsĭt klay. Lah bu klô rgâl nău, mô ŭch sŏk bu druh nê ri mpeh rnăk bu klô mbra jă rnăk bu ur nkoch bri tât nkô̆ nău mô ŭch.

Tĭng Nghệ sĩ ưu tú Vũ Lân, nuĭh gŭ mĭn văn hóa way ơm Tây Nguyên, tâm nar nsĭt sai, rnăk bu klô mbra nchrăp yăng ndrănh n’hanh du mblâm sŭr gay njŭn kon ndăm sĭt jay ur. Mpeh rnăk bu ur, gay wơt klay sĭt ri khân păng ân ndjôt ăp ndơ nđăp ma rnăk bu klô hŏ đă. Tâm nê, dŭt khlay lah kông koh dơi uănh kơt nău ton du nuih n’hâm bah bu klô đah bu ur. Ƀăn, klay nsoh ndơ way ơm gay mpơl nău ntơr uĕh huêng khlay tâm nar khlay bah nău rêh.

Ta trong sĭt jay bu ur, mpôl wơt klay way geh ăp mpôl druh ndăm khur, nking tay. N’hanh I klay ân nkăp an khân păng kông koh. Tĭng nău way, ta trong wơt klay sĭt mâp âk ntul rlong, nking kol ri nău rêh ur sai mơ êt lhăt, rhơn mƀak, wăng sa geh ndrŏng, deh kon geh său rơ̆ jêng âk.

Nău way nsĭt klay sĭt jay, bu ranh mbra ntơh măt an bar ding mbơh kônh yơ, me, bơ̆, yuh nô mpeh rnăk sai, rnăk ur n’hanh băl mpôl bar ding. Bah năp nău uănh saơ bah ăp nuĭh, băl mom mbra tâm nkăp kông koh n’hanh ntơm bah aơ jêng ngăn ur sai. Nău dja nkah ur sai ân rêh nsum ur ngoăy sai ngoăy tât khĭt săk păk mbra. Lah nuĭh I mplơ̆ tay kông koh, rgâl nuih n’hâm mô lah ƀư nău tih leh mbra trok tâm tay lĕ rngôch ndơ nđăp nsao.

Lôch rnôk ăp nău way nđăp nsao ƀư lôch jêh, chĭng gong n’gôr gră, klay ƀăn tâm ndơ̆ tong ndrănh, tâm nsiăm du mpăt piăng, du nsiăt klơm sŭr gay ndrel tâm pă nău sât kah nsum. Rnăk wâl, băl mpôl, tâm ndơ̆ nklâm ndơ nđăp an ƀăn n’hanh klay.

Tĭng wa H’Yam Bkrông ta buôn Tơng Jú, phường Ea Kao, n’gor Dak Lak, nuĭh Rđe mĭn, lah bar hê ur druh sai ndăm rngeh tât 4-5 mông ôi ri ur sai bah khân păng mbra ntoch jong tât dŭt nău rêh.