Ăp nar kêng dŭt pơh mhe aơ, nkual n’glău Ea Kao, phường Ea Kao, n’gor Dak Lak jêng ntŭk tât khuh n’gôr đah hang rbăn nuĭh ƀon lan n’hanh năch. Ăp nău kan kơt ntưm trại, wah SUP, ntô̆ klêng mô lah dù mpăr dôl njêng du ntŭk rlong uănh pâl mhe, joi gĭt n’hanh dêh bên đah bri dak. Ntơm bah du n’glău rngân rjŭp, n’glău Ea Kao dôl mbrơi jêng ntŭk tât kêng dŭt pơh bah nuĭh ƀon lan n’hanh năch pâl nđaih. Wa Lê Trương Quân, ta buôn Cư Mlim, xã Ea Kao dŭt n’hao êng săk rnôk ntŭk he dôl geh wăch rgum pâl nđaih uĕh mƀak:

“Bar pe nar aơ gâp saơ năch hăn pâl n’glău Ea Kao dŭt mpưm, lơn lah tâm kêng măng. Ta aơ geh ăp nău kan ntưm trại, wah duk, njroh mprơ, năch tât dŭt rhơn mƀak, âk mpưm. Gâp hŏ tăng lư tât ntŭk nchrăp ƀư sân golf ta Ea Kao yơn tât aƀaơ nha hôm hŏ ntơm rdâk ƀư ơm. Mpŏng rdâk ƀư ngăn ngăn an Ea Kao dơi săk ntơr, năch tât nar lơn ma âk mpưm lơn, nuĭh ƀon lan geh tay ndơ ma tăch rgâl”.

Nchrăp ƀư sân golf Ea Kao hŏ dăp rgum bah âk năm yơn tât aƀaơ mô hŏ dơi an ƀư ơm. Lah dơi ntuh kơl ăp kôp ndrel ntŭk rlu rlău, tăch rgâl n’hanh rhŏ dŏng rlong saơ wăr n’glău, nkual dja mbra mât dŏng uĕh lơn bri dak rup uĕh măt uănh, nkre nta joi tay nău kan n’hanh n’hao rnoh khlay pâl nđaih an ta ntŭk.

Dak Lak săk geh pâl nđaih têh yơn tât aƀaơ mô hŏ geh sân golf di rnoh lăp kan. Tâm rnôk nê, pâl nđaih golf dôl hao ngăch, wăch rgum năch geh rnoh dŏng âk n’hanh mông nar manh gŭ rlu jŏ jong. Yor kơt nê̆, dăp rgum mhe ntrŏng hun hao 6 ntŭk nchrăp ƀư sân golf đah lĕ rngôch tơm prăk rlău 11.000 rmen prăk ta Ea Kao, Buôn Đôn, Bình Kiến, Tuy An Nam... gay jêng rêng ndơ geh ƀư pâl nđaih golf nkre đah rlu rlău, văn hóa n’hanh bri dak. Tĭng wa Trần Tiến Lợi, Kruanh Hiệp hội Bất động sản n’gor Dak Lak, aơ lah ntil ndơ pâl geh nău dơi đăt ndal an pâl nđaih ta ntŭk.

“He mô dơi uănh êng golf lah du ntil môn thể thao dơm ma ân lah n’gâng kan wăng sa rhŏ dŏng khlay. Njêng tâm rgop, tâm nkrêp kan nsum, rdâk njêng rêng tâm nkrêp kan lhăt, sân golf, trong trôk, manh gŭ nde n’hanh ntŭk tât, gay jêng du ntil ndơ pâl nđaih ăp tŏng. Ăp trong nchrăp dăp rgum sân golf ăp tŏng rêng hŏ ƀư ăp nkual neh kro ntang jêng ăp me neh khlay, nta geh an hang rmưn rbăn nău kan.”

Mô dơn sân golf, dăp rgum rgâl di tay lôch n’glăp nsum hôm pơk hvi ntŭk an hun hao pâl nđaih mhe lor bôk năp ta Dak Lak wăch rgum nkre săk geh bri neh têh hvi n’hanh dak lêng đŏng. Tâm săk nchih 257 trong nchrăp an wăch rgum lor ntuh kơl bôk năp, geh 32 trong nchrăp mpeh trong kan pâl nđaih rlu rlău, sân golf n’hanh thể thao đah lĕ rngôch tơm prăk ntuh kơl bơi 127 rbăn rmen prăk đŏng. Nkual mpeh luh nar dơi rƀŏng trong hun hao pâl nđaih rlu rlău dak lêng, sân golf n’hanh đô thị rhŏ dŏng; mpeh nhâp nar mât dŏng dơh geh bri, tuch tăm mât rong n’hanh văn hóa bah bơi 50 rnoi nuĭh gay jêng ăp ndơ geh ƀư pâl nđaih ntĭt êng.

Tĭng wa Lê Phúc Long, Groi Giám đốc Sở Văn hóa, Thể thao n’hanh pâl nđaih n’gor Dak Lak, dăp rgum rơh dja mô dơn pơk hvi ntŭk hun hao ma hôm njêng ntŭk nsing tâm di khlay gay wăch rgum ăp nuĭh ntuh kơl têh jong.

“Aơ lah ntŭk nsing tâm di dŭt khlay gay wăch rgum, kuăl jă ăp nuĭh ntuh kơl têh dôl dŭt uănh khlay tât ăp nkual rgum pâl nđaih, rlu rlău bri dak. Nău ŭch bah pâl nđaih Dak Lak tâm let năp tay lah ntuh kơl hun hao ăp ndơ geh ƀư pâl nđaih nđĭr uĕh, jŏ jong n’hanh kloh uĕh đah ntŭk gŭ rêh”

Gay ăp trong rƀŏng tâm dăp rgum ơm jêng ngăn ngăn, Dak Lak ntrŏng ndrel đah lôch jêh ăp tŏng ntŭk ntô ndơ dŏng mbra rgum rdâk njêng ntŭk ntuh kơl kloh rvah, lor nchrăp njêng tơm neh soih aih, droh rklaih ăp wăk kol mpeh đă ntrơn du n’hanh ndrel hăn doanh nghiệp tâm rnôk an ƀư ntŭk nchrăp kan. Wa Đỗ Hữu Huy, Kruanh UBND n’gor Dak Lak lah rjăp:

“N’gor Dak Lak ton ndrel hăn doanh nghiệp tâm lĕ rngôch du bông ƀư ntŭk nchrăp kan, ton lor nchrăp tơm neh soih aih, ntrôl ngăch trok tâm, ntop kơl, đă ntrơn du ntŭk gŭ mhe. Đah ăp ntŭk nchrăp kan rgum tơm, trong nchrăp njêng suan ntrôl, ăp trong nchrăp geh ring tam têh tât wăng sa rêh jêng kon nuĭh bah n’gor, kruanh rđău kan n’gor mbra rđău đă na nê̆ droh rklaih jêr jŏt, wăk kol, đăp mpăn đă ntrơn du dơi ƀư ăp kôp, di nău way”.

Ntơm bah suan rêh mhe dôl jêng bah meng n’glău Ea Kao tât trong uănh hun hao jŏ jong njok bah bri neh têh hvi tât dak lêng, Dak Lak dôl geh trong ƀư jêng ngăn du ntŭk hun hao pơk hvi.