Râng jrô nti geh 30 druh ndăm n’hanh bu hăr blău nuĭh Rđe ta xã Ea Phê. Tâm 25 tơ̆ nti, ăp nuĭh nti dơi Nghệ sĩ ưu tú Y Phôn Ksơr n’hanh Nghệ sĩ ưu tú Vũ Lân trêng nti tay na nê̆ nău blău tŭr goh chĭng gong, ndăch rvăch n’hanh kơt tŭr ngăn ăp nău chĭng way ơm bah nuĭh Rđe. Ndrel đah nti dơm ma mbung, nuĭh nti mbra dơi kơt dŏng ngăn, nkre nchih nkah, rhôp video, keh mbrô rhŏ dŏng pah kan mât ndray drăp ndơ ơm yău ntlơi an tay. Oh Y Li San Kbuôr, ta buôn Puăn, xã Ea Phê rhơn nđơr:

“Ƀon hên geh rmôt chĭng gong, gâp dŭt ŭch. Gâp ŭch nti tŭr goh chĭng gong gay râng rmôt chĭng. Nar aơ dơi kơt nti gâp saơ dŭt rhơn ngăn”.

Bah năp nê, nar 7/7, n’gâng kan văn hóa ntơm pơk jrô trêng nti goh gâr bar, chĭng 3, gong 5 bah nuĭh Ba Na ta thôn Xí Thoại, xã Xuân Lãnh; nar 8/7 ntơm pơk jrô trêng nti goh gâr 2, chĭng 3, gong 5 nkre đah ndăch rvăch bah Chăm Hroi ta Nhih nti Phổ thông Dân tộc bán trú Đinh Núp, xã Phú Mỡ. Ndrel đah jrô nti ta Ea Phê, rơh dja Dak Lak pơk 3 jrô trêng nti văn hóa rnoi mpôl đê̆, ăp jrô nti 30 nuĭh nti n’hanh nchrăp ƀư lôch jêh bah năp nar 30/8.

Tĭng wa Nguyễn Thụy Phương Hiếu, Groi Giám đốc Sở Văn hóa, Thể thao n’hanh Pâl nđaih n’gor Dak Lak, lôch 3 jrô trêng nti lor bôk năp, n’gâng kan văn hóa mbra pơk tay âk jrô nti bah tơm ndơ bôk nău kan gưl neh dak n’hanh an ƀư ăp trong kơl mhe mpeh mât ndray văn hoá chĭng gong.

“Ăp jrô nti dja ƀư tĭng bôk nău kan 1719 rgâl tơm ndơ bah năm 2025 tât, hôm ƀa ƀă bôk nău kan bah năm 2026 ri mbra geh âk jrô kơi năp nti đŏng, rgum an ƀư tĭng nkô̆ bôk nău kan mbrô 14 bah n’gor tâm ban kơt Nghị quyết mbrô 03. Ŭch rŏng lah ăp xã, phường njêng ăp rmôt chĭng gong tĭng quy định mhe bah Nghị định 215 bah Chính phủ, rnôk lăp kan ri geh trong ntop kơl dŭt uĕh”.