Gay ma ngăch geh mbơh kan tâm rơh Festival dak lêng, ntŭk kan văn hoá, thể thao n’hanh pâl nđaih n’gor Khánh Hoà tâm rgop đah Báo n’hanh Phát thanh, truyền hình Khánh Hoà ndrel đah ăp nuĭh way kan, lĕ pah kan đah nău kan dŭt ngăch gay ma ƀư rnoh mbrô 20 nău ntơ ntŭk ueh, ntŭk pâl nđaih ntoh lư kơt Tháp Bà Pô Nagar, Tháp Trầm Hương, Hòn Chồng, Viện Hải dương học, Nhà hát Đó, ndrĭch dak lêng Nha Trang..rnoh mbrô geh uaưnh năl 3D, nchih quay rup ma flycam, sŏk rup 360 độ n’hanh geh ƀư dâl ta ntŭk gay ma mât đăp mpăn tâm di ê lor geh ndơ̆ ta ăp ntuk mạng xã hội.

Wa Nguyễn Xuân Duy, Groi giám đốc Báo n’hanh Phát thanh, truyền hình Khánh Hoà an gĭt, nău tâm rgop  đah báo chí n’hanh công nghệ mbra geh njêng nău mbơh tơih pah kan ueh mhe, kơl an bu năch geh giưt đah nău mhe n’hanh geh gĭt ntŭk tât bâh ta năp rơh hăn: “Nău dơi mpeh báo chí âk ntŭk mbơh nău rĭ mpôl hên mô dơn geh ƀư nău kan mbơh tơih rgŏ jă ma hôm nha hăn ndrel tâm rnôk ƀư trong kan nglăp rnoh mbrô tât ăp ntŭk đah trong kan tâm rgop ƀư rup công nghệ n’hanh rnoh mbrô. Tâm ăp nău nkoch, mpôl hên geh kơl an bu năch geh gĭt ueh đah nău mhe, uănh năl n’hanh geh gĭt ăp ntuưk tât mhe. Công nghệ rnoh mbrô lah lah ntil ndơ dŏng, ma hôm nha lah báo chí nuiưh nkoch nău rnôk 2 nău aơ tâm rgop ueh, ăp ntŭk tât mô dơn geh mbơh tơih ma hôm nha geh mbơh trêng nău rŏng, njêng nău trĕ lam têh dăng ngăn”.

Nău kan rnoh mbrô mpeh pâl nđaih Khánh Hoà mô dơn lah rup mbơh ăp ntŭk tât ma hôm nha lah rgum ăp rơh leo pâl rlưn 3D, bản đò rnoh mbrô, ntuk kan, rgum mbơh rgâl rnoh prăk, mbơh ăp tuor pah kan trực tuyến, mbơh ntŭk ngih năch gŭ, ntŭk ngêt sông, ndeh klư hăn nsong, ăp nău kan Festival dak lêng ndrel đah âk nău ueh kơt lah ntŭk nsrŭng ndeh, vơt kơl, dak si, ntŭk rêh jêng…bâh nĕ bu năch mbra dơi geh leo kan joi nău mbơh mhe, rdâk njêng nău kan n’hanh tâm rgop sŏng dăng đah ăp ntŭk pâl nđaih ta điện thoại njôt ti. Aơ dơi uănh lah njoat hăn rgâl bâh mbơh tơih nău mhe jêng rdâk njêng ntŭk pâl nđaih ueh mhe, sŏk nău gĭt tă hăn pâl nđaih bâh bu năch ƀư tơm. Yuh Bùi Thị Ngọc Trâm, xã Khánh Vĩnh, n’gor Khánh Hoà knơm.: “Ntơm nơh rĭ oh geh uănh ta ăp rnoh mbrô mpeh nău ueh êng rnoi Chăm n’hanh ngăn ngên lah dŭt ueh yor rup ueh, nău mbơh ueh mhe sŏng dăng n’hanh dơh uănh năl. Nău kan mhe aơ kơt nĕ đŏng, kanŭng an geh du trong link lah dơi geh gĭt lĕ rngôch Khánh Hoà jê̆ jêng lah dơh ngăn mbơh tơih an băl mpôl ta ntŭk ngai"”

Tĭng nău mbơh bâh wa Hoàng Thị Bích Hạng, Ntŭk kan kơl an nău rgâl mhe rnoh mbrô, Cục Báo chí bâh n'gâng kan văn hoá, thể thao n’hanh pâl nđaih, ăp nuĭh way kan lĕ geh rgum uănh năl, an doưng rnoh mbrô gay ma mât đăp mpăn nău kan rnoh mbrô mpeh pâl nđaih Khánh Hoà leo kan ting di nău leo kan. “Aƀaơ geh rlău 20 ntŭk ntoh lư ma Khánh Hoà lĕ geh săch gay ma ndơ̆ lăp ta nău kan mbơh rnoh mbrô pâl nđaih. Lĕ rngôch rgum âk an nău mbơh rblang, uănh năl ăp rnoh mbrô, uănh nđôi, an dŏng ăp nkô̆ nău gay ma ndơ̆ mbơh ta rnoh mbrô leo pâl nđaih mbrô"”

Ntơm geh mbơh di ta rơh Festival dak lêng Khánh Hoà 2026, nău kan pâl nđaih rnoh mbrô-Ntil ndơ pâl nđaih rnoh mbrô Khánh Hoà mô dơn kơl an bu năch tân rơh lễ hội ma hôm nha geh nău kan khlăy njêng ntŭk rnoh mbrô dŏng nsum an n’gâng kan pâl nđaih, ntop rdâk njêng Khánh Hoà jêng ntŭk tât ueh mhe, n’hanh geh âk nău dơi tâm rlong.