Nău nchrăp ƀư dăp ntŭk tuch tăm, ntŭk gŭ rgum an nkual trôk nar lơh ta xă Ia Hiao (n’gor Gia Lai) dơi rdâk ƀư ta thôn Điểm 9, ta rnoh neh rlău 15 ha, dĭng lĕ prăk ntuh kơl rlău 120 rmen prăk. Nău nchrăp ƀư pă neh gŭ an rlău 180 rnăk. Aƀaơ hin, ăp ntŭk kan rdâk ƀư dôl ndăn jêh trong hăn tâm nkual, điện hạ thế, ăp ndơ ƀư trong hăn ndơ dŏng kơt dak dŏng, ngih văn hóa nsum mpôl, ngih samƀŭt mầm non.

Wa Ksor Tin lah ngoăy tâm ăp nuĭh bôk năp ta ƀon Chư Plah Jai, xă Ia Hiao, tât wơt dơn lôk neh mhe gay ƀư jay gŭ an gĭt: “Mpôl hên tât uănh neh ntu ntŭk aơ dŭt uĕh. Ta aơ êp ngih samƀŭt, geh tach pâl play tŏng ăp. Neh gŭ ta ka lơ, ta yôk dŭt uĕh, gŭ đăp mpăn lơn an oh kon n’hanh kônh wa; mô an du dak lip kơt ăp năm bah năp; ntŭk aơ dŭt uĕh nkôp đah bah năp đaơ. Dơi Ngih dak ntop kơl, n’gâng kan n’gor ƀư neh lâng ntŭk gŭ mhe an kônh wa, gâp mô gĭt m’hâm ngơi tay, lah uĕh dŭt âk”.

Gay kônh wa tâm ban ŭch ntŭk gŭ rêh ơm bên bôl ƀa ƀơ rdâng đah trôk nar gay trơn tât ntŭk gŭ mhe, n’gâng kan ƀon lan ta ntŭk lĕ ƀư âk rơh tâm mâp, djăt nău nkoch n’hanh ơh tŏng ăp nău ôp bah nuĭh ƀon lan. Kônh wa dơi uănh rup n’hêl na nê̆ ăp nkual ƀa ƀơ dak bŭk, uănh nđôi ngăch ndâk ƀư nkual ntŭk gŭ mhe, mĭn joi nău ntop kơl. Ăp rnăk dơi săch rup jay, săch ntŭk lôk neh n’hanh na nê̆ tât hăn uănh nkual ntŭk gŭ mhe. Rnăk wa Nay Chúc ta bôn Sô Ma Lơng, ngoăy tâm 67 rnăk bôk năp tât ntŭk gŭ mhe, răm rhơn yor lĕ sơi săch ntŭk “ueh lơn lĕ nău mpŏng kâp”.“Rnăk wâl gâp rnôk bah năp rêh êp dak me, dŭt rvê geh pĭch rlâm. Gâp lap săch geh mrô 63, ntŭk êp ngih samƀŭt mẫu giáo, di rnôk kon gâp năm aơ lăp jrô mầm, jrô lá”.

Lor rnôk ntơm ƀư kơl ƀon lan trơn tât ntŭk gŭ mhe, xă ƀư hăn kan “Nkra ngih wâl mhe-ntŭk ntô ueh nđĭr” ta Nkual ntŭk gŭ mhe. Ta aơ, kruanh xă, ăp rmôt kan nsum mpôl ndrel ƀon lan tăm 250 tơm bàng Đài Loan njok trong ƀon lan gŭ. Ƀư hăn kan ƀư dŭt n’hâm bah lĕ trong chính trị n’hanh nău tâm ban nuih n’hâm bah nuĭh ƀon lan tâm nău njêng ntŭk ntô gŭ rêh mhe đăp mpăn nâp nâl. Wa R’Ô Thí-Groi kruanh jrô kan Wăng sa xă Ia Hiao an gĭt, nău nchrăp ƀư dôl jêh ăp ndơ gay dơi wơt lĕ rngôch nklăp 180 rnăk sĭt gŭ tâm đêt khay tât. “Năm bah năp, xă Ia Hiao lĕ ƀư uĕh trong kan nkoch trêng, rgŏ jă ăp rnăk geh khuch yor trôk nar lơh, nkual geh dak băm tât nkual ntŭk gŭ mhe, tât aƀaơ lĕ dơi geh 100 rnăk. Nău nchrăp ƀư tâm khay 8, khay 9 rgŏ jă lĕ rngôch ăp rnăk ƀon l;an hôm ƀa ƀă lăp nkual ntŭk gŭ mhe, gay đăp mpăn nău rêh n’hanh drăp ndơ an kônh wa”.

Ndrel đah nău ntop kơl bah Ngih dak, năm bah năp, ăp ntŭk kan tahen gŭ ta ntŭk lĕ hăn uănh, ƀư tĭng trong kơl nuĭh ƀon lan trơn jay n’hanh drăp ndơ tât nkual gŭ mhe ta Ia Hiao. Rlău 50 cán bộ, tahen Đại đội bộ binh 1, Ban Ntĭm rđău Njrăng rdâng nkual 3-Thống Nhất (N’gâng kan ntĭm rđău Tahen n’gor Gia Lai) lĕ tât Ia Hiao gay ntop kơl kônh wa rơih jay gŭ, trơn drăp ndơ n’hanh rdâk ƀư tay jay ta nkual ntŭk gŭ mhe.

Du nkual ƀon lan gŭ mhe dôl tĭng nar ntoh ta nkual neh Điểm 9. Bah ăp ntŭk ƀa ƀơ geh dak lip ntêt nkri, nuĭh ƀon lan Ia Hiao rhơn tât ntŭk gŭ rgum, geh tŏng ăp ngih wâl, ntung trong, n’hanh rlău lĕ rngôch lah geh nău rêh ueh lăng, đăp mpăn nâp nâl.