Ăp ntu ơm kuĭh ta meng jâng yôk rnăk wa A Đúy, ta thôn Ngọc Leng, dơi bôr bêng ma ăp dŭng cà phê ntil. Nuĭh nchuăn tơm, nuĭh n’gân ta ntu, nuĭh bun neh lôch nê tŏ dak. Tâm bar pe mông, neh mir ntơm nơh tăm bum blang hŏ nsoh bah lơ săk ư̆r mhe.

Bơi 9 sào neh bah rnăk âk năm dơn tăm bum blang dơm, nsĭt geh rgoh n’gơ. Ŭch rgâl jêng tăm tơm cà phê yơn prăk rvăt ntil n’hanh manh nuĭh kan lah rnoh prăk dŭt têh. Wa A Đuý lah, rơh dja, tơm ntil dơi phăt dơm, nău tăm geh cán bộ n’hanh mpôl ta ntŭk ntop kơl tât ntŭk, kơl rnăk wâl geh tay nău nđơr gay ntơm du trong rƀŏng wăng sa mhe đŏng:

“Nău dơi ntop kơl cà phê kơl rnăk bah ir mbăk anh jâk prăk ntuh kơl bôk năp n’hanh geh ndơ ma pơk hvi neh tăch. Rnăk gâp mpŏng lah tơm cà phê mbra hao jêng uĕh, nsĭt tay tơm geh wăng sa đăp mpăn”.

Mô dơn êng rnăk wa A Đúy, bar pe jât rnăk mpeh nuĭh âk năm deh, nuĭh quet nte, rnăk ndrô ranh ta Tu Mơ Rông dơi an ntop kơl lor tâm rơh an ƀư bôk năp đŏng. Bah kơi rlău 1 rkeh tơm ntil lah du trong ƀư dŭt mha êng.  

Rgâl bah hôm dŏng prăk rvăt kao si mbah rhơn tâm ăp nar têh khlay, xã rgŏ jă trong ntĭt leo "Đại hội mô kao", rgŏ jă tơm ndơ lam mpôl rgop gay rvăt găr ntil, leo ƀư yơng n’hanh mât chăm kon ntil, lôch nê phăt dơm an nuĭh ƀon lan. Ăp nchăp kao si mbah rhơn hŏ dơi rgâl ma ăp tơm cà phê ntil, nsĭt tât nău mpŏng mpeh du trong joi geh nău rêh jŏ jong an nkual yôk prêh.

Tâm khay 7 dja, xã Tu Mơ Rông nsrôih ƀư lôch jêh phăt n’hanh ntop kơl nuĭh ƀon lan tăm rlău 1 rkeh tơm cà phê ta rnoh neh hvi nklăp 200 héc ta. Nău ŭch mô dơn gay n’hao rnoh hvi neh tăm ma hôm tĭng kơn jêng nkual tăm rgum, njêng jâng nsing gay hun hao cà phê tĭng rêng rnoh khlay.

Wa Võ Trung Mạnh, Bí thư Đảng ủy xã Tu Mơ Rông an gĭt, rlău 1 rkeh tơm cà phê dơi tăm tâm khay mih dja mơ lah jâng ntơm. Lvang năm 2026-2030, n’gor n’gluh rnoh tât ntop kơl nuĭh ƀon lan tăm mhe 1.000 héc ta cà phê; Nsrôih tât lĕ năm 2030, lĕ rngôch rnoh hvi neh tăm cà phê lam xã nchrăp geh tât 1.588 héc ta, rƀŏng tât ăp rnăk geh dŭt đêt 1 héc ta cà phê gay hun hao wăng sa rnăk wâl. Gay ƀư jêng ngăn rnoh tât kan dja, xã Tu Mơ Rông mât tay bôk nău kan kơl dơm, ntuh kơl dak bât, ntĭm nti kỹ thuật mât chăm, tâm nkrêp kan nsum doanh nghiệp ton rvăt n’hanh wăch rgum ntuh kơl nkret njêng jru. Ngai lơn lah rdâk njêng nkual tăm di rnoh uĕh VietGAP, tĭng kơn jêng săk ntơ lư cà phê kah khlay Tu Mơ Rông.

Wa Võ Trung Mạnh an gĭt tay: Lah dơi mât chăm uĕh n’hanh geh trong tăch luh đăp mpăn, rlău 1 rkeh tơm cà phê mbra mô dơn nkrum nđĭr ăp jâng yôk ma hôm pơk luh trong gay rgâl trong rêh an hang rbăn rnăk ƀon lan Xơ Đăng, tĭng kơn ndơ̆ cà phê jêng tơm tăm khlay bah nkual neh dja: 

“Đảng ủy xã Tu Mơ Rông hŏ rdâk njêng Đề án rdâk njêng cà phê kah khlay Tu Mơ Rông. Nsing ta nê, mpôl hên mbra ntĭm nti nuĭh ƀon lan ƀư tăm, mât chăm, đăp mpăn di rnoh VietGAP, rdâk njêng mã mbrô nkual tăm, nkre tâm ôp đah ăp doanh nghiệp, hợp tác xã gay tâm rgop kan nsum đah nuĭh ƀon lan, njêng luh ndơ kah khlay bah xã Tu Mơ Rông, đăp mpăn săk ntơ lư cà phê Tu Mơ Rông mbra luh tât ntŭk tăch rgâl du trong dŭt nâp dăng ngăn”.