Ta xă Tây Khánh Sơn, ntŭk nkual yôk geh âk rnoi mpôl đêt, aƀaơ geh 135 nai, mô tŏng 30 nuĭh. Du đêt môn nti kơt Ngoại ngữ, Âm nhạc, Tin học... mô geh nai dâk jrro nti, an đă nai bah ntŭk êng ntop kơl. Wa Phạm Ngọc Hải, Bí thư Đảng ủy xă Tây Khánh Sơn an gĭt, xă lĕ ƀư săch nai yơn mô geh nuĭh ndơ̆ samƀŭt rhăch nău.

Xă Tây Khánh Sơn geh 5 ngih samƀŭt dôl mô tŏng 30 nai. Mpôl hên nkoch trêng, rgŏ jă mbơh săch dŏng ta ăp trong gay ký tâm ton. Kơt wăch rgum nai sĭt nkual yôk mô tŏng têh jêng nchih dŭt âk yơn mô geh nai sĭt. Xă mpôl hên dŭt mpŏng n’gor ntop kơl đah trong tâm pă nai nkual bah dâng sĭt pah kan nkual yôk.

Nu nău aơ mô knŭng geh ta Tây Khánh Sơn ma hôm geh ta âk ntŭk nkual yôk êng bah Khánh Hòa kơt ta Khánh Vĩnh, Bác Ái... Ta năp đaơ, nău mô tŏng nai nkual yôk dơi ăp nkuăl tâm n’gor mkra đah nău kơl tâm pleh. Yơn lah, bah rnôk pơk dŏng n’gâng kan ƀon lan 2 gưl, trong ƀư tâm pleh-tâm rgâl nai mô dơi nthoi tay. Tĭng wa Lê Đình Thuần, Groi Giám đốc N’gâng kan ntĭm nti n’gor Khánh Hòa aơ lah nău jêr mô dơi mkra dâl:

Mpôl hên mbra mĭn njêng tay geh âk nău kơl êng, kuăl jă nai sĭt pah kan nkual dŭt jêr jŏt. Lah mbơh du nghị quyết an geh trong, dăn nău ntrŭnh, tâm ban ŭch nău ntrŭnh, ndâk njêng nghị quyết, sŏk rnoh pă dŏng, rnoh an dŏng, âk gưl jêr jŏt ngăn.

Ta năp nău ngăn ăp ngih samƀŭt nkual yôk mô tŏng nai ma N’gâng kan ntĭm nti n’gor Khánh Hòa lŏ ŭch geh mông nar mĭn njêng, Bí thư N’gor ủy Khánh Hòa Trần Phong đă ndăn uănh joi trong ƀư bah ăp ntŭk tâm lam dak, lor rnôk mĭn njêng-dăn đă nău kơl.

Lah ta lam dak mô geh tay rnôk nĕ mư nơm mĭn njêng trong kơl. Aƀaơ, ăp ntŭk băl geh hôm ri he uănh, nti. Yor nău kơl aơ knơm tâm tơm prăk n’gor, nău dơi mkra yor HĐND n’gor ntrŭnh. N’gor geh ndơ ri ntop kơl yơn nău ƀư bah n’gor đah nai rnôk hăn nkual yôk pah kan m’hâm ƀư.

Mkra nău jêr mô tŏng nai nkual yôk ta Khánh Hòa mô knŭng êng lah nău săch dŏng, ma lah mâng treh an nău uănh kơl, lĕ đah nău kan bah trong chính trị đah naư kan ntĭm nti nkual prêh. Nău ăp ngih samƀŭt nkual yôk ŭch rnôk aơ lah nău nchrăp, ngăch bah ăp ngih pah kan tâm ôp tâm nchră tâm nău wăch rgum nai. Gay năm nti mhe ntơm tât, ăp ngih samƀŭt nkual yôk mô hôm ndrăt hăn manh nai.