Knŭng đah đêt nău ƀư ta điện thoại thông minh, trong tŏ hoch êng ta nkual tăm 50 ha chanh rse bah HTX Xanh Cao Nguyên, xă Cư M’gar, n’gor Dak Lak pơk dŏng lĕ rngôch. Dak tŏ n’hanh phân poh dơi ƀĭt joet tĭng nău ŭch hao jêng bah tơm tăm ndơn yor nsing nău blău ơm kơt bah năp đaơ. Wa Nguyễn Văn Thanh Bình, Giám đốc HTX an gĭt, công nghệ mrô kơl hợp tác xã mât uănh lĕ rngôch trong tăm, bah mât chăm, nchih nar tăm tât joi tu tơm ndơ.

Nău kan kơt dŏng công nghệ mrô lĕ rgop n’hŭch prăk nuĭh kan, n’hao săk rnglăy mât uănh nkra njêng n’hanh uănh nđôi ueh kah ndơ. Đah rnoh têh ăp ntŭk tăm bah 5-10 ha, hợp tác xã dơh tâm nău ƀư nkra njêng, puh rao, mât uănh n’hanh nkret njêng jru, tâm di ăp nău ŭch tăch n’gluh.

Trong n’hao hao khlay tă bah kơt dŏng khoa học công nghệ, rgâl mrô n’hanh hun hao lŏ mir tâm pleh dôl nar lơ na nê̆ ta Dak Lak. Tĭng wa Đặng Bá Đàn, Groi Giám đốc Ntŭk kan ntrŭt nsôr lŏ mir Ngih dak nkual Tây Nguyên-Nam Trung Bộ, aơ lah nău khlay đah n’gor geh ntŭk lŏ mir bôk năp lam dak rnôk Dak Lak geh nklăp 214.000 ha cà phê đah rnoh geh bơi 590.000 tấn du năm, ndrel bơi 79.000 ha tơm sa play khlay. Wa Đặng Bá Đàn an lah, aƀaơ n’gâng tơm nău kơl an rgâl mrô tâm lŏ mir lĕ tŏng ăp, nău khlay lah ndơ̆ ăp săk rnglăy mĭn njêng n’hanh ntrong ƀư kơt dŏng tât đah nuĭh ƀon lan du trong ngăch lơn, dơh wât n’hanh dơh ƀư.

He boăt nthoi lĕ rngôch gay geh soan têh dăng n’hanh ngăch lơn gay ndơ̆ rgâl mrô bah săk rnglăy mĭn njêng tât ăp ntrong ƀư tât đah nuĭh ƀon lan du trong uĕh ngăn an tơm tăm nĕ, ŭch gĭt ndơ m’hâm ƀư ri knŭng kơt dŏng công nghệ mrô joi tu tơm di na nê̆ ngăn đah công nghệ aƀaơ hin ma Việt Nam n’hanh lam ntŭr neh dôl gĭt tât.

Tĭng wa Nguyễn Thanh Hiền, Groi Kruanh Ban mât uănh Nkual  lŏ mir Công nghệ mhe nkual ƀon têh Hồ Chí Minh, bah meng nău geh đah neh ntu, trôk nar gay hun hao lŏ mir uĕh kah, têh hvi, tâm rnôk mbơh ƀư Nghị quyết 57 bah Bộ Chính trị mpeh hun hao khoa học, công nghệ, rgâl mĭn njêng mhe n’hanh rgâl mrô lam dak, ndrel Nghị quyết 68 mpeh hun hao wăng sa ƀư êng, Dak Lak geh tay dơi ntrôl kơt dŏng ăp công nghệ mhe kơt rgâl êng nkra njêng, kơt dŏng nău mĭn mhe (AI), Internet âk ntil (IoT), mât prăp mrô an nkra njêng lŏ mir.

Dak Lak an ntrôl dăng kơt dŏng khoa học công nghệ, rgâl bah nău mĭn ƀư lŏ mir rgâl an wăng sa lŏ mir. Ăp nău kan ngăn lah N’gâng kan khoa học n’hanh Công nghệ, N’gâng kan Lŏ mir n’hanh ntŭk ntô gŭ âm n’hao pah kan mĭn njêng, kơt dŏng an nkra njêng, n’hao khlay ndơ lŏ mir kơt n’hao têh nkra njêng ndoh ndơ têh dơi hăn tât ăp ntŭk tăch rgâl dak bah dih kơt nuih n’hâm ăp nghị quyết bah Trung ương.

Yơn lah, gay jêng ndơ lŏ mir công nghệ mhe ngăn ngên, nău kơt dŏng công nghệ ta tĭng ntrong ƀư êng chrach lah mô tŏng. Nău khlay lah ndâk njêng ăp nkual tăm rgum, ntung trong tâm ban n’hanh neh tŏng têh gay wăch rgum doanh nghiệp ntuh kơl nkret njêng jru.

Đah bơi 827.000 ha neh tuch tăm ndrel trong tơm tăm âk ntil, Dak Lak geh âk nău dơi an hun hao ăp trong khlay ndơ lŏ mir têh. Wa Đặng Thị Thủy, Groi Giám đốc N’gâng kan tuch tăm mât rong n’hanh ntŭk ntô gŭ âm n’gor Dak Lak an gĭt, Nghị quyết Đại hội Đảng bộ n’gor năm kan 2025-2030 mĭn năl hun hao lŏ mir công nghệ mhe, lŏ mir ueh nđĭr n’hanh wăng sa tâm pleh lah trong hăn têh. N’gor dôl rgum dăp rgum ăp nkual tuch tăm kơt dŏng công nghệ mhe hăn ndrel đah nău geh ta ntŭk, nkre nchrăp ntung trong n’hanh neh kloh ueh gay wăch rgum ăp nuĭh ntuh kơl têh.

Mpôl hên kơl lor wăch rgum ntuh kơl, tâm rgop mpeh ntung trong tâm ăp tông tâm pă, ăp nuĭh gay ntop kơl đah prăk, ntop kơl măy mŏk nkret njêng n’hanh mât prăp, kơt boăt nthoi nău khlay ăp ndơ gay an ndơ tâm di tĭng ntŭk tăch. Rnôk jêng geh du trong tâm ban ri nău rƀŏng hao jêng 2 rnoh mrô lah di, nkre geh n’hâm soan hun hao wăng sa lŏ mir tâm năm tât.

Bah ăp ntrong ƀư kơt dŏng công nghệ mrô ta neh lŏ tât trong nchrŏng jêng ăp nkual tuch tăm têh n’hanh trong khlay uĕh lĕ rngôch, Dak Lak dôl ntơm rgâl bah hao jêng tĭng trong jru hvi rgâl an hun hao tĭng trong jru. Aơ dơi uănh lah n’gâng tơm an n’gor n’hao rnoh khlay ndơ lŏ mir, n’hao dơi tâm rlong n’hanh rbô̆ng jêng ntŭk lŏ mir công nghệ mhe bah nkual Tây Nguyên./.