Bơi du pơh aơ, âk cán bộ, tahen, dân quân n’hanh rmôt way kan geh măt bah ôi ơm ta Nghĩa trang Liệt sĩ Mỹ Thắng. Đah du hê du nău kan: mât rnă njrăng, rmôt kuih joi, rmôt dak si, rmôt răk ngêt sa... Lĕ rngôch rƀŏng tât nău ŭch nsum lah jêh nău kan sŏk nting di trong ƀư, di ngăch prăl. Trung tá Phạm Hữu Lộc, Chính trị viên Groi Ntĭm rđău Tahen xă Phú Mỹ Đông an gĭt, jêh kuih joi, nting dơi Đội 52 sŏk nting, rdêng sĭt rmôt dak si uănh nđôi, mât prăp rhăt jăp lor rnôk jao an sĭt Ban ntĭm rđău tahen xă.

Đah nău kan 500 măng nar, ntŭk kan lĕ ntơm mbơh ƀư bah lơ 25/5 tât aƀaơ. Ntŭk kan dŭt n’hâm ƀư tĭng nkô̆ nău ăp rmôt lĕ dơi Đảng ủy, UBND xă ndâk njêng, ƀư tĭng ăp nar gay m’hâm ƀư an di ngăch jêh.

Ta ăp yôk môch dơi kuih joi, du choanh dơi ndâk ƀư gay bah oi duh nar kơt ŭnh hŭr yan mih. Đah lĕ nău kan âk năm pah kan ƀư nău kan rgum joi nting tahen, tĭng jâng ty bah cán bộ-sĩ quan K52 dŭt rlăp. Thiếu tá Trần Hoàng Nam, bu ndăm Đội K52, N’gâng kan ntĭm rđău tahen n’gor Gia Lai nkoch, du nghĩa trang lŏ geh neh ntu êng êng, jêng nău kuih geh nău jêr êng. "Tâm rnôk ƀư tĭng nău kan saơ ăp môch ta ăp ntŭk geh nău êng êng. Du đêt môch neh rbân, jêr joi rgum, ntĭt nsa kơt Phù Mỹ Đông lah neh choih jêng oh nô ƀư geh nău rlâm. Du đêt môch êng rnôk kuih geh dak khuch âk tât nău rgum joi".

Nău kan ƀư êng geh tâm duh. Nuĭh aơ ji ŏk ri nuĭh êng ndăn. Dak rhak mpêh ao yơn mô geh nuĭh ndăn. Păng bay jêt, mbrơi mbrơi koach tĭng gưl neh, tĭng ndơ, nting tahen dơi djôt mbrơi mbrơi. Lơ âk jêr jŏt, ăp druh ndăm đội K52 Gia Lai lơn nsrôih lơn.

Geh nău nuĭh rlău jŏ năm ir, ăp nting lĕ lêk âk. Đah ăp nuĭh nĕ, Đội K52 ntơm pơk hvi nkual joi. Dơi tâm rnôk dăp rgum yor lịch sử n’glơi an ri môch lĕ trơn. Oh nô nsrôih pơk hvi, mĭn lah joi na nê̆, mô dơi an tih.

Tă bah nkual dơi rgum joi âk mét lah ntŭk ăp kỹ thuật viên ƀư gưl sŏk ADN tĭng trong rhăt jăp. Du ntil nting mham dơi djôt dơn nău mbơh, chŭp rup, nchih mrô, mât prăp n’hanh mât ndrăy tŏng ăp gay rhŏ trong kan năl bah kơi aơ. Nai dak si Dương Công Hoàng, kruanh kíp, kíp sŏk nting an gĭt: " rnôk sŏk nting, gưl nti hôm ƀa ƀă mbra jao an ntŭk mrô gay ndơ̆ plơ̆ sĭt tay môch. Hôm ntŭk kan mât ndrăy nting đăp mpăn tĭng nău ntrŭnh gay bah kơi aơ jao an ntŭk kan wơt dơn, njuăl an năl, moh săk an ăp wa".

Nghĩa trang Liệt sĩ Mỹ Thắng aƀaơ geh 445 môch tahen, tâm nĕ hôm e 118 môch mô hŏ dơi năl săk. Nău sŏk ADN ta aơ mhe knŭng lah ngoăy tâm âk ntŭk bôk năp bah Nău kan 500 nar măng ma n’gor Gia Lai dôl ƀư ta âk nghĩa trang liệt sĩ ta lam n’gor. Trong hăn bah năp hôm e âk jêr jŏt yor têl tâm lơh tâm su lĕ roh. Yơn ăp nting mham dơi mât răp jăp nar aơ dơi tĭng nău mpŏng sĭt du nar ăp nuĭh tahen kăl e mbra dơi kuăl di săk nơm, n’hanh sĭt rgum đah rnăk wâl.