Tĭng nău mbơh, 6 khay bôk năm, dĭng lĕ ndơ ta lam n’gor Khánh Hòa (GRDP) hao 9,03%, dâk tal 14/34 n’gor, nkual ƀon têh n’hanh dăp tal tal 2 nkual duyên hải Nam Trung Bộ-Tây Nguyên. Sŏk an Ngih dak geh bơi 28.000 rmen prăk lôch jêh rlău 80% trong nchrăm năm.Ntuŭk ntô ntuh kơl dơi rgâl, ăp ntil nău văn hóa, rêh jêng, đăp nău rêh dơi uănh tât, mât njrăng bri dak-rnă njrăng dơi nâp nâl. Yơn lah, âk đại biểu an lah, bah kơi ăp rnoh mrô hôm e âk nău uănh năl sŏng dăng gay đăp mpăn hao jêng nâp nâl tâm ăp năm tât. Đại biểu Phan Gia Ngọc, Groi Ban Pháp chế, Hội đồng Nhân dân n’gor Khánh Hòa rblang: ”Sŏk an tơm prăk năm aơ geh bơi 27.930 rmen prăk yơn rlău 14.000 rmen prăk, geh rlău 53%, tât bah prăk dŏng neh n’hanh prăk soăy neh. Aơ lah tơm sŏk du tơ̆. Tâm rnôk nĕ,, rnoh sŏk bah doanh nghiệp ngih dak n’hanh doanh nghiệp bah dih lŏ hŭch. Dơi an lah, wăng sa Khánh Hòa dôl kâp tâm neh nkrem ndơn yor rnoh khlay nâp nâl bah nkra njêng, tăch rgâl”.

Tĭng âk đại biểu, aơ lah nău uănh bah ntŭk sŏk neh mô dơi jŏ jong. Ŭch mât ngăch hao jêng âk, n’gor an dôh rklaih ăp nău nău nchrăp wăk kol, wăch rgum ăp nău nchrăp ƀư ntuh kơl lăp an dŏng săk rnglăy, hun hao dăng nkual doanh nghiệp, công nghiệp, nău rhŏ n’hanh pâl đaih têh, âk đại biểu hô n’gluh an nău đă mpeh nău ntop tơm prăk an nuĭh ƀon lan, lơn lah nuĭh ƀon lan geh khuch yor ăp nău nchrăp ƀư dơi geh na nê̆ bah săk rnglăy hun hao. Wa Võ Nam Thắng, Bí thư Đảng ủy phường Đồng Ninh Hòa, n’gor Khánh Hòa an lah. “An n’hao săk rnglăy sŏk, trok tơm prăk, đăp mpăn an nău rêh jêng, lơn lah ntop kơl rgâl nău kan, ntuh kơl n’hao uĕh dak si, ntĭm nti ta bah dâng. Ƀon lan ŭch ăp săk rnglăy wăng sa aơ dơi tâm pă, boăt nthoi na nê̆ lơn tâm ăp nău kơl đăp mpăn rêh jêng, na nê̆ an nuĭh ƀon lan, lơn lah ăp nuĭh geh khuch yor sŏk neh gay hun hao công nghiệp, nkual têh”.

Bah meng mpŏng kâp mpeh ntung trong n’hanh dơi hun hao, nuĭh ƀon lan ŭch sŏk bah neh mbra ntuh kơl tay tâm ngih samƀŭt, ngih dak si, ntung trong, dak bât, ntĭm nti nău kan, njêng an nău kan n’hanh nău kơl joi nău rêh jêh sŏk neh, gay săk rnglăy hao jêng dơi rêng hvi tât nsum mpôl.

UBND n’gor Khánh Hòa an gĭt tâm 6 khay dŭt năm, n’gor nsrôih geh rnoh hao jêng GRDP đêt ngăn 11.2%, tă bah nĕ jêh nău rƀŏng hao jêng lĕ năm bah 10-11%. Gay jêh nău rƀŏng aơ, n’gor rgum ntrôl ngăch mkra ntuh kơl nsum; dôh rklăih ăp nău nchrăp ƀư hôm nkân; mât uĕh săk rnglăy ƀon lan 2 gưl; nkre kơl lor prăk an ăp nău kơl đăp mpăn rêh jêng n’hanh ăp ndơ khlay. Wa Châu Ngô Anh Nhân, Giám đốc N’gâng kan prăk n’gor Khánh Hòa, an gĭt, n’gor nchrăp tâm păn prăk ngih dak tâm năm 2025 đah prăk rlău 10.000 rmen. Aơ lah n’hâm soan khlay gay hao jêng ăp khay dŭt năm. “Tơm prăk aơ mbra tâm pă an lĕ ngôch ăp xă, phường gay tâm di nău ŭch ntuh kơl ăp ntil nău khlay, N’gor kơl lor ntuh kơl an ntĭm nti, dak si nău rhŏ an nuĭh ƀon lan; nkre rgum prăk an ăp ndơ ƀư khlay, lơn lah bah neh ntu n’hâm soan hun hao nkual Bah dâng Khánh Hòa”.

Ăp săk rnglăy hao jêng nsrôih tâm 6 khay bôk năm lah nău khlay gay Khánh Hòa rgâl mhe. Yơn lah, gay hun hao nâp nâl, n’gor an rgâl bah neh ntu jêng n’hâm soan jŏ jong an nkra njêng, tăch rgâl n’hanh đăp mpăn săk rnglăy hao jêng dơi rêng hvi ngăn ngên tât nău rêh nuĭh ƀon lan.