Nău tât ndal dŭt rngot ƀư khĭt 5 oh bu ur nchrăp lăp nti jrô 6 rnôk ma ăp oh tâm jă hăn ŭm ta dak bât Đăk Pot n’hanh mô lap geh mhir jâng tup ta dak jru. Nău tât aơ geh tâm rnôk kon hoc dôl ta khay rlu nti,  ndrel đah trôk nar mih n’hach ƀư an ăp rnoh dak bât, dak me, dak diăng n’hanh ăp ntŭk bât dak hao têh, dak hoch thăng dŭt jêr njrăng. Nău aơ an saơ geh nău mô njrăng na nê̆ tâm nău mât uănh, mât njrăng oh kon bâh ăp rnăk vâl n’hanh ntŭk rêh jêng tâm ăp khay kon hoc rlu nti.

Ta năp nău ndal kơt aơ, lơ 9/7/2026, UBND n’gor Lâm Đồng lĕ ntrŭnh ăp ntil nău ntĭm đă ngăch ndal, đă lĕ rngôch ntŭk kan chính trị lăp kan gay ma bah geh ăp nău tât kơt nĕ. Tĭng nĕ, n’gâng kan ntĭm nti geh đă n’hao nău tâm rgop đah rnăk vâl gay ma mât uănh kon hoc ta khay rlu nti, ntrôl dăng nău kan nti re an kon se. N’gâng kan văn hoá Thể thao n’hao nău mât njrăng nău đăp mpăn ta ăp ntŭk re, nkual pâl rlưn, n’gâng kan dak si n’hao nău dơi  mât njrăng ta ntŭk kan ba dâng. Ndrel đah nĕ, ăp mpôl kan têh geh dơn nău kan uănh nđôi lĕ ntŭk dak bât, dak diăng, nău kan ƀư dak bât gay ma ngăch ntrŭp ntŭk nking n’gang, ntŭk mbơh njrăng nău tât.

Ngăn lah, UBND n’gor Lâm Đồng lah na nê̆, Kruanh UBND ăp xã, phường an geh dơn kan lĕ rngôch n’hanh dơn lĕ nău kan êng nơm ta năp kruanh n’gor lah an geh nău oh kon se khĭt yor rmok dak tâm nău mât uănh oh kon se.

Ntĭm đă răng dăng bâh n’gâng kan lĕ geh, yơn gay ma mô an geh ăp  nău rngot kơt nĕ, ăp rnăk vâl an geh n’hao nău mât njrăng ngăn ngên. An geh ntêm âk mông nar mât uănh oh kon nơm, mât chăm, năp ăp ntil nău rêh ueh an oh kon, mô an ăp oh kon hăn ŭm êng ta dak me, dak diăng ma mô geh nuĭh têh hăn ndrel. Mât ueh oh kon se ta năp nău tât bâh rmok dak ta khay mih mô lah nău dơn kan bâh nău êng nơm.

                                                                             VOV Tây Nguyên