Ndăn rnôk yan wai, nuĭh ƀon lan thôn Kim Môn, xă Chư A Thai, n’gor Gia Lai hăn ƀư trong hăn tâm thôn, pơk hvi tât 8 mét. Gay ndơ ƀư ơm jêh, âk rnăk lĕ ŭch êng rơih n’gar, an neh. Rnăk wâl wa Phạm Văn Hùng lah ngoăy tâm âk rnăk hăn lor, dôh rơih lĕ rngôch n’gar, an rlău 74 m2 neh. Tâm jay gŭ êp trong dôl pơk hvi, wa Hùng nkoch nău răm rnôk saơ ƀon tơm nar lơ rgâl.

Rnăk wâl gâp an neh bah êp trong ơm lăp tâm jâng gung lah 3 mét, mpôl hên ŭch ndrel đah Ngih dak ƀư trong hăn gay kloh uĕh ƀon lan, ntung trong dơh ăp ntil, rdêng ndơ lŏ mir dơh an nuĭh ƀon lan. Nuĭh ƀon lan wăr ta aơ ŭch da dê an neh ndrel Ngih dak ƀư.

Bah năp đaơ, tâm yan lŏ mir, ndeh rdêng mô dơi lăp tât ta ntŭk rwăt ndơ yor trong jêt, âk gưl lĕ djơh. Gay ƀư pơk hvi ăp trong hăn thôn ƀon, ndrel đah rmôt cán bộ ta xă, yor nuĭh ƀon lan nkoch trêng, nsŭr nsôr ndrel tât râng. Wa Dương Văn Phon, ta thôn Hải Yên an gĭt, đah kônh wa ta aơ, an du gâl neh gay rgâl sŏk trong hăn têh hvi an nar aơ n’hanh bah kơi lah nău tâm di.

Moh ndơ cán bộ hăn rgŏ jă, nuĭh ƀon lan mpôl hên hôm ntrŭt nsôr nsum, kônh wa yor ăp nuĭh, ăp nuĭh yor he jêng ndrel nsrôih. Ngăn lah he roh đêt neh, yơn nău dơh lah trong hăn Ngih dak ƀư an he têh hvi he hăn mro mrăng, mô knŭng nău rêh he, nău rêh oh kon he dơi geh trong têh, kơt nĕ ƀon lan mư hun hao.

Wa Trần Văn Nguyên, Bí thư Chi bộ nkre ƀư Kruanh thôn Hải Yên, xă Chư A Thai an gĭt, nău dơi rhơn lah 79 rnăk bah 2 thôn rêh njok trong ri lĕ rngôch tâm ban ŭch an neh pơk trong hăn, an saơ nău du nuih n’hâm gay tĭng nău ntrŭnh bah Ngih dak.

Kônh wa rhơn yor trong aơ bah năp đaơ jŭr djơh bŏk rsĭk. Rnôk nkoch trêng kônh wa ăp nuĭh du nuih n’hâm an neh, phah jăng mpêr n’gar bah năp đaơ lĕ dơi ƀư nâp nâl. Geh Đảng, Ngih dak ƀư an trong aơ ri kônh wa rhơn ngăn.

Xă Chư A Thai lah nkual srih tăm ba âk mpeh Tây n’gor Gia Lai. Mĭn lah ntung trong nuih n’hâm hun hao, ƀon lan lĕ ntuh kơl 18 trong hăn tâm thôn đah dĭng lĕ 17,4 rmen prăk. Tâm nĕ, nuĭh ƀon lan lĕ ŭch êng an bơi 5000 m2 neh ƀư trong, rgop rlău 1,1 rmen prăk. Wa Phạm Văn Lượng, Groi Bí thư Đảng ủy, Kruanh UBND xă Chư A Thai an gĭt, xă dôl mbơh ƀư tay 7 trong hăn mhe n’hanh dơi geh tâm ban ŭch âk bah nuĭh ƀon lan.

Mbơh ƀư ăp trong hăn lĕ geh nău tâm ban ŭch âk bah kônh wa ƀon lan ta ăp thôn ƀon, kơl n’gâng kan ƀon lan mbơh ƀư ngăch ăp nău nchrăp ƀư. Tâm rnôk mbơh ƀư mpôl hên lĕ ndâk njêng rmôt rgŏ jă nkoch trêng sŏk neh n’hanh ƀư rgŏ jă nkoch trêng, lĕ trong chính trị bah ăp thôn lăp ƀư rgŏ jă nkoch trêng kônh wa rƀŏng tĭng rơh rgŏ jă an neh ƀư trong.

Ăp trong hăn dôl pơk hvi ta Chư A Thai, n’gor Gia Lai mô knŭng nta nơih an hăn nsong, nkra njêng ma hôm an saơ nuih n’hâm tâm rnglăp, ndrel nuih n’hâm bah nuĭh ƀon lan ndâk njêng thôn ƀon mhe./.