Hăn rlău 30 km trong chai rlău bri cao su, cà phê bah Quốc lộ 19 tât xă Đak Sơ Mei, nău ƀư mpôl hên ŭch ngăn lah nău têh uĕh bah tĭng thôn ƀon, gung trong. Wêh khâl ƀon văn hóa Đe Gôh, nău uĕh bôk năp lah ăp trong bê tông kloh uĕh. 2 ding trong lah ăp jay xây têh. Lĕ rngôch ăp rnăk rwăt năp tŏng ăp ndeh ndơ djăt uănh, măy kay... rhŏ an pah kan jan sa; nău rêh nuih n’hâm n’hanh ndrăp ndơ dơi hao. Bu ranh ƀon A Điêu, rhơn: ƀon aƀaơ geh rlău 100ha cà phê play, geh âk rnăk geh prăk ăp năm rlău rmen prăk, ntoh lư kơt rnăk wa Châp, wa A, wa Hơ...

Knơm Ngih dak uănh kơl, ntĭm tăm cà phê, ƀư ba lŏ, tăch ndơ lŏ mir dơh đŏng, khlay đŏng. Ƀon lan he rgâl âk ngăn: ngih wâl têh uĕh lơn, geh ndeh công nông gay ƀư mir, ƀư sa nar lơ đăp mpăn. Kônh wa dŭt răm, dŭt lah uĕh Đảng n’hanh Ngih dak lĕ nsĭt tay nău rêh hơm răm kơt nar aơ.

Ta ƀon Tŭl Doa (ƀon bah Anh hùng Wừu), wa Jit, Kruanh thôn Tŭl Doa, rhơn lah:"Tâm pah kan jan sa, kônh wa nti trong tăm cà phê jêng nău geh âk lơn. Năm e, ƀon hôm rlău 80 rnăk ach o, tât aƀaơ knŭng hôm nklăp 40 rnăk ach o. Nău rêh kônh wa mbơm oi, dŭt âk knơm cà phê dơi khlay. Kon sau dơi Ngih dak ndâk ƀư ngih samƀŭt, nai tât jay rgŏ jă hăn nti, ăp mon dơi tât ngih samƀŭt tŏng ăp".  

Ntung trong dơi ntuh kơl uĕh, nău rêh bah nuĭh ƀon lan nar lơ sâm geh, an saơ nău uănh kơl bah Đảng Ngih dak đah ƀon lan ntŭk cách mạng kăl e. Ta ƀon dŭt jêr jŏt Kon Jôt (xă Hà Đông ơm) tă bah xă rlău 30 km, yơn mô hŏ ndrŏng yơn mô hôm geh nău ji ngot tâm ăp khay dŭt năm. Wa Tơh, nuĭh ƀon Kon Jôt, an gĭt, kônh wa nsrôih nti, kơt dŏng ăp nău mhe khoa học kỹ thuật mât rong, tuch tăm... nău rêh dơi rgâl: "Bah năp đaơ, kônh wa tâm ƀon mpôl hên knŭng gĭt tuch ba mir, tăm bum jêng nău rêh dŭt jêr jŏt, mô tŏng ngăn. Aƀaơ, knơm Ngih dak ntop kơl kon ntil kơt ndrôk, bê n’hanh tơm tăm kơt tơm keo... kônh wa geh tay ndơ gay hun hao wăng sa, nău rêh mbơm oi".

Xă Đak Sơ Mei geh 10 thôn ƀon, bơi 15.000 nuĭh, tâm nĕ rlău 87% rnoh nuĭh lah nuĭh rnoi mpôl đêt. Ndrel đah nău ntuh kơl ndâk ƀư ntung trong, n’gâng kan ƀon lan tâm rgop âk bôk nău kan, nău kơl bah ngih dak gay kơl kônh wa hun hao wăng sa, mô rlu n’hao prêh nău rêh. Tât aƀaơ xă lĕ geh rlău 2000 ha tơm tăm jŏ năm, kơt: cà phê, cao su, tiêu... Ăp gưl, ăp nău kan ƀa ƀơ ƀư tiăr nti mpeh khoa học kỹ thuật mât rong, tuch tăm, ntop kơl phân poh, tơm ntil kơl nuĭh ƀon lan. Wa Đinh Ơng, Kruanh UBND xă Đăk Sơ Mei, an gĭt:"Xă Đăk Sơ Mei dŭt âk lah nuĭh Bana, Jarai... geh rlău 87% rnoh nuĭh. Ndrel đah nău uănh ntuh kơl bah Ngih dak, năm tât, xă mbra rgŏ jă tay kônh wa gơih ƀư sa, hun hao wăng sa gay ƀon lan nar lơ hơm răm, rgâl mhe lơn".

Nău “rgâl ntô, plơk săk” ta ƀon tơm cách mạng Anh hùng Wừu nar lơ na nê̆, lah nău geh bah nuih n’hâm rlet rlău jêr jŏt n’hanh nău nsing nơm bah nuĭh ƀon lan đah Đảng n’hanh Ngih dak. Aơ an saơ na nê̆ ngăn đah nău kơl têh, nău ntuh kơl di bah Đảng, Ngih dak ta nkual neh Tây Nguyên âk duh sial. Kônh wa ăp rnoi nuĭh lơ gĭt rjăp tâm rnglăp, ndrel soan ndâk njêng căn cứ cách mạng nar lơ ndrŏng uĕh.