Nkhêp nkah ndray 51 năm Rklaih luh miền Nam, dơn ngoăy neh dak, ta Nkual ƀon têh Hồ Chí Minh, Tổng Bí thư, Kruanh dak Tô Lâm ndrel mpôl pah kan hŏ tât mpoh nhang, nkah gĭt ăp kruanh rđău kan dâk leo lor bôk năp, mpơl nău way “ngêt dak kah gĭt tu tơm” n’hanh nkah gĭt ăp nău rgop têh kuâng đah n’gâng kan cách mạng bah rnoi nuĭh.

Ta jay drô Tổng Bí thư Nguyễn Văn Linh, Tổng Bí thư, Kruanh dak Tô Lâm mpơl nău nkah  gĭt đah kruanh rđău kan ntoh lư bah rơh rgâl mhe, nuĭh hŏ ndrel Trung ương Đảng ndơ̆ luh n’hanh tĭng ƀư gung trong leh di, rgop ndơ̆ neh dak rlău jêr jŏt, tĭng kơn hun hao.

Mpôl hăn hŏ tât mpoh nhang nkah gĭt drô Kruanh Hội đồng Ngih dak Võ Chí Công, kruanh rđău kan du nuih n’hâm, geh âk nău rgop rlăch ndăng nsĭt đăp mpăn, dơn ngoăy neh dak. Mpôl hăn hŏ tât mpoh nhang ta jay drô Kruanh Hội đồng Bộ trưởng Phạm Hùng n’hanh drô Tổng Bí thư Lê Duẩn, mpơl nuih n’hâm nkah gĭt jru, nkre ôp khâl ăp rnăk wâl. Mpôl hăn hŏ nkah gĭt Thủ tướng Võ Văn Kiệt n’hanh Đại tướng, Kruanh dak Lê Đức Anh. Nău kan rgop mpư n’hao rơh kơn dâk hăn lor bôk năp, ntĭm nti nău way ơm rŏng dak, rdâk nâp nău dơn kan tâm rdâk njêng n’hanh Mât njrăng neh dak.