Gia Lai dôl ndăn ngăch droh rklaih wăk kol đă ntrơn du rong neh ƀư trong cao tốc Quy Nhơn – Pleiku, nkre ntrŭt ntrôl du rut âk ntŭk nchrăp ƀư rgum tơm, rƀŏng tât n’gluh 100% tơm prăk ntuh kơl.

UBND n’gor Gia Lai mhe ƀư tâm nchră nkra lơh wăk kol đă ntrơn du rong neh an ƀư trong cao tốc Quy Nhơn – Pleiku jong 125 km. Ntŭk ƀư du gâl bôk năp hŏ ndơ̆ jao 65% neh soih. N’gor an ƀư 13 nkual ntrơn du ntŭk gŭ mhe an rlău 620 rnăk ƀon lan. Yơn lah, rnoh khlay trok tâm đêt n’hanh trong rƀŏng ntrơn du ntŭk ntô kỹ thuật dôl khuch tât rnoh ngăch ƀư. Groi kruanh UBND n’gor Nguyễn Tự Công Hoàng đă:  

“Trok tâm neh tuch tăm lah ân ôp uănh tơm luh di ngăn. Ŭch ƀư kơt aơ ri lam trong kan chính trị bah thôn, ƀon, let lơ ân nkoch trêng, rgŏ jă, rƀah gĭt nău lư, dăn đă bah nuĭh ƀon lan, gay nkra ntơm bah tâm dâng. Nsrôih ntŭk nchrăp ƀư gâl 2 ân ndăn ngăch rnoh ƀư ndrel du tơ̆ đah ntŭk nchrăp gâl 1 n’hanh 3. Bôk năp trok tâm neh tuch tăm tât nar 30/4 lah lôch lĕ”.

Ndrel đah nê, Gia Lai an ton gĭt lor du rơh âk rnoh ngăch kan: lôch jêh trong me wăng sa mpeh luh nar tâm khay 6/2026; ăp njăr trong buăt nthoi mbluh rloh lam nkual lôch jêh tâm năm; đă ntrơn du ƀư trong cao tốc lôch tâm khay 4/2026. Âk ntŭk nchrăp ƀư n’hong dak bât, dak si, văn hóa, ndơ dŏng đô thị dơi đă rdâk ƀư n’hanh lôch jêh tĭng nar ton na nê̆ đŏng. N’gor n’gluh rnoh prăk 100% năm 2026, đă mât dŏng tĭng nău way “6 kloh”, nkre đah nău dơn kan êng bah nuĭh tơm ƀư.