-Ôi aơ, ta Nkual Di tích lịch sử Ngih dak Đền Hùng (n’gor Phú Thọ), ƀư Lễ Giỗ Tổ Hùng Vương n’hanh An nkao ta Mpang rup phù điêu “Wa Hồ nkoch bri đah cán bộ, tahen Đại đoàn Quân Tiên Phong”. Na nao lôch jong lịch sử ndâk njêng neh dak n’hanh mât neh dak, nău way nkah gĭt n’hâm soan u che lĕ jêng rse boăt nthoi, ntŭk nsing nuih n’hâm, soan dăng bah rnoi nuĭh, ƀư jêng nău hôm e moh săk Việt Nam tâm rnglăp dun n’gang trôk nar kop srê, mât njrăng n’hanh ndâk njêng neh dak. Soan dăng huêng phan bah Giỗ Tổ Hùng Vương kơt nău rgum bah play nuih ăp kon Lạc cháu Hồng rƀŏng tât tu tơm, mpeh Neh dak đah 2 nău ngơi tam ma dăch dêh “Ƀon lan”. Giỗ Tổ Hùng Vương mô knŭng lah nar rgum têh bah rnoi nuĭh, ma hôm di an rêng hvi nuih n’hâm rŏng dak, nău  mĭn hao êng n’hanh mpŏng ŭch hao prêh-kơt nău Wa Hồ tă ntĭnh: “Ăp Kđăch Hùng lĕ geh soan ndâk njêng neh dak, Wa mon he an ndrel mât sŏk neh dak dak”.

- Ta năp nĕ, bâh lơ 17/4 (1/3 Bính Ngọ), bôk nău kan Giỗ Tổ Hùng Vương- ƀư brah Đền Hùng n’hanh pơh văn hoá- pâl nđaih Neh yău 2026 lĕ geh ƀư tâm nău kan khlay mbro dŭt têh ta nkual di tích lịch sử Đền Hùng n’hanh ăp xã, phường tâm n’gor Phú Thọ. Bôk nău kan năm aơ geh âk nău mhe ntoh lư, tâm rgop đah mât rbăy nău khlăy way ơm n’hanh pơk hvi tâm nđur lam ntur neh.

-Aơ lah năm bôk năp n’gor Phú Thọ ƀư mpla nsơ mỹ thuật lam ntŭr neh, mpla nsơ rup ndah neh dak tât băl bên lam ntŭr neh. Âk nău ƀư văn hóa way ơm dơi mât tay n’hanh ƀư n’gŭr răm kơt: Hội trại văn hóa, mpla nsơ, nkoch mbơh ăp ndơ ta ntŭk; Tâm nđŭr njroh mprơ, Rgum tâm rlong nklâm, gâm bánh chưng-juh bánh giầy... ƀư mpoh nhang nkah gĭt ăp Kđăch Hùng bah ăp xă, phường tâm n’gor Phú Thọ dơi ƀư tĭng 18 rkum xă, phường.

- Ngoăy tâm âk nău ntoh lư khlăy bâh rơh ƀư brah lah nău tâm nđur nău ueh êng way ơm ta trong nkuăl ƀon têh geh ndâk nsơm. Nău kan aơ tâm rgop đah bôk nău kan “Ueh ntơr âk ntil nău pâl nđaih neh ơm yău”, ntop geh âk ƀon lan n’hanh bu năch tât râng, nkre lah mât rbăy, n’hao ăp nău khlăy ueh êng ntoh lư bâh nkual neh Yău- tu tơm bâh mpôl rnoi Việt Nam, tâm di đah nău mpŏng hun hao nău ueh êng tĭng Nghị quyết 80 bâh n’gâng kan Chính trị.

-Tĭng djăt ƀư brah Hùng Vương dơi UNESCO nchih săk lah Drăp ndơ văn hóa mô mpơl săk ntoh măt bah kon nuĭh bah năm 2012. Nar Giỗ Tổ Hùng Vương lah du nău têh khlay uĕh ngăn đêt geh nkôp đah âk dak rnoi nuĭh ta lam ntŭr neh. Nău tơm bah lễ hội Đền Hùng geh 4 nkô̆ nău tơm: Gĭt rsơl plơng; nău gĭt ngêt dak kah gĭt tu dak; nău wât đah tu tơm rnoi nuĭh n’hanh geh nău uĕh êng bah tĭng djăt ƀư brah u che bah nuĭh Việt Nam. Groi giáo sư tiến sỹ Bùi Hoài Sơn, đại biểu chuyên trách Ủy ban văn hóa-Ntĭm nti bah Quốc hội an lah: "UNESCO uănh lah dŭt prêh bah ăp nsum mpôl lĕ rnoi nuĭh Việt Nam tâm nău moh săk ntô̆ n’hao tĭng djăt ƀư brah Hùng Vương jêng rup ndah bah rnoi nuĭh. N’hanh bah rup ndah rnoi nuĭh nĕ jêng nău tâm rnglăp an lam neh dak aƀaơ n’hanh kơl an hegeh du nău way ơm njrăng n’gang ndâk njêng neh dak n’hanh mât bri dak tât nar aơ. N’hanh du nău tay ma UNESCO uănh lah prêh djăt tĭng ƀư brah Hùng Vương na nao tâm rnôk lĕ rlău dơi jêng tâm lịch sử yơn tât nar aơ hôm e dơi mât ăp nsum mpôl nuĭh ƀon lan ăp rnoi nuĭh Việt Nam ƀư"./.