Tâm xã Ia Băng, n’gor Gia Lai, ntŭk tơm bah trong hăn ngăch Quy Nhơn-Pleiku, bol ma tâm rnôk rlu lễ, máy uih neh, máy chuah hôm ƀư tâm lôch măng nar. Ăp bôk ndeh rdeng neh dôl  ƀư nau kan ndal tâm ntŭk ntrơn leo neh ntu. Wa Trương Anh Đài, rđau kan ntŭk kan ndâk ƀư nau kan mrô 3, tâm xã Ia Băng, mbơh:

            ‘Gay ntrŭt dăng ngăch nau ƀư ndrel ndăn tâm yan duh nar, công ty phung hên uănh năl ntŭk geh dơi ƀư ri nkra tât tâm nê, 3 ca 4 kip, ƀư mro tâm măng nar gay ma ngăch nau kan; ntrong ƀư lah n’hao leo máy móc, n’hao nŭih ƀư kan, ntrŭt dăng ngăch ngăn mra dơi ƀư bah năp yan mih”.

            Trong hăn ngăch Quy Nhơn-Pleiku jong nklăp 125 km, geh pă jêng 3 nau kan. Tâm nê, bôk nau kan mrô 1 ndrel 3 hŏ jêh ntrơn leo ntŭk ntu ƀư nau kan geh 65-67%. Aơ kŏ lah ngoai tâm âk nau kan tơm geh nau ntrŭnh ƀư ngăch bah n’gor Gia Lai, rnơm nau leo lăp kan tâm ban bah ƀon lan tâm ntŭk ƀư kan. Âk rnăk hŏ nchrăp tâm rgop, ơm jao neh gay ƀư nau kan. Nô Yôh, rnoi Bahnar, tâm ƀon A Lao, xã Lơ Pang, geh neh tâm ntŭk bu nsĭt mbơh:

            ‘Rnăk hên tĭng nau ntrŭnh bah Ngih dak ƀư trong hăn ngăch, ntơm rnôk ntrŭnh ƀư ri tâm ban nuih n’hâm.  Rnoh prăk trok tâm neh tâm di ri ma rnăk vâl hên ŭch đŏng”.

            Ba kơi nau ƀư kan ngăch ndăn rnôk aơ lah ntrong âk năm geh đă bah cử tri ndrel ăp ntoh măt ƀon lan đă n’gor Gia Lai. Lôch âk năm, Quốc lộ 19 kơt lah du trong nthoi đah Gia Lai ndrel Bình Định ơm. Nau hăn ro tâm ăp yôk chỉăng kơt An Khê, Mang Yang tâm rơh rlau aơ ndrel nau nchuăn rdeng, ngăn lah đah ndơ tuch tăm mro tâm rnoh prêh.  Wa Nguyễn Hữu Thọ, tâm xã Đắc Đoa, n’gor Gia Lai mbơh, cử tri tâm xã âk tŏ đă nkra trong hăn ngăch Đông-Tây, nthoi Tây Nguyên ndrel duyên hải miền Trung, ngăn lah trong pleiku-Qiu Nhơn. Ăp nau đă aơ geh rmôt kan ntoh măt Quốc hội n’gor Gia Lai kơp dơn, nsôih mbơh tâm ăp nau tâm nchră ma Quốc hội, Chính phủ ndrel ăp n’gâng kan, ntŭk kan:

            ‘Bôk nau kan trong hăn ngăch Quy Nhơn-Pleiku lah nau ŭch ngăn bah ƀon lan tâm nkuăl tă bah jŏ ma aơ hôm. Cử tri kŏ đă tât rmôt kan ntoh măt Quốc hội, kơp n’ăp ma ntoh măt tâm n’gor ndrel ntoh măt bah Trung ương, kŏ nkoch tât nau ŭch aơ. Bah 2 rơh rƀŭn Quốc hội gưl 14 ndrel 15, kŏ mbơh nau đă aơ ma Quốc hội ndrel Chính phủ, gay tŏng dơi nau ŭch đă bah ƀon lan”.

            Cử tri ndrel nŭih ƀon lan Gia Lai ntoh nau rhơn rnôk trong hăn ngăch Quy NHơn-Pleiku dôl ăp nar geh ntrŭnh ndâk, mra geh saơ jêh âk năm kâp rnơm. Ntŭk nkra geh mpŏng mra rgop nau doh rklaih ăp nau jêr jêh âk năm hăn ro, tăch rgâl tă bah jŏ ma aơ knŭng hăn tâm Quốc lộ 19 đah âk trong sop, yôk prêh, bah nê pơk nau nơih ueh lơn ân nŭih ƀon lan ndrel ntŭk ƀư nau kan tăch rgâl tâm nau hun hao văng sa. Yuh Phạm Thị Thu, tâm Phường Pleiku, vay hăn ro, pah kan jan sa tâm Quy Nhơn, nkoch:

            ‘Rnăk hên vay pah kan jan sa tâm Quy Nhơn, nau kan hăn ro, nchuăn rdeng ndoh ndơ rnôk aơ jêr ngăn, roh ntơm 4-5 mông hăn ro. Rnôk geh nau mbơh lah mra geh trong hăn ngăch, gâp saơ rhơn ngăn. Gâp dơi gĭt, trong hăn aơ mra nkra, mra rhuăt gleh mông hăn ro, roh knŭng nklăp 2 mông hăn trong. Kơt nê, đah ăp nŭih pah kan jan sa kơt hên ri n’huch ngăn n’hâm soan, prăk rêl tâm ăp rnôk hăn ro”.

            Trong hăn ngăch Quy Nhơn-Pleiku mô êng lah du nau kan nkra trong hăn tơm khlay bah n’gor Gia Lai, ma hôm ân saơ nau ŭch ngăn bah ƀon lan tâm n’gor mro geh djăt, mbơh ndrel geh ƀư ngăn.

Ăp nau tă geh aơ mô êng rhop nau rklaih ăp nau kan bah n’gor ma hôm pơk trong dơih gay rmôt kan ntoh măt Quốc hội n’gor Gia Lai lŏ ƀư ân ueh nau dơi bah nơm tâm rơh tât.  Wa Châu Ngọc Tuấn, Groi Bí thư n’gor uỷ,  Kruanh rmôt kan ntoh măt Quốc hội n’gor Gia Lai, mbơh:

            ‘Phung hên mro ndơn gĭt jru ngăn mpeh nau dơi, nau kan bah rmôt kan ntoh măt Quốc hội n’gor nar lơn ân geh ntô̆ n’hao nau kan. Rmôt kan ntoh măt Quốc hội n’gor Gia Lai ăp gưl kan ba kơi mra nthoi nau vay ơm, ƀư ân jêh ueh nau dơi nau kan bah nŭih ntoh măt ân ƀon lan, rgop nau ndâk njêng Việt Nam tâm nê geh Gia Lai hun hao ngăch, nâp nâl ndrel geh âk nau dơi”.

            Trong hăn ngăch Quy Nhơn-Pleiku dôl geh ntrŭnh ƀư ân ndal tâm n’gor Gia Lai lah nau mpơl saơ kloh ân nau kan nau ŭch ngăn ngên bah cử tri ndrel ƀon lan hŏ geh djăt ndrel ăp nhoat ƀư ân jêng ngăn bah nau ntrŭnh kơl an, njêng ăp nau kan, ntŭk kan ngăn. Bah nê, rgop nau nsôih hun hao mhe ân nkuăl Tây Nguyên ndrel duyên hải miền Trung./.