Tâm 2 nar kêng dŭt pơh dja (25 n’hanh 26/4) ta Gia Lai ƀư âk nău kan văn hóa săk ntơr êng. Nê lah Nar rgum Văn hóa ăp rnoi nuĭh n’gor Gia Lai lor bôk năp dơi ƀư ta Quảng trường Đại Đoàn Kết, phường Pleiku. Ndrel rnôk nê, ta Ntŭk têl ơm yău kăl e - văn hóa neh dak Plei Ơi, xã Chư A Thai ƀư ôp brah mih bah Yang Pơtao Apui. Aơ mô dơn lah nău kan văn hóa – pâl nđaih êng du ntil, ma nsĭt geh âk nău hôr khlay mpeh săk tơm, nsum mpôl n’hanh hun hao jŏ jong.

Nar wăch rgum Văn hóa ăp rnoi mpôl đê̆ n’gor Gia Lai lor bôk năp dơi ƀư nkhêp nkah ndray 80 năm Nar Wa Hồ njuăl siƀŭt an Đại hội ăp rnoi mpôl đê̆ miền Nam ta Pleiku geh nkô̆ hôr mpư n’hao săk tơm văn hóa ăp rnoi mpôl đê̆, rdâk nâp tay nău tâm rnglăp, n’hanh lah rjăp nău khlay têh jong bah nău mĭn Hồ Chí Minh mpeh tâm ban, tâm rnglăp đah ăp rnoi nuĭh.

Nar ƀư wăch rgum bơi 1.000 bu hăr blău, nghệ sĩ tâm n’hanh bah dih n’gor Gia Lai râng. Tât nar wăch rgum, ăp mpôl hăn nsĭt tât du nău nkoch êng, săk tơm n’hanh nău nkah rnoi nuĭh, bah lễ hội tât ndơ ngêt sa. Yuh Kpă H’Nhung ta ƀon Plei Chuet, phường An Phú mpơl nău: Nar rgum Văn hóa ăp rnoi nuĭh n’gor Gia Lai lor bôk năp lah nău kan mha êng, dơi ƀư nkhêp nkah ndray 80 năm Nar Wa Hồ njuăl siƀŭt an Đại hội ăp rnoi mpôl đê̆ miền Nam ta Pleiku jêng kônh wa dŭt rhơn.

“Râng Nar rgum văn hoá bah n’gor Gia Lai, săk gâp nơm dŭt rhơn nđơr, yor dơi tâm mâp, tâm nđŭr đah băl mpô, ăp bu hăr blău dăch ngai wăch rgum. Năch ăp ntŭk tât uănh mpôl hên ndăch rvăch, chĭng gong tâm lễ hội. Tâm rnăk wâl, ăp yuh nô, me bơ̆ ƀư pâl nđaih da dê jêng ntrŭt nsôr nuih n’hâm gâp râng ăp nău kan bah lễ hội đah nuih n’hâm nđơri, dêh rŏng văn hoá way ơm bah u che he kăl e ntlơi an tay. Rmôt chĭng Plei Chuêt mpôl hên, geh âk rơh kơn, druh ndăm, bu ur, bu klô n’hanh băl mom gĭt blău jêng nuih n’hâm râng lễ hội dŭt rhơn nđơr lĕ nuih n’hâm gay tŭr goh chĭng gong n’hanh ndăch rvăch way ơm bah rnoi Jarai bah mpôl hên”.

Lor bôk năp ntơm bah rnôk n’glăp nsum n’gor Gia Lai mhe, mpôl hăr blău Chăm H’roi ta xã Vân Canh (n’gor Bình Định ơm) tât Pleiku đah rlău 40 nuĭh, râng đah ăp nău kan mpơl tay ntŭk gŭ rêh ƀon lan kăl e, nchreng an uănh nău uĕh blău kơt: tanh tôk, cheh tanh bok brai, tŭr goh chĭng gong, gâr k’toang, mpât mprơ. Tâm rnôk nê, đoàn xã Ya Hội geh rnoh nuĭh blău dŭt âk, đah rlău 60 nuĭh; nkre nchreng an uănh chĭng gong, ndăch rvăch bah ƀon lan Bahnar; nkre nkoch mbơh ăp nău mprơ nhảy sạp, múa khèn, uh n’hôm, ntŭp bler bah ƀon lan Mông.

Ndrel đah bôk nău kan njroh mprơ “Đại ngàn reo” n’hanh măng tâm nđŭr văn hóa ăp rnoi mpôl đê̆ n’gor Gia Lai, ăp đại biểu n’hanh bu hăr blău hôm râng lễ n’hơr an kao, mpoh nhang nkah gĭt Kruanh Hồ Chí Minh, Anh hùng Núp; râng uănh pla n’hơ rup, đah nkô̆ “Wa Hồ đah ăp rnoi mpôl đê̆ Gia Lai”, khâl ntŭk têl ơm yău Ntŭk dơn siƀŭt Hồ njuăl Đại hội ăp rnoi mpôl đê̆ miền Nam năm 1946 đŏng. Wa Rčom H’Yĕo, tă ƀư Kruanh Ủy ban MTTQ Việt Nam n’gor Gia Lai an lah, Nar rgum Văn hóa ăp rnoi mpôl đê̆ n’gor Gia Lai lor bôk năp dơi ƀư di tâm rnôk Giỗ tổ Hùng Vương, Nkah ndray 80 năm Nar Wa Hồ njuăl siƀŭt Đại hội ăp rnoi mpôl đê̆ miền Nam ta Pleiku, hôm du tơ̆ tay đŏng nkah ƀon lan ăp rnoi mpôl đê̆ Tây Nguyên nkah mpeh tu tơm n’hanh n’hao dăng nuih n’hâm tâm rnglăp:

“Wa Hồ lah, neh dak Việt Nam lah ngoăy, rnoi nuĭh Việt Nam lah ngoăy, lĕ rngôch ăp rnoi nuĭh Yuăn, Tày, Mông, Mán, kơp lĕ ma ăp rnoi nuĭh kơt Gia Rai, Bahnar…..lah oh nô du rnăl sa da dê, yor ntoh nsum bah du ndru yău lah kon rồng său tiên. Nuĭh Jarai kuăl “Gâr I bơ̆ Me I gong” deh luh bah du rsân rhiăng tăp, 50 nuĭh jŭt dak lêng lah ăp rnoi nuĭh ta bu dâng, hôm 50 nuĭh kon hao yôk lah ăp rnoi mpôl đê̆ he. Bol nău ngơi êng êng, yơn geh nsum du nău mĭn lah tâm rnglăp. Nê lah nkô̆ nchih bah siƀŭt Wa njuăl an ăp rnoi mpôl đê̆ Tây Nguyên, ŭch rŏng ăp rnoi nuĭh mô kơp geh ndrŏng ach o, ntil rnoi nuĭh lĕ dĭng nuĭh ân dơi nti ren, pah kan jan sa, mât rong ndrôk rpu, sŭr djăr rơ̆ jêng, nău rêh nsan hao n’hanh ăp nuĭh geh nău tâm ban da dê”.

Tâm nar 2

5/4/2026, ta Ntŭk têl ơm yău - văn hóa gưl neh dak Plei Ơi, xã Chư A Thai, n’gor Gia Lai ƀư nău way ôp brah mih bah Yang Pơtao Apui đŏng. Nkre đah nău nkoch mpeh ăp Me ŭnh geh nău dơi “kuăl mih ôp sial” ta nkual Cheo Reo kăl e, nău way dja nsĭt nău huêng khlay bah ƀon lan Jarai. Nău way ƀư ôp brah dơi ƀư ta yôk huêng Chư Tao Yang – ntŭk dơi uănh lah ntŭk gŭ bah ăp huêng brah ŭnh, mpơl nău mpŏng mih lăng prăng uĕh, mbo ba jŭr geh an nuĭh ƀon lan ta ntŭk.

Ndrel đah nău way huêng khlay, rêng kan văn hóa – pâl nđaih âk mpưm dơi way ƀư mbro đŏng, lĕ ma an nchreng uănh chĭng gong, cheh tanh bok brai, tanh tôk, trah mon ndah rup si n’hanh ăp ndơ pâl rlưn way ơm, tâm rlong thể thao way ơm kơt ncho lơng djơng, pănh na, njêng ntŭk rlong uănh pâl khuh n’gôr an nuĭh ƀon lan n’hanh năch pâl nđaih. Yuh K’sor H’ Hoăi – Groi bí thư Đoàn xã Chư A Thai, n’gor Gia Lai an gĭt, tâm ăp nar ƀư ôp brah mih Yang Pơtao Apui, Mpôl druh ndăm nsrôih kơl nchrăp ăp ntil ndơ, kơl mpôih kuaih uĕh jâng gung tung râng mpông mpêr, gung trong ntŭk ƀư lễ hội, kơt lăk uĕh ntŭk ôp brah, mprĭng rĭng uĕh ndeh rklư; râng ndrel mpôl công an, tahen, dân phòng mât njrăng rĭng grep:

“Tâm mông nar ƀư nău way ôp brah mih Yang Pơtao Apui, druh ndăm râng ăp nău kan, gay kônh wa ăp ƀon lan tât râng lễ hội n’hanh tâm nđŭr. Lơn lah, mpôl druh ndăm râng nkoch mbơh ndơ geh ƀư kah khlay ƀon tơm, ndơ tuch tăm n’hanh rhŏ dŏng ăp ndơ sa kah khlay an năch hăn uănh pâl; Nkoch mbơh văn hoá way ơm lễ hội Me ŭnh lah nău rêh nuih n’hâm bah nuĭh Jarai ta xã Chứ A Thai ơm bah jŏ aơ; ma nău njroh mprơ n’hanh du đêt nău kan tâm lễ hội, ntĭt mpơl nău rêh nău kan bah kônh wa tâm nkual neh me ŭnh Chư A Thai, dăn an du năm wăng sa geh âk phe ba n’hanh nău rêh ăp tŏng hơm răm. Ma nar lễ hội, druh ndăm dơi ntĭm nău gĭt mât njrăng êng rnoh khlay way ơm văn hóa bah u che he kăl e ntlơi an tay. Nkơnh n’hơ tay n’hanh nkoch mbơh văn hoá way ơm, nău rêh bah ƀon lan Jarai”.

Nar rgum pâl hŏ mpôch dŭt tay, yơn nău nteh chĭng gong, ndăch rvăch n’hanh săk ntơr ăp rnoi nuĭh nha hôm ring lam, yơn tu tơm wên jong mât nău rêh nuih n’hâm bah ăp ƀon lan. ntơm bah nău nkah kăl e tât nău rêh nar aơ, ăp nău kan mô dơn mpư rnê săk tơm ma hôm mpoh ang nuih n’hâm tâm rnglăp đah ăp rnoi nuĭh oh nô.