​Kêng măng 20/4 ta Hà Nội, Tổng Bí thư, Kruanh dak Tô Lâm tât râng n’hanh ƀư tơm rơh mâp măt ăp nuĭh đại biểu Quốc hội khóa XVI lah nuĭh rnoi mpôl đê̆. Ndrel râng geh Thủ tướng Lê Minh Hưng, Kruanh Quốc hội Trần Thanh Mẫn n’hanh Rnâng kan Ban Bí thư Trần Cẩm Tú. Rơh mâp măt mpơl nău uănh khlay bah Đảng, Ngih dak đah ƀon lan rnoi mpôl đê̆, lah rjăp nău khlay bah rmôt đại biểu Quốc hội lah nuĭh rnoi mpôl đê̆ tâm lam trong kan chính trị. Nkoch bri dêh bên đah ăp đại biểu, Tổng Bí thư, Kruanh dak Tô Lâm lah rjăp, tâm bah ri aơ nău kan bah Quốc hội rlău ăp năm kan dơi rgâl mhe tay tĭng trong rƀŏng ngăn ngăn lơn; pah kan njêng pháp luật dơi n’hao săk tam, groi nđôi nar lơn ma lăp tâm jru, tâm nê rmôt đại biểu Quốc hội lah nuĭh rnoi mpôl đê̆ nar lơn ma năl kloh nău khlay tâm rdâk njêng trong kơl, groi nđôi tĭng ƀư n’hanh buăt nthoi đah quốc hội đah ƀon lan.

Gay tŏng an nău ŭch geh hun hao tâm rơh mhe, Tổng Bí thư, Kruanh dak Tô Lâm dăn đă, rgâl mhe tay nău mĭn mpeh pah kan rnoi mpôl đê̆ n’hanh trong kơl rnoi mpôl đê̆, rgum tơm mô dơn lah ntop kơl, ma ân rgâl dăng tât nta trong dơh gay hun hao, nta trong gay nuĭh ƀon lan nsan hao. Nău ŭch mô dơn n’glĕ ta n’hŭch ach o, ma ân n’hao nău geh wăng sa, rgâl geh nău rêh du trong jŏ jong, ntruch huêt bah tâm ƀah hun hao n’hanh đăp mpăn geh nău tâm ban ngăn ngăn. Tâm rnôk nê, ăp đại biểu Quốc hội lah nuĭh rnoi mpôl đê̆ ân lor nchrăp nkoch lah ăp wăk kol bah tâm dâng, dăn đă ăp trong kơl tâm di lơn đah nău geh ngăn ngăn bah tĭng ntŭk, tĭng rnoi nuĭh. Ăp nău dăn đă ân luh bah ngăn ngăn, nkre đah nău dơi dŏng ngăn n’hanh rƀŏng tât nău dơi tam na nê̆.