Kêng măng 22/4, lôch lễ wơt Gưl ngih dak ta Nhih pah kan kruanh dak, Tổng Bí thư, Kruanh dak Tô Lâm hŏ rgum nchră đah Tổng thống Hàn Quốc Lee Jae Myung tâm rnôk hăn khâl gưl Ngih dak tât Việt Nam. Tâm mông nar dêh bên, ngăn ngăn, bar kruanh rđău kan tâm ôp jru mpeh nô nău bar dak, tâm boh bar ding n’hanh ăp nkô̆ nău tâm nkual, dak bah dih ndrel uănh khlay.

Bar ding lah rjăp nău an ƀư trong uĕh têh jong mpeh tâm nkrêp kan nsum wăng sa tâm nô nău mhe, rƀŏng nsĭt geh tăch rgâl bar ding 150 rmen USD tâm năm 2030; nkre ton nta tay trong dơh tăch rgâl, pơk mpông ntŭk tăch rgâl n’hanh ntop kơl doanh nghiệp Việt Nam râng jru lơn tâm rêng pă an tơm ndơ tăch bah Hàn Quốc. Tổng Bí thư, Kruanh dak Tô Lâm dăn đă bar ding ntrôl dăng tâm boh gŭ mĭn, ndơ̆ rgâl công nghệ, lơn lah an ƀư geh nău dơi ngăn trong nchrăp njêng Viện Khoa học n’hanh Công nghệ Việt Nam - Hàn Quốc (VKIST). Tổng thống Li Che Miêng an gĭt Hàn Quốc mbra tâm pă công nghệ tâm ăp n’gâng kan công nghiệp let năp tay kơt trí tuệ nhân tạo, bán dẫn, ŭnh nar kloh uĕh, ntĭm nti tơm nuĭh kan, rgop ntop kơl rơh têh uĕh mhe neh dak n’hanh hun hao khoa học công nghệ têh mhe bah Việt Nam; dăn đă bar ding n’hao dăng buăt nthoi rgâl blău ƀư mhe, ntơm njêng nău kan đah bar dak.