Ôi ntri, 20/4, ta Jay Quốc hội, Ủy ban Thường vụ Quốc hội hŏ hop an nău rgop mpeh trong nchrăp Luật rgâl nkra, kơi ntop du đêt nkô̆ bah Luật Sŏk soăy nău geh êng nơm, Luật Sŏk soăy kơi ntop n’hao geh tay, Luật Sŏk soăy nău geh doanh nghiệp n’hanh Luật Sŏk soăy tăch ndơ khlay mha êng.

Lôch rnôk djăt ăp nău rgop tâm nchră, lah n’glôch jêh mpeh nău rgop mpeh rgâl nkra kơi ntop du đêt nkô̆ trong nchrăp Luật mpeh sŏk soăy, Groi Kruanh Quốc hội Nguyễn Thị Hồng an lah, Ủy ban Thường vụ Quốc hội bôk năp hŏ tâm ban ŭch nău khlay ra ŭanh tay, rgâl nkra, kơi ntop du đêt nkô̆ bah ăp Luật sŏk soăy: nsĭt geh êng nơm, Nsĭt geh doanh nghiệp, Rnoh khlay ntop n’hanh tay n’hanh Tăch ndơ  khlay mha êng gay jêng ngăn ăp trong nchrăp bah Đảng mpeh rgâl nđĭr uĕh, rgâl ŭnh nar, hun hao wăng sa êng bah dih ngih dak n’hanh nău ŭch rnoh tât hun hao bar mbrô nkre đah đăp mpăn wăng sa têh. Nkre, đăp mpăn trong ntop kơl tâm di đah rnăk tăch rgâl n’hanh doanh nghiệp jê̆ n’hanh dah găp, geh nău tâm ban, ăp kôp bah lam trong kan sŏk soăy, rgop rƀŏng trong rvăt dŏng, ntrŭt nsôr ndơ dŏng kloh uĕh an ntŭk tăch rgâl, n’hŭch đêt n’huk, rƀŏng tât hun hao jŏ jong.