Liên minh HTX Việt Nam mhe ƀư Rgum nchră HTX Gưl neh dak 2026 đah nkô̆ "Buăt nthoi wăng sa tâm boh đah jâng wăng sa êng bah dih ngih dak" ta Hà Nội. Nău buăt nthoi đah jâng wăng sa êng bah dih ngih dak dơi uănh lah trong nkra khlay gay ƀư hợp tác xã n’hao nău dơi tâm rlong, bên di ngăch đah tâm n’guăk ntŭk tăch rgâl tĭng kơn jêng ăp rêng rnoh khlay jŏ jong n’hao nău geh an nuĭh ƀon lan dak he.

 Bah năp mpet jâk mpeh prăk dŏng ntuh kơl tă bah tơm ndơ hao khlay, trôk nar nuh srê lơh tât krit nji n’hanh săk geh ndơ nar lơn ma âk, HTX Vĩnh Cường ta xã Vĩnh Mỹ (n’gor Cà Mau) hŏ rgum ntrŭt ntrôl nău râng rêng tâm rgop kan nsum tuch tăm- tăch phe tĭng Đề án 1 rkeh ha ba săk kah, n’gluh n’huk đêt nkual ĐBSCL. Aƀaơ, rnoh âk têh hvi nău kan tuch tăm bah HTX Vĩnh Cường lah rlău 10.000 ha, tâm nê nklăp 5.000 ha tâm nkrêp kan nsum tĭng rnoh kah uĕh âk. Ntŭk mha êng tâm rêng kan tâm nkrêp kan nsum lah geh nău tât râng bah doanh nghiệp ntơm bah bôk năp. Nău kơl an ntil, ntĭm nti kỹ thuật mât chăm, uănh năl kah uĕh tât rgum rvăt ndơ tuch tăm dơi tĭng ƀư tâm ton kloh rvah.

Wa Trịnh Văn Cường – Giám đốc HTX Vĩnh Cường an gĭt, nsĭt geh bah rêng tâm nkrêp kan nsum mô dơn mpơl ta rnoh nsĭt geh hao ma hôm ta nău rgâl nău mĭn tuch tăm bah nuĭh ƀon lan. Ntơm bah ntŭk nchuăt tĭng rnoh âk, ăp nuĭh lăp kan HTX rgâl jêng uănh khlay săk kah, ƀoi tơm luh n’hanh đăp mpăn kloh uĕh ndơ ngêt sa. Wa Trịnh Văn Cường an gĭt:

HTX mô dơi mât dŏng tĭng trong ơm, mô kloh rvah, mô tâm pă kan n’hanh ŭch râng tâm lam jâng wăng sa êng bah dih ngih dak, HTX ân geh nuĭh way blău mât bôk kan, geh trong nchrăp tăch rgâl, geh mât uănh prăk kaih, geh trong nchrăp ntŭk tăch rgâl way blău ƀư, dơn nsing nơm HTX jêng du mpôl kan wăng sa ngăn lor nchrăp râng tâm ntêng lêng kan, rêng rnoh khlay.   

Jâng wăng sa Việt Nam dôl rgâl tĭng trong rƀŏng nđĭr uĕh, wăch jêng  tay n’hanh keh mbrô, yor kơt nê̆ nkual wăng sa mpôl, hợp tác xã dâk ta năp ân rgâl mhe lam lĕ rngôch mpeh nău mĭn leo ƀư tuch tăm. Nău buăt nthoi đah lam trong kan wăng sa êng bah dih ngih dak dơi uănh lah trong nkra khlay gay leo ƀư hợp tác xã n’hao nău dơi tâm rlong, bên di ngăch đah tâm n’guăk ntŭk tăch rgâl.

Tĭng wa Nguyễn Thị Hoàng Yến – Groi Cục trưởng Cục Wăng sa tâm boh n’hanh hun hao ƀon lan (Bộ Nông nghiệp & Môi trường), âk HTX geh nău kan tuch tăm ƀư njêng hôm huêt jê̆, mô tŏng nău dơi nkret njêng n’hanh nău dơi rđah tât ntŭk tăch rgâl hôm mpăng đêt. Nău dja ƀư ndơ tuch tăm tŭp tâm nău “jŭr geh play rnoh khlay thuk”, tuch tăm mô geh trong rƀŏng jŏ jong. Tâm rnôk nê, nkual wăng sa êng bah dih ngih dak hôm dơh geh mpeh tơm prăk, công nghệ, trong tâm pă tăch n’hanh nău dơi tât đah ntŭk tăch rgâl tâm dak n’hanh dak bah dih. Nău ntrôl dăng buăt nthoi tâm nkrêp kan nsum ƀư HTX đah jâng wăng sa bah dih ngih dak mbra tĭng kơn jêng ăp rêng rnoh khlay jŏ jong. Wa Nguyễn Thị Hoàng Yến ntĭt leo:

 Lah tuch tăm rgâl jêng têh hvi, nđĭr uĕh nâp dăng n’hanh tĭng jăp ăp rnoh di ri ân ƀoi tơm luh gay n’hao nău kloh rvah, n’hanh mpôl hên saơ lah kơt doanh nghiệp ntuh kơl tơm prăk, công nghệ n’hanh mât uănh HTX mbra leo ƀư tuch tăm mât uănh rnoh kah uĕh ân jăp. N’hanh lah ƀư dơi ndrel 2 ntil nău kan ri he saơ dơi nău nsĭt geh bah doanh nghiệp, HTX n’hanh nuĭh ƀon lan kan lŏ mir rgâl bah tâm nkrêp kan nsum jê̆ chrai êng tât jêng dĭ hvi uĕh.

Gay trong ntĭt leo tâm nkrêp kan nsum HTX đah jâng wăng sa êng bah dih ngih dak hun hao jŏ jong ri tơm prăk kaih lah ngoăy tâm ăp nău khlay n’gâng tơm. Ngăn an saơ, âk HTX nha hôm mâp âk jêr jŏt tâm nău tât đah tơm prăk mô geh drăp ndơ ma sơm manh, nău dơi mât tơm prăk hôm mpăng đêt. Nău dja ƀư mpôl kan hợp tác xã jêr ntuh kơl máy móc, công nghệ mô lah pơk hvi nkual tăm. Rnôk mpôl HTX râng rêng tâm nkrêp kan nsum đah doanh nghiệp, rmoh rman an manh tơm prăk hŭch đêt nơm geh tâm ton rvăt n’hanh n’hong tơm prăk đăp mpăn.

Wa Cao Xuân Thu Vân – Kruanh Liên minh HTX Việt Nam an lah, hun hao rêng kan tâm nkrêp kan nsum lah nău ŭch geh jăch ndăn gay rdâk njêng trong leo wăng sa mpôl jŏ jong. Rêng tâm nkrêp kan nsum mbra njêng jâng ntrŭt ntrôl rgâl mbrô tâm nkual wăng sa mpôl, hợp tác xã. Nău dja kơl n’hao nău dơi kloh rvah, way blău kan n’hanh wăch rgum rơh nuĭh kan mom râng pah kan tâm nkual wăng sa tâm boh. Yor kơt nê̆, buăt nthoi hợp tác xã đah jâng wăng sa êng bah dih ngih dak mô dơn lah trong rƀŏng, ma hôm lah nău ŭch geh khlay gay n’hao nău dơi tâm rlong bah ndơ tuch tăm Việt Nam tâm rêng pă lam ndơ tăch lam ntŭr neh. Wa Cao Xuân Thu Vân lah rjăp:

 “Tâm trong tâm boh ma he dăn nău tâm rŏng bah nuĭh êng ri dŭt jêr ngăn, ma ân geh nău sŏng dăng, ŭch sŏng dăng ri ân ƀư njêng tĭng di rnoh uĕh. Bar lah ƀoi tơm luh ân ăp tŏng doanh nghiệp ntop kơl HTX. N’hanh rnôk tŏng têh dăng hôm ri HTX  mbra geh nuĭh lăp kan nsum n’hao têh blău Hội đồng mât bôk kan n’hanh ntuh kơl êng bah dŭng prăk he nơm”

Đah ăp rgâl mhe mpeh trong tĭng, trong kơl bah Chính phủ tâm rơh hun hao mhe, mpôl kan wăng sa mpôl, hợp tác xã mô hôm lah nkual “mô lăng dăng”, ma mbra jêng du “kô̆ măt nthoi” khlay tâm jâng wăng sa êng bah dih ngih dak. Rnôk “kô̆ măt nthoi” HTX dơi ntop kơl di rnoh mbra jêng suan ntrôl khlay ntrŭt ntrôl rêng rnoh khlay tuch tăm Việt Nam hun hao jŏ jong, ntơm bah nê rgop rgâl geh nău rêh, n’hao âk geh wăng sa an nuĭh ƀon lan dak he.