Tâm rnôk prăk rdêng n’hanh ndơ luh bôk năp hao, Công ty Yến sào Khánh Hòa hôm e mât hao jêng uĕh. 3 khay năm 2026, dĭng lĕ geh rgum nsum bah doanh nghiệp geh nklăp 1.040 rmen prăk, hao 19% nkôp đah rơh aơ năm bah năp, lôch jêh rlău 30% trong nchrăp geh dĭng lĕ năm. Tĭng wa Trịnh Thị Hồng Vân, Kruanh Hội đồng thành viên Công ty Yến sào Khánh Hòa, doanh nghiệp ntrôl dăng ntrŭt ngăch tăch rgâl, pơk hvi ntŭk tăch dak bah dih, lơn lah ntŭk tăch Trung Quốc. Nkre, công ty mbơh ƀư âk trong mkra n’hŭch prăk dŏng gay mât đăp mpăn rnoh tăch, đăp mpăn soan tâm rlong bah ndơ.

Ăp ntŭk tăch jêr nuih kơt Mỹ, Úc, Canada geh tâm di âk, yơn lah đă joi tu tơm bah ntŭk tăch Trung Quốc hôm e rjăp lơn, bah nău joi, nkret njêng tât tăch n’gluh n’hanh tâm pă. Yor rĭ, doanh nghiệp dôl tâm rgop đah ăp nuĭh n’hanh tập đoàn têh ta Trung Quốc gay pơk hvi ntŭk tăch n’hanh hun hao moh êng Yến sào Khánh Hòa.

Tâm ban đah nău nsrôih bah doanh nghiệp, bôk nău kan ntrŭt ngăch ntuh kơl năm 2026 bah n’gor Khánh Hòa rgum wăch tơm prăk dak bah dih an ăp ntil nău khlay kơt công nghiệp, ŭnh nar, pâl nđaih-nău rhŏ n’hanh nkual têh-ndâk njêng Nău rƀŏng tâm năm aơ lah wăch rgum đêt ngăn 2 nău nchrăp ƀư FDI geh dĭng lĕ prăk ntuh kơl bah 100 rkeh đôlar let lơ. Wa Trần Minh Chiến, Kruanh Ban mât uănh Nkual wăng sa n’hanh ăp nkual công nghiệp n’gor Khánh Hòa an gĭt, trong kan ntrŭt ngăch ntuh kơl dơi ntŭk kan năl lah ăp nuĭh kan ndrel na nê̆, boăt nthoi đah ăp ngih pah kan tâm rnglăp bah dih n’hanh rmôt kan lam ntŭr neh gay nkoch dơi geh ntuh kơl ta ntŭk.

Rnôk ăp nuĭh ntuh kơl dak bah dih geh nău ŭch mĭn joi, way khân pơng râng ôp đại sứ quán bah dak nơm lor. Yor rĭ, lah he pă an tŏng ăp nău mbơh an ăp đại sứ quán ri dŭt dơh. Tă bah nău tâm boh aơ, ăp đại sứ quán dơi nkoch n’hanh ntop kơl boăt nthoi nuĭh ntuh kơl. Mpôl hên mbra na nê̆ wơt ăp nuĭh ntuh kơl he ŭch ntuh kơl, jă khân pơng lăp uănh nsong, hăn uănh lah.

Bah meng wăch rgum ntuh kơl, Khánh Hòa ntrôl dăng ntrŭt ngăch tăch rgâl, ntop kơl doanh nghiệp pơk hvi ntŭk tăch n’gluh. Du trong hăn mhe lah joi ntŭk tăch Halal, ntŭk tăch đah rlău 2 rmen nŭih dŏng ta lam ntŭr neh. Ăp doanh nghiệp ta ntŭk ntop kơl lôch jêh trong kơp dơn Halal, n’hao tâm di uĕh ndơ n’hanh pơk hvi tăch n’gluh ăp ntil ndơ geh âk.

Tâm ntil nău pâl nđaih, Khánh Hòa ntrôl ngăch ta ăp ntŭk tăch khlay kơt Hàn Quốc, Ấn Độ n’hanh Nga; nkre ƀư ăp mpôl famtrip bah doanh nghiệp lữ hành lam ntŭr neh tât uănh ntŭk tât n’hanh ndơ pâl nđaih. Tĭng wa Trương Văn Tiến, Giám đốc Ntŭk ntrŭt ngăch Ntuh kơl, Tăch rgâl n’hanh Pâl nđaih n’gor Khánh Hòa, ăp nău ƀư ntrŭt ngăch mbra rgop pơk hvi ntŭk tăch năch dak bah dih, nkre ntrôl dŏng n’hanh tăch n’gluh ta ntŭk tă bah pâl nđaih.

âm rnôk aƀaơ hin, mpôl hên ntrôl tăch tâm dak, nkre pơk hvi ta ăp ntŭk tăch ma lĕ ký ton kan ndrel, lơn lah ăp nkual đêt geh khuch yor rgâl bah dih. Tă bah ăp nău ƀư ntrôl ngăch n’hanh boăt nthoi, pâl nđaih mbra rgop ntrôl dŏng n’hanh tăch n’gluh ta ntŭk.

Tĭng Nguyễn Việt Hùng, Kruanh UBND n’gor Khánh Hòa trong kan ntrŭnh ntuh kơl bah n’gor dôl rgâl bah trong ƀư nkân rgâl an nchrăp lor joi ăp nuĭh ntuh kơl têh, tĭng tâm nău geh mpeh wăng sa dak lêng, ndrâm dak lêng n’hanh logistics:

Khánh Hòa geh âk nău geh, lơn lah mpeh ndrâm dak lêng n’hanh logistics. Khay tât, ndâk ƀư trong kan têh wăch rgum ăp nuĭh ntuh kơl têh lam ntŭr neh lăp ntuh kơl. Rnôk ăp nuĭh ntuh kơl an n’gor, trong sinh thái doanh nghiệp bah khân pơng mbra jêng, rgop bêng ăp nkual doanh nghiệp.

Đah trong nchrŏng ntrôl dăng tâm rnglăp bah dih rhŏ an hun hao tĭng nuih n’hâm Nghị quyết 59-bah Bộ chính trị, ndrel trong ƀư nar lơ nchrăp lor n’hanh di ntrŭt ngăch ntuh kơl, tăch rgâl n’hanh pâl nđaih, Khánh Hòa dôl ntơm pơk hvi ntŭk tăch n’gluh, wăch rgum tay tơm prăk lam ntŭr neh, geh n’gâng tơm gay n’gor hun hao dăng wăng sa dak lêng n’hanh nău rhŏ tâm nkual Nam Trung Bộ.