Quý I năm 2026, n’gor Quảng Ngãi tât rnoh hun hao GRDP 8,24%. Gay hun hao tât 2 mbrô tâm năm 2026, n’gor Quảng Ngãi rgum droh rklai ăp kô̆ yơn kol khan mpeh ntuh kơl, prăk dŏng ntuh kơl tâm ntŭk tăch rgâl.

Công ty cổ phần Thép Hòa Phát Dung Quất lah ngoăy tâm ăp doanh nghiệp têh, dŏng âk nuĭh kan n’hanh rgop khlay tâm nău hun hao công nghiệp bah n’gor Quảng Ngãi. Aƀaơ Công ty geh 3 trong nchrăp dôl kan ta n’gor Quảng Ngãi, lah: Nkual rgum nkret njêng gang thép Hòa Phát Dung Quất 1; Nkual rgum nkret njêng gang thép Hòa Phát Dung Quất 2; Trong nchrăp ndrâm dak lêng dŏng rgum container Hòa Phát Dung Quất dôl tĭng kơn ƀư lôch jêh.

Wa Hoàng Ngọc Phượng, Groi Giám đốc Công ty cổ phần Thép Hòa Phát Dung Quất an gĭt, quý I năm aơ, rnoh âk loih rdâk njêng bah ntŭk ƀư njêng geh 692.000 tấn. Doanh nghiệp dôl n’hao âk tay tâm quý II, rgop ntrŭt ntrôl hun hao công nghiệp bah n’gor:

“Nhih pah kan uănh khlay rgum ƀư njêng, tăch rgâl ngăch ngăr n’hanh n’hao mât dŏng prăk kan; uănh khlay ntuh kơl máy móc, ndơ ntrŭp, dŏng khoa học, công nghệ, rgâl mbrô, n’hao nâp uĕh ndơ geh ƀư, rƀŏng tât ăp ntil ndơ geh ƀư mhe, ndơ geh ƀư kloh uĕh, nđik aih an ntŭk gŭ rêh n’hanh tŏng di rnoh kơp dơn dak bah dih. Công ty rplăch ngăch tâm ƀư njêng, tăch n’gluh, ntrôl dăng nău kan ƀư njêng nkre đah rdâk njêng săk ntơ lư ndơ geh ƀư đŏng”.

Quý I năm 2026, hun hao GRDP bah n’gor Quảng Ngãi geh 8,24%. Nkual công nghiệp mât tay nău khlay kan “dâk leo lor”, rgop rlău n’gul rnoh hun hao nsum; n’gâng kan nkret njêng, ntrŭp nkra mât rnoh hun hao bar mbrô. Nkual rhŏ dŏng dâk hao tay kloh, lĕ rngôch rnoh geh tăch chrai ndơ n’hanh nsĭt geh rhŏ dŏng hao rlău 15%; pâl nđaih săk ntơr; tăch n’gluh mât rnoh hun hao bar mbrô. Aơ lah ăp nău mpơl uĕh, njêng jâng nsing gay n’gor an ƀư tay ăp trong nkra hun hao ngăch tâm let năp tay.

Bol ma kơt nê̆, rnoh hun hao wăng sa mô hŏ tâm ban. Du đêt n’gâng kan kơt lôk joi loih kông, jep ntô jot hŭch; nsĭt geh ngân sách hŭch rđĭl đah ndrel khay dja năm e nơh. Dŭt njrăng uănh khlay, n’gluh tơm prăk ntuh kơl hôm mbrơi, mhe geh rlău 7% trong nchrăp, lah kô̆ yơn kol khan dŭt têh ân droh rklaih.

Nkual tuch tăm mât rong, si gle, tui ka dơn hao nklăp 3% dơm tă bah prăk dŏng kan bôk năp hao khlay bah khay 3, têk nkre ndơ prăk rvăt ndơ dŏng kan, nchuăn rdeng hao, nuĭh ƀon lan hŭch ntuh kơl ƀư njêng. Trong kan si gle geh tât khuch bah rơh rlu Tết ntoch jong; lơh joi tui ka mâp âk jêr  jŏt tă bah rnoh khlay pring hao. Ta nkual công nghiệp – rdâk njêng, công nghiệp hao 12,76%, lơn âk nơm geh ăp ndơ ƀư tơm khlay kơt pring kât n’hanh loih. Wa Võ Thành Nhân, Kruanh nchih rgum n’gor Quảng Ngãi an lah:

“Rdâk njêng aƀaơ âk 4,9% tâm dăp rgum wăng sa; rdâk njêng hŭch 8,8% hŏ têk nkre rnoh ngăch hun hao GRDP lam n’gor hŭch. Ndrĭ, bol mô âk, yơn rnoh hŭch bah trong kan dja nha hôm ring tam âk tât hun hao nsum đŏng”.

Ntuh kơl dơi ntrŏng tay lah suan ntrôl khlay ntrŭt ntrôl hun hao năm 2026. Yơn lah, rnoh ngăch n’gluh tơm prăk hôm đêt, tât kêng dŭt quý I mhe geh nklăp 7,2% trong nchrăp. N’gor Quảng Ngãi dôl rđău đă droh rklaih ăp wăk kol gay ntrôl ngăch rnoh n’gluh tơm prăk.

Tĭng wa Nguyễn Công Hoàng, Groi kruanh UBND n’gor Quảng Ngãi, rnoh ngăch n’gluh tơm prăk ntuh kơl bah n’gor hôm mbrơi tă bah âk nkô̆. Ta gưl xã, âk ntŭk mô hŏ lor nchrăp tĭng ƀư, sơch trong nchrăp kan mhe rgâl ma ndăn dŏng ndơ hŏ geh hồ sơ, jêng tât mbrơi n’gluh tơm prăk. Ta gưl n’gor, wăk kol hôm lah pah kan trok tâm, đă ntrơn du đŏng, ntrŏng năl rnoh khaly neh n’hanh nău rnam, klach tih. Wa Nguyễn Công Hoàng đă ăp n’gâng kan, ăp xã droh rklaih ăp wăk kol kô̆ yơn, lơn lah tâm trong kan neh ntu n’hanh mât tơm prăk, gay ntrôl ngăch ăp trong nchrăp kan:

“Đah pah kan mât bôk kan prăk kaih, Sở Tài chính n’gor Quảng Ngãi ân lor nchrăp, ngăch rplăch tâm pă n’hanh mât tơm prăk. Ngăn an saơ dôl nchiăng khan nău geh ntŭk ƀư geh rnoh kan âk yơn mô tŏng tơm prăk gay n’gluh, tâm rnôk du đêt tơm prăk hôm mô hŏ dơi  dŏng. Nău mât bôk ân dơi ra uănh tay lam lĕ rngôch, lơn lah tâm rnôk tơm sŏk geh bah prăk dŏng neh mô hŏ tât trong nchrăp. Nkre, ân mât kân lhăt nău dŏng tơm prăk kơi ntop sŏk geh tay, der bah rsŭn nău mpŏng tâm du tơm geh ngăn, rŭ hôch geh ma nău roh tâm rlak geh tâm ban tơm prăk ngân sách”./.