Nthoi tay ăp nău kan tâm rnôk hăn khâl gưl Ngih dak tât Trung Quốc, nŭng nar (15/4) tĭng mông ta ntŭk, Tổng Bí thư, Kruanh dak Tô Lâm n’hanh Tổng Bí thư, Kruanh dak Tập Cận Bình tât râng n’hanh lah ta rơh mâp druh ndăm Trung Quốc – Việt Nam râng Bôk nău kan “Njăr trong gŭr gŭ mĭn kơt nti.”

Lah ta nar ƀư, Tổng Bí thư, Kruanh dak Tập Cận Bình nkoch đah aƀaơ 1 năm ndrel Tổng Bí thư, Kruanh dak Tô Lâm mbơh ntơm rdâk ƀư Njăr trong gŭr gŭ mĭn, kơt nti, tât aƀaơ druh ndăm 2 dak hŏ geh âk rơh tâm kơt nti nsum, tâm dêh rŏng nsum. Păng ŭch rŏng, đah nău nđơr n’hanh suan mom, druh ndăm 2 dak tâm rnglăp tay, mbăk anh nău dơn kan geh âk nău rgop lơn đŏng tâm rnôk 2 dak Trung Quốc n’hanh Việt Nam nsum ti hao tât trong têh uĕh mhe, ndrel rdâk tay ăp trong leo ƀư dăng mpeh rgâl blău ƀư mhe, pơk mpông tâm boh ndrel geh nău dơi. Mpeh bah nơm, Tổng Bí thư, Kruanh dak Tô Lâm an lah, druh ndăm, băl mom 2 dak mbra dơi n’hao êng săk da dê n’hanh uănh khlay tâm boh “nkre lah ndrăng băl, nkre lah oh nô" đah bar Đảng n’hanh Ƀon lan bar dak Việt Nam – Trung Quốc tă bah Kruanh Hồ Chí Minh n’hanh Kruanh Mao Trạch Đông ndrel ăp rơh kơn cách mạng bar dak âk suan rhal năm khay bun dăp. Păng ŭch rŏng rơh kơn druh ndăm bar dak ân rdâk njêng han săk chính trị nâp dăng, nău mĭn di; n’hao dăng kơt nti, ntik n’hao nuih n’hâm rgâl blău mhe, ƀư tơm khoa học - công nghệ, mpư n’hao nuih n’hâm dâk chŏl lor, rgop di an nău hun hao bah bar dak n’hanh tâm boh tâm rnglăp bar dak Việt Nam – Trung Quốc.

Tâm nŭng nar 15/4, Tổng Bí thư, Kruanh dak Tô Lâm n’hanh Tổng Bí thư, Kruanh dak Trung Quốc Tập Cận Bình hŏ uănh saơ Lễ ký ăp siƀŭt tâm boh ntoh lư đah ăp n’gâng kan, ăp n’gor bar dak.