Lôch tĭng ƀư n’gâng kan bar gưl, rnoh nău kan âk ta gưl xã hao âk tơ̆. Bah năp nău mpet jâk nê, rmôt cán bộ tâm dâng ta mpeh yôk yang n’gor Quảng Ngãi hŏ lor nchrăp dăp rgum nău kan, nkre dơn âk nău kan, nsrôih “mbăk anh kan” gay đăp mpăn nău kan mbluh soih n’hanh rhŏ dŏng nuĭh ƀon lan. Nău dăch dêh ƀon lan, grêt tĭng ƀon lan kơl cán bộ ngăch rƀah gĭt, nkra ăp nkô̆ nău ntoh luh bah tâm dâng đŏng.

Ta xã Măng Đen, rnoh nău kan hao âk lôch rnôk an ƀư n’gâng kan bar gưl, lơn lah tâm rnôk pâl nđaih hun hao ngăch. Xã dơi njêng bah nău n’glăp dơn ngoăy 3 xã Đăk Tăng, Măng Cành n’hanh thị trấn Măng Đen (nkuâl Kon Plông, n’gor Kon Tum ơm), geh rnoh hvi bơi 40 rbăn héc ta, rlău 9 rbăn ƀon lan, tâm nê bơi 80% lah ƀon lan rnoi mpôl đê̆.

Ntŭk dĭ hvi, ƀon lan srang ngai jêng pah kan mât tơm prăk hŏ jêr, aƀaơ hôm lơn ma jâk r’ah tay đŏng rnôk âk nău dơn kan rsŭn sĭt xã. Wa Nguyễn Thị Thùy Trang, du hê nuĭh tơm jay an manh gŭ bĭch Măng Đen an lah, bol ndơ dŏng công nghệ thông tin mô hŏ ăp kôp yơn lơn âk dơi nkra ƀư di nar ton đŏng.

“Gâp nklân năl dơi lah ăp kruanh rđău kan, yuh nô cán bộ n’gâng kan ta ntŭk dŭt gĭt djăt nău, dăn nău rgop n’hanh way rong mông nar an doanh nghiệp. Ntĭt kơt mâp măt gay mpơl saơ tay năm mhe aơ nơh hŏ moh ndơ ƀư dơi? N’gâng kan ta ntŭk djăt ăp nău rgop bah ăp doanh nghiệp gay n’gâng kan ta ntŭk geh ndơ ma rgâl an tâm di đŏng, tâm ban kơt gay hun hao uĕh lơn đah pâl nđaih Măng Đen”.

Ta xã Kon Plông, mpet jâk nău kan lôch n’glăp nsum mpơl kloh đŏng. Xã dơi njêng nsing ta nău n’glăp dơn ngoăy 3 xã Ngọk Tem, Hiếu n’hanh Pờ Ê, geh rnoh hvi bơi 56 rbăn héc ta, rnoh âk 9.500 nuĭh, tâm nê ƀon lan rnoi mpôl âk tât 95%, geh thôn ngai đah nklang xã rlău 60 km.

Nô Trần Nguyễn Hữu Nghĩa, nuĭh way mât kan mpeh văn hóa – rêh jêng Kon Plông aƀaơ dơn mât ndrel du tơ̆ 5 ntil nău kan: văn hóa, thể thao, pâl nđaih, rnăk wâl n’hanh dak si. Lôch n’glăp nsum, rgum nău lư bah 3 xã hŏ dơi n’glăp nsum ƀư nău mât bôk kan jêr lơn, tâm rnôk ntŭk têh hvi cán bộ ân way hăn grêt dăch tâm dâng dơm.

Tâm 5 trong mât kan, mpeh dak si lah nău dŭt jêr tă bah mô way blău kan jru, jêng nô Nghĩa ân way hăn tâm ôp đah ăp kruanh  nhih dak si xã gay rƀah gĭt nô nău, nsŏng kơl năn ngăch đah kruanh rđău kan ta ntŭk. Nô Trần Nguyễn Hữu Nghĩa lor nchrăp nchih nar pah kan ăp pơh, tâm pă mông nar tâm di đah nar pah kan ta nhih pah kan n’hanh jŭr hăn tâm dâng.

“Gâp tâm pă mông nar an tâm ban, tâm di. Nar bar n’hanh nar 5 ăp pơh, gâp hŏ hăn ngăn ta ăp thôn. Nău dơh bah gâp lah gĭt nău ngơi ƀon tơm ta ntŭk jêng dơh tâm ôp. Glêh tam nuĭh kan yơn rnoh cán bộ đêt tă bah ntŭk mât kan hvi ir. Cán bộ xã tâm ôp nău gĭt blău, grêt dăch tâm dâng gay năn rƀah gĭt nô nău mbơh an kruanh rđău kan n’hanh geh trong rƀŏng rđău đă”.

Ngăn an saơ, nău mha êng nkual ƀon lan rnoi mpôl đê̆ n’gluh nău ŭch dơi âk lơn đah cán bộ tâm dâng. Nău wât dơi nău way ơm, nău ngơi kơl pah kan nkoch trêng, rgŏ jă geh nău tam lơn. Tâm bah ri aơ nơh, UBND xã Kon Plông ntrôl âk dŏng công nghệ thông tin, rgâl mbrô tâm mât bôk kan. Rnoh âk hồ sơ nkra ƀư bah ngai geh rlău 96%, lĕ rngôch hồ sơ dơi ƀư keh mbrô ntơm bah bôk năp. Ntŭk rgum rhŏ dŏng ƀư siƀŭt gưl xã dơi ƀư ngăch ngăr, nkre ntik n’hao nău khlay kan bah 25 rmôt công nghệ mbrô nsum mpôl ta ăp thôn, kơl nkra âk nkô̆ nău ntơm bah tâm dâng.

Ndrel đah nê, n’gâng kan ta ntŭk uănh khlay mât ndray văn hóa nkre đah hun hao pâl nđaih. Ntŭk gŭ rêh văn hóa Xơ Đăng dôl dơi rdâk tay, rƀŏng tât nkre mât ndray săk tơm, nkre njêng luh ndơ pâl nđaih ntĭt êng, njêng nău tâm ban ŭch âk tâm ƀon lan n’hanh ntop kơl n’gâng kan ta ntŭk tâm rnôk an ƀư trong kơl.

Wa Đặng Đình Toán, Groi kruanh UBND xã Kon Plông, n’gor Quảng Ngãi an gĭt, rnoh nău kan aƀaơ hao âk rlău bar tơ̆, mô dơn nê geh rnôk 3 tơ̆ rđĭl đah ntơm nơh đŏng, cán bộ tâm dâng ân lor nchrăp bên gay wat jêh nău kan.

“Oh nô tâm nhih pah kan geh nău tâm kơl nsum, geh kơt nê mơ wat jêh nău kan. Gưl xã dăch ƀon lan n’hanh grêt dêh ƀon lan jêng bah cán bộ, công chức, viên chức an tât nuĭh kan ri mpôl hên ân dăch dêh ƀon lan lơn, grêt dăch đah ƀon lan lơn n’hanh djăt ƀon lan lơn ma ăp nău kan na nê̆. Lơn lah ân jŭr na nê̆ tât tâm dâng lơn ri he mơ rƀah gĭt ăp nău lư nkô̆ pah kan tâm dâng”.

Lam n’gor Quảng Ngãi aƀaơ geh 96 nhih pah kan gưl xã. Tâm nău nuĭh kan glêh tam, rmôt cán bộ tâm dâng hŏ lor nchrăp bên, tĭng kơn “mbăk anh kan” gay đăp mpăn nău kan mbluh soih. Bol mpet jâk têh, âk cán bộ mpeh yôk yang nha hôm ngăch dăp rgum nău kan đŏng, an nkra lor ăp nkô̆ nău jăch ndăn bah nuĭh ƀon lan.

Wa Hồ Văn Niên, Bí thư Tỉnh ủy Quảng Ngãi dăn đă, ân n’hao dăng tâm pă gưl, tâm pă nău dơi kan nkre đah tâm pă tơm ndơ; koh hŭch glêh siƀŭt; n’hao nău dơi tam kan bah n’gâng kan bar gưl; rgâl uĕh ntŭk ntuh kơl, tăch rgâl.

“Ăp gưl ủy, đơn vị, n’gâng kan ta ntŭk, n’gâng kan gưl n’gor rgum ngăn ngăn n’hanh rđău đă an ƀư geh nău tam Nghị quyết bah Tỉnh ủy mpeh n’hao săk tam pah kan cán bộ tŏng an nău ŭch geh tâm nô nău mhe. Rđău đă mât bôk kan n’gâng kan 2 gưl đăp mpăn mbluh soih, ăp kôp, geh nău tam, tŏng an nău ŭch geh nău dơn kan tâm nô nău mhe./.