Năm 2025 mhe aơ, rnoh geh rhŏ dŏng ƀon lan n’hanh doanh nghiệp bah n’gor Gia Lai geh 96,63 điểm, dâk tâl 2 lam dak, mpeh rmôt ăp n’gor săk geh rhŏ dŏng ngăch prăl. Rgop tâm nău dơi nê, geh ăp nău rgop kloh bah n’gâng kan tâm dâng, ntŭk cán bộ dôl rhŏ dŏng kônh wa ăp rnoi mpôl đê̆ ma lĕ nuih n’hâm n’hanh dơn kan đah nsum mpôl. Nchih nkoch ngăn geh ta Ntŭk rgum rhŏ dŏng nsum xã Đắk Đoa, n’gor Gia Lai, ntŭk geh rlău 38% rnoh âk nuĭh rnoi mpôl đê̆. Jă kônh wa n’hanh băl mpôl djăt ndrel.

Mhe bah ôi, ntŭk rhŏ dŏng ƀư siƀŭt xã Đắk Đoa hŏ dŭt âk nuĭh hôm. Ntŭk kan mhe rdâk njêng, têh hvi, têh uĕh, geh tŏng nsưng gay ăp nuĭh gŭ kâp tât săk he. Bah năp mpông lah kiosk gay nuĭh ƀon lan pet mbrô kâp tât, pơk uănh nău lư n’hanh nchih mbơh ta ntŭk pơk uănh nsum. Mhe ƀư lôch jêh siƀŭt manh prăk ngân hàng chính sách gay năn mât chăm cà phê năm mhe, che Ayó, ƀon Piơm, rhơn an gĭt:

–Lôch rnôk n’glăp  xã mhe gay ƀư siƀŭt dơh ngăch, lor bôk năp lah kônh wa he ân nchrăp ăp tŏng siƀŭt. Săk gâp nơm rnôk hăn manh prăk khân păng ƀư siƀŭt moh nar ton mplơ̆ di nar nê. Nău khlay lah he ân nchrăp ăp tŏng siƀŭt lor, kơt nê̆ mbra mô mâp jêr jŏt ân sơch mbrô kâp tât lôch nê kâp tât leh săk he ƀư. Mpeh ăp siƀŭt êng ri gâp mô gĭt yơn manh tơm prăk dja gâp hŏ ƀư n’hanh saơ dơh soih.

Nô Sun, ta ƀon Groi 1, mhe dơn geh siƀŭt an kon hăn nti nău kan, nkoch: jay nô bah năp Ủy ban xã Gla (ơm). Ntơm bah xã n’glăp jêng xã Đăk Đoa, trong jong lơn lah siƀŭt ri glêh tay: 

“Ntơm nơh nhih pah kan xã dăch kêng jay gâp yơn nău ƀư siƀŭt aơ ri mbrơi, jêr jŏt lơn. Hôm aƀaơ nhih pah kan xã ngai lơn, yơn ƀư siƀŭt ri dơh ngăch lơn. Hăn tât ntŭk ri nuĭh kan ntĭm nti na nê̆ tât rnôk ƀư lôch jêh siƀŭt, lôch nê tât nar ton mplơ̆ lôch jêh. Uănh nsum ngăch n’hanh dơh.

Uănh năl mpeh nău tĭng ƀư siƀŭt, wa Bônh, Kruanh thôn ƀon Piơm, xã Đắk Đoa, nkoch:

Tĭng gâp saơ, bôk năp rnôk 3 xã n’glăp nsum jêng ngoăy, âk nuĭh ƀon lan hăn tât ƀư siƀŭt, máy móc ndơ dŏng mô hŏ tâm di jêng ƀư siƀŭt hôm mbrơi, nuĭh ƀon lan geh nău rgop aơ to. Yơn lôch nê 3 khay ri ntơm đăp mpăn, nău nkra ƀư ăp siƀŭt an nuĭh ƀon lan ƀư dơh soih. Mpeh du đêt wăk kol đah kônh wa rnoi mpôl đê̆ he lơn âk lah yor âk nuĭh mô hŏ wât kloh, du đêt nuĭh mô blău nchih chữ, mô hŏ nchih dơi nău lư tâm hồ sơ, tâl bar đŏng lah ăp nău lư siƀŭt mô ăp tŏng yor kơt nê̆ rnôk ƀư ri mbra jêr jŏt wăk kol.

Ta mpông ƀư mbrô 8 – Ntŭk rgum rhŏ dŏng ƀư siƀŭt xã Đak Đoa, yuh Sim, nuĭh Bana ân dơn na nê̆ hồ sơ bah nuĭh ƀon lan. Yuh an gĭt:

Mpeh nău kan gâp mât ƀư du nar dơn nkra nklăp 6 nkôp hồ sơ, lơn âk ƀư ăp hồ sơ mpeh bu ranh, mpeh văn hóa, ntĭm nti, dak si… Rnôk ƀư ri gâp nchŏng na nê̆ an ƀon lan, ntop kơl kônh wa ƀư tât dŭt tât lôch. Nău dŭt jêr jŏt ta nău kan ƀư siƀŭt aƀaơ di lah ăp siƀŭt kônh wa nchih mbơh êng yơn kônh wa mô gĭt chữ tâl bar đŏng lah mô geh tài khoản VNEID jêng cán bộ way blău kan gâp mbra dŏng tài khoản êng he, nchih an kônh wa lôch nê n’glăp tâm trôm pơk, nklăp 5 nar ri geh nău dơi.

Dơi nuĭh ƀon lan đă nchih n’glăp ăp nău lư ta cổng điện tử siƀŭt sitra, nô Hmên, ta ƀon Tuơh Ktu, xã Đak Đoa, mpơl nău:

Ntŭk pơk rhŏ dŏng siƀŭt neh dak geh ăp tŏng ăp ndơ dŏng pơk gay nkra ƀư ăp siƀŭt, kơt khai sinh, neh ntu... lĕ rngôch ăp trong kan dơi n’glăp tâm nê da dê, yơn du gâl kônh wa mô hŏ ƀư dơi. Êng săk gâp nơm ri mô hôm rvê, dŏng hăr blău hôm yor gâp hŏ ƀư an kônh wa dŭt âk. Hôm đah kônh wa ri hôm mâp âk jêr jŏt ngăn. Ta ntŭk rgum ƀư siƀŭt geh nuĭh ntop kơl nchih n’glăp hôm yơn kônh wa hôm kuăl gâp hao đŏng yor aƀaơ kônh wa ƀư hồ sơ dŭt âk rđĭl đah ăp xã êng.

Tĭng wa Nguyễn Thành Thoại, Groi Giám đốc Ntŭk rgum rhŏ ƀư siƀŭt xã Đắk Đoa, ntŭk kan hŏ dơi ntuh kơl drăp ndơ têh mhe, geh 9 mpông ƀư siƀŭt tơm, 10 máy tính n’hanh 1 ki-ốt rhŏ dŏng nuĭh ƀon lan ƀư ăp njuat ta cổng điện tử. Ntơm bah khay 7/2025 tât lĕ khay 1/2026, Ntŭk rgum ƀư siƀŭt dơn geh rlău 5400 hồ sơ. Rnoh âk hồ sơ nkra ƀư di nar ton geh rlău 98,6%. Rlău ma trong kan neh ntu dôl geh ăp wăk kol tă bah mô hŏ tâm ban dơn ngoăy rgum prăp nău lư, hôm lĕ rngôch ăp siƀŭt dơi ƀư glêh ngăch da dê. Wa Nguyễn Thành Thoại, an gĭt:

 N’gor an ƀư lĕ n’hâm suan nô nău dja. Kêng dŭt ăp nar lah mpôl hên mbơh an ta ntŭk pơk da dê. Mhâm geh wăk kol ri ân njêng ăp rmôt, kuăl điện, nhắn tin gay nkra mô lah đă ntop kơl mô an geh rsŭn bưm. Ri n’gor rđău đă dŭt grêt lhăt tâm nău nkra ƀư siƀŭt ta mpông pơk lăp ƀư siƀŭt.

Ngăn bah xã Đắk Đoa, n’gor Gia Lai, n’gâng kan 2 gưl dôl lah ntŭk ƀư siƀŭt dăch dêh ƀon lan ngăn, wât  ƀon lan n’hanh rhŏ dŏng ƀon lan. Đah nsum mpôl nuĭh rnoi mpôl đê̆ ta Đắk Đoa, khay năm mhe dja lơn ma uĕh lăng, răm mƀak. Nuĭh ƀon lan nsing nơm tâm nău rđău kan bah Đảng, tâm nău rêh let năp tay uĕh lăng bah ƀon lan, bah neh dak!