Tâm nkual jay xưởng bah Hợp tác xã lŏ mir n’hanh nău rhŏ nkra njêng, nkret gâm bún-miến-phở kro Chi Lăng-Khánh Xuân, phường Thành Nhất, n’gor Dak Lak tĭng glah bún-miến-phở dơi ndơ̆ nkret gâm, pâr, tâl dŭng na nao gay ngăch ndơ̆ ntŭk tăch. Wa Hà Văn Tuyến, Giám đốc nkre ƀư kruanh Hội đồng quản trị hợp tác xã an gĭt: du khay hợp tác xã ndơ̆ an ntŭk tăch nklăp 15-20 tấn ndơ ăp ntil. Bah rnôk dơi kơp dơn ndơ OCOP 3 sao, ndơ bah hợp tác xã nar lơ dơi nuĭh dŏng gĭt tât n’hanh nsing nơm dŏng. Wa Hà Văn Tuyến an gĭt:

Bôk năm dương lịch n’hanh dŭt năm âm lịch ri mpôl hên nchrăp nklăp 40% ndơ hao nkôp đah ăp khay bah năp. Bah meng nĕ mpôl hên geh ndơ ntêm nkrem ƀư tĭng yan tâm di đah rnoh ndơ ntêm nkrem hao tay gay tâm di n’hanh đăp mpăn an ntŭk tăch tâm rơh Tết.

Mông nar mô ru saơ na nê̆ ta ăp doanh nghiệp nkret njêng ndơ lŏ mir têh hvi. Ta công ty TNHH Đức Thịnh-ngoăy tâm âk ntŭk kan nkra njêng, nkret gâm grăp điều ta n’gor-ăp trong nkret njêng, tâl dŭng pah kan kơt lĕ dŭt n’hâm.

Wa Nguyễn Ngọc Thùy Sơn, Giám đốc công ty an gĭt, bah meng ntŭk tăch n’gluh, lơn lah ntŭk tăch dak Trung Quốc, rơh dŭt n’hâm doanh nghiệp rgum âk lơn an ntŭk tăch tâm dak, ngăn lah rhŏ an nău ŭch dŏng tâm rơh tết. Doanh nghiệp lĕ nchrăp ê nkra ăp ndơ dŏng mhe, uănh khlay rup gui, dŭng gay n’hao dơi năl ndơ moh êng.

Doanh nghiệp lĕ nchrăp ê nkra ăp ntil ndơ mhe đah rup gui geh nkô̆ nău đoàn viên, rgum nsum. Mpeh rnoh khlay tăch, công ty ntơm mât đăp mpăn tĭng rnoh khlay ngih măy, knŭng du đêt ndơ rgâl hao nklăp 5% yor prăk ndơ ê nkra bôk năp hao. Tâm rơh Tết, rnoh ndơ pă an ntŭk tăch tâm dak hao nklăp 10%.

 Ta nkual mpeh bah lơ n’gor Dak Lak, âk ntŭk nkra njêng OCOP têh rnăk wâl mkra jêr jŏt jêh dk lip, ngăch pă ndoh ndơ an ntŭk tăch tết. Ta ngih tăch rgâl ăp ndơ OCOP ta xă Sông Hình, ăp ndơ kơt djăr trăm bôh nkao tiêu, ndrôk du nar, ndrôk pâr ŭnh, sŭr pâr ŭnh, djăr kro, sŭr kro dơi nkra njêng n’hanh tâl dŭng na nao.

Wa Nguyễn Duy Hùng, nuĭh tơm ntŭk nkra njêng Hùng Miên an gĭt, rơh mih dak bŭk mhe rlău lĕ kuch âk tât ndoh ndơ ê nkra kơt ngăch nkra njêng, yơn ntŭk kan lĕ ngăch mkra nău kan gay tâm di nău ŭch ntŭk tăch.

Mpôl hên ƀư nkra njêng na nao gay ngăch rhŏ ntŭk tăch Tết. Rơh Tết năm aơ, nău ŭch tăch nchrăp hao nklăp 35% nkôp đah nar êng, yơn rnoh tăch mbra mô hao âk.

Ndrel đah nsrôih bah ăp doanh nghiệp n’hanh rnăk nkra njêng, pah kan mât uănh ntŭk tăch, đăp mpăn ndơ sông sa dơi ăp nău kan n’hao prêh. Trung tá Nguyễn Đức Duy, Groi Kruanh jrô Cảnh sát Kinh tế, Công an n’gor Dak Lak an gĭt rmôt kan dơi kan lĕ rhăt jăp uănh nđôi, groi uănh hô

rơh têh.

Rmôt công an mbra uănh khlay groi nđôi ăp tu tơm ndơ bôk năp lăp rhŏ an nkra njêng, nkret gâm ndơ an jay sông sa, ntŭk tăch rgâl, đăp mpăn mô dŏng dak si khih, ndơ mât prăk bah dih ndơ mô an, tă bah nĕ nking n’gang nău khih ndơ sông sa, rgop an nuĭh ƀon lan wơt Tết đăp mpăn.

Rlet rlău âk jêr jŏt trôk nar lơh, đah nuih n’hâm nchrăp lor, nsrôih bah ăp ntŭk tăch ndoh ndơ ta Dak Lak đăp mpăn uĕh, âk ntil, tâm di tŏng ăp nău ŭch dŏng bah nuĭh ƀon lan tâm rơh Tết Nguyên đán.