Ta nkual pâl nđaih nsum mpôl buôn Akŏ Dhông, phường Buôn Ma Thuột, ntŭk ntô chĭng gông ndrel ăp nău njroh mprơ way ơm lĕ wăch rgum âk năch pâl nđaih râng ƀư ngăn tâm ăp nar bôk năm mhe. Yuh Freya, năch pâl nđaih tât bah Mỹ, an gĭt, ntŭk uĕh nđĭr, trôk nar răm duh ndrel nău dăch dêh bah nuĭh ƀon lan n’hanh nău uĕh văn hóa ta ntŭk lah ăp nkô̆ n’glơi an dŭt uĕh.

Mpôl hên dơi wơt dŭt n’hâm, dŭt răm rnôk dơi gŭ ta aơ n’hanh saơ kơt yan mih, nău ma mpôl hên mô bên ngăn yor rnăk wâl mpôl hên ta Mỹ, trôk nar dŭt nđĭk tâm rơh năm mhe. Yor nê, mpôl hên dŭt răm rnôk dơi geh nău răm duh tâm yan aơ. Ta Mỹ, ăp nuĭh way ngêt sa âk lơn, hôm ta aơ, saơ kơt geh âk nău rgum rƀŭn n’hanh sa rhơn ndrel rnăk wâl rlău đah băl bên n’hanh nuĭh êng.

Đah năch pâl nđaih tâm dak, Dak Lak ntŭk tât đŏng tâm rơh bôk năm gay rgop rlu rlău, uănh joi bri dak n’hanh mĭn joi văn hóa nkual neh. Nô Nguyễn Ngọc Chân, ta nkual ƀon têh Hồ Chí Minh nkoch, ăp rơh hăn kơt nê kơl ăp kon nô geh tay nău wât n’hanh ƀư ngăn n’hêl na nê̆.

Tâm rơh bôk năm mhe ri 2 mon jêt dơi rlu nti, jêng rnăk wâl gâp tât Buôn Ma Thuột lah ntŭk têh cà phê bah Việt Nam, ŭch an 2 mon hăn mĭn joi mpeh văn hóa, gĭt mpeh văn hóa bah ƀon lan kơt mpeh neh ntu, an ăp mon dơi wât nkual Tây Nguyên m’hâm ƀư.

Tâm ntŭk ntô văn hóa bah nuĭh Êđê, nău ngêt sa ndơ sa way ơm, uănh njroh mprơ n’hanh tâm nđŭr ndrel ăp nghệ nhân lĕ nsĭt tay an năch pâl nđaih ăp nău ƀư ngăn dơi nkah gĭt. Bah ăp nău khlay geh ơm, kônh wa ta ăp ƀon lan lĕ ntơm hun hao pâl nđaih tĭng tâm nău khlay uĕh văn hóa nsum mpôl.

Tĭng nô Y Nuel Niê, bu ranh ƀon Akŏ Dhông, ăp năm dăch aơ, pâl nđaih nsnum mpôl dơi kônh wa tâm ƀon uănh tât ntuh kơl, jêng ăp ntrong ƀư tâm rgop ƀư ngăn sinh thái n’hanh văn hóa. Tâm năm mhe, mpôl mât uănh pâl nđaih nsum mpôl bah ƀon mbơh ƀư tay ăp ndơ n’hanh nău ƀư gay n’hao uĕh rhŏ an năch pâl nđaih.

Ăp ndơ, lơn lah mpeh ndơ ngêt sa mbra âk lơn nkôp đah năm 2025, ăp ntrong ƀư êng mpeh âm nhạc an rgâl mhe lơn. Tâm ƀon gâp ri ăp khay mbra geh bôk nău ƀư njroh mprơ an dơm rhŏ an năch pâl nđaih.

Đah ăp doanh nghiệp pâl nđaih ta Dak Lak, hun hao pâl nđaih hăn ndrel đah sinh thái n’hanh văn hóa nsum mpôl lah trong hăn nâp nâl. Wa Nguyễn Thị Ngọc Anh, Công ty cổ phần pâl nđaih sinh thái nsum mpôl Kŏ Tam, phường Tân Lập, an gĭt, pâl nđaih sinh thái-nsum mpôl mô knŭng nsĭt tay an geh prăk, ma hôm rƀŏng tât mât njrăng ntŭk ntô, mât uĕh nău tuch tăm lŏ mir-mât rong ta n’gor.

Yor lah nkual pâl nđaih sinh thái, văn hóa nsum mpôl jêng mpôl hên rgum tâm nkra ntŭk ntô, nchrăp ăp ndơ biăp, bum, play bah mât rong, tuch tăm gay rhŏ đah ndơ sông sa. Yor mpôl hên nchrăp lor n’hanh mât tăm ta ntŭk jêng lĕ rngôch ăp nar lễ tết, geh khlay mpôl hên mât nâm ơm mô rgâl, mô geh sŏk ntop tay du ntil prăk nkôp đah nar ƀa ƀă.

Mât tay nău uĕh văn hóa nsum mpôl n’hanh nău ngăn ngên tâm  nău ƀư ngăn, pâl nđaih Dak Lak dôl bônh joi năch. Tâm ăp nar bôk năm mhe, yor nteh chĭng, nău njroh xoang n’hanh nău dăch dêh, ŭch năch bah kônh wa ăp ƀon lan lĕ jêng ntŭk uĕh wăch rgum an năch pâl nđaih ta ntŭk.

Năch pâl nđaih ŭch nđơr mĭn joi văn hóa Êđê