Nkhêp di Nkah gĭt 96 năm ndâk njêng Đảng; Đại hội đại biểu lam dak rơh tal 14 bah Đảng lôch uĕh; nkah gĭt 80 năm tổng tuyển cư bôk năp săch Quốc hội Việt Nam n’hanh nchrăp wơt Tết way ơm Bính Ngọ, ôi 27/1, Kruanh Quốc hội Trần Thanh Mẫn lĕ mpoh nhang nkah gĭt Kruanh Ban rnâng kan Quốc hội Bùi Bằng Đoàn ta Nkual nkah ndrăy xă Ứng Thiên, nkual ƀon têh Hà Nội, Drô Tổng Bí thư Trường Chinh, Drô Kruanh Quốc hội Lê Quảng Đạo; khâl mbah rhơn Tết tă ƀư Tổng Bí thư Nông Đức Mạnh, tă ƀư Kruanh Quốc hội Nguyễn Thị Kim Ngân.

Kruanh Quốc hội mĭn lah, ăp rơh đại biểu Quốc hội nar aơ tĭng nuih n’hâm têh bah ăp nuĭh hăn lor bah năp, mô rlu tiăr nti janh dăng, bôk rngok n’hanh nău mĭn pah kan; rgop ndâk njêng Quốc hội nar lơ ƀư tơm, pháp quyền, way kan, mhe; tâm di đah nău nsing nơm bah Đảng, Ngih dak n’hanh Nuĭh ƀon lan. Kruanh Quốc hội mĭn lah, tâm năm tât, Quốc hội mbra rgâl tay rmôt kan, nău kan, nău way kan mhe n’hanh rgâl mhe gay tâm di nar lơ uĕh lơn nău đă bah ngăn ngên tâm rach năm mhe bah neh dak; nsrôih tay, rgâl mhe trong pah kan, rgâl mhe nău mĭn ndâk njêng pháp luật, tĭng trong mhe n’hanh leo hăn hun hao; ntrôl rgâl mhe têh, nkra njêng trong hun hao mhe; rgum ƀư jêh, tâm ban trong an hun hao ngăch, nâp nâl neh dak; nsrôih ƀư săk rnglăy ntrong kan “Quốc hội mrô”.