Êng đah mông nar răm m’ak ăp năm, nkual way tăm nkao Bình Kiến, mpeh bah lơ nhâp nar n’gor Dak Lak ăp nar aơ rngot rngăt lơn jêh khuch bah rơh phŭt mrô 13 n’hanh mih dak bŭk rnôk n’gul khay 11/2025. Yơn lah, ta ăp ndrĭch mir nuĭh ƀon lan hôm mbrơi tâm rlong đah mông nar. Ăp mir cúc pă chôt dơi nkra rdâk đah mâng glê, ăp ntŭk ƀah yor tơm khĭt dơi koaih gay rgum prăk an ăp uk nkao hôm e. Aơ lah lvang ntrŭnh gay ndơ̆ ndơ luh ntŭk tăch tâm rơh Tết Nguyên đán Bình Ngọ 2026.

Jêr jot têh ngăn bah kônh wa rnôk aơ lah nău joi prăk kaih nkra njêng. Jêh dak lip, prăk ntuh kơl an phân poh, dak si tơm tăm n’hanh nuĭh kan nkra tay mir hao khlay da dê, ntop tay mbak jâk an nuĭh ƀon lan rnôk prăk lĕ ntuh kơl lĕ tâm lvang bôk yan. Wa Nguyễn Thị Liên, phường Bình Kiến nkoch:

Gâp nkra tay bah bôk năp, gâp nkrauĕh tay, poh tay dak si, nar luh hoach prăk lơn. Mpŏng dơi geh gay geh prăk yor aƀaơ dŏng prăk dŭt âk.

Ta ăp mir, nău mât chăm dôl lăp lvang khlay ngăn: dônh mlom n’hanh koh n’ging gay nkra nar dang. Yor rnoh nău kan âk n’hanh joi kỹ thuật âk, ăp rnăk an manh tay nuĭh luh, ƀư prăk lăp bôk năp lơ âk. Wa Huỳnh Thị Nho nkoch:

Lvang aơ lah lvang nkra nkao, toh phân an uĕh. Jêh rơh dak bŭk ri mât chăm jêr jŏt ngăn, sial phŭt ƀư djơh âk, nar luh hao khlay. Tăm nkao knŭng dơi tăch, sŏk tay du đêt.

Tĭng kơp bôk năp, phường Bình Kiến geh rlău 50ha tăm nkao cục ăp ntil. Aƀaơ, nklăp 50% rdoh ndơ ta ăp mir đêt geh khuch khat lĕ dơi nuĭh rwăt nchăm ơm. Đah ăp rnoh neh ƀa ƀă, kônh wa hôm e mât măt n’hanh uănh nđôi nău mbơh ntŭk tăch. Wa Nguyễn Thị Hiển an gĭt:

Nuĭh rwăt lĕ hăn mbơh rwăt, ôp rnoh khlay na nao. Aƀaơ nkao bơi lĕ jêh hôm, kâp dang nkao lah bu mư ntrŭnh rwăt.  

Gay hăn ndrel đah ƀon lan, n’gâng kan ƀon lan lĕ nchrăp ndâk njêng ăp trong boăt nthoi ntŭk tăch, ntop kơl tăch gay n’hŭch mâp an nuĭh ƀon lan jêh du năm trôk nar lơh. Wa Lương Thảo Nguyên, Groi Kruanh UBND phường Bình Kiến, n’gor Dak Lak, an gĭt ƀon lan dôl nsrôih tâm rgop gay joi ntŭk tăch đăp mpăn, kơl kônh wa ƀon lan đăp mpăn tâm lvang dak rhoăt bah yan nkao Tết.

UBND phường geh trong nchrăp ƀư trong nkao yan puh ta trong 1/4, pă dăp ăp ntŭk tăch nkao, tâm rgop ƀư uĕh ntŭk ntô gay geh ntŭk tăch rwăt, kơl nuĭh ƀon lan tăch nkao dơh tâm rơh Tết.

Bôl rdâng đah âk nău rgâl đah trôk nar n’hanh prăk kaih, yơn đah nuih n’hâm nchrăp lor mkra, nuĭh tăm nkao Bình Kiến dôl nsrôih dŭt n’hâm gay yan nkao Tết năm aơ geh săk rnglăy uĕh ngăn.