Tâm rơh pah kan ta Quảng Ninh, ôi 27/1, nkhêp di rơh nchrăp wơt Tết Nguyên đán Bính Ngọ 2026, Tổng Bí thư Tô Lâm lĕ sĭt khâl n’hanh ƀư tơm nar mâp măt mbah rhơn Tết phung pah kan nău kan sah ônh. Nkoch bri đêp rmên đah âk oh yuh phung pah kan nău kan sah ônh, Tổng Bí thư Tô Lâm mĭn lah, mô knŭng tâm njrăng n’gang đăp mpăn rnoi nuĭh ma tâm lôch rnôk mât njrăng n’gang ndâk njêng trong xã hội chủ nghĩa, giai cấp công nhân Việt Nam, tâm nĕ geh phung pah kan nău kan sah ônh, rmôt n’gâng tơm mro, hăn lor tâm pah kan nkra njêng, tâm rdâk nkra n’hanh hun hao wăng sa tâm ƀư tĭng ăp nău kan têh bah neh dak.

Tổng Bí thư Tô Lâm lĕ đă ăp trong khlay nĕ lah: N’hao săk geh, uĕh nâp n’hanh săk rnglăy pah kan. Lĕ nău kan an rgâl mhe tay rdâk ƀư nkra njêng, ntrôl dăng rgâl mhe măy mŏk, rgâl hao êng, kơt dŏng khoa học-công nghệ n’hanh rgâl mrô tâm ƀĭt joet, mât uănh trôm sah ônh. Tổng Bí thư đă Tập đoàn Công nghiệp Sah ônh n’hanh Khoáng sản Việt Nam mât uănh jay gŭ, phúc lợi n’hanh ăp nkra njêng nău rêh jêng an phung pah kan. Lơn lah an ndâk njêng ntŭk ntô rêh đăp mpăn, uĕh blău, hăn ndrel kơl phung pah kan đăp mpăn pah kan jŏ jong, tĭng đah trôm sah ônh, đah nău kan.