Kơt nău lĕ mbơh, kêng măng lơ 22/1/2026, Đại hôị đaị biêủ lam dak tal 14 bâh Đảng lĕ geh săch Ban chấp hành Trung ương Đảng khoá 14 geh 200 Uỷ viên, tâm ne geh 180 uỷ viên ntơm ngăn n’hanh 20 uỷ viên nchrăp kan.

Ôi aơ 23/1, rơh rƀŭn nchră bôk năp Ban Chấp hành Trung ương Đảng khoá 14 ƀư rƀŭn nchră gay ma săch n’gâng kan Chính trị, săch Tổng Bí thư, săch Ban Bí thư, djăt nău mbơh tơih mpeh ăp trong kan ăp nuĭh kan leo kan tơm bâh Đảng, ngih dak n’hanh an tâm rgop nău mpeh nuĭh kan mât ƀư leo kan way kan Ban Bí thư, săch Uỷ ban Kiểm tra Trung ương, săch Kruanh Uỷ ban Kiểm tra Trung ương.

Ban Chấp hành Trung ương Đảng khoá 14 lĕ dơn ngoăy tâm ŭch săch đồng chí Tô Lâm, Tổng Bí thư Ban Chấp hành trung ương Đảng khoá 13 geh săch ƀư tay Tổng Bí thư Ban Chấp hành trung ương Đảng khoá 14.

Tổng Bí thư Tô Lâm geh an tay âk nău khlăy ngăn tâm trong leo kan Đảng n’hanh mbơh trong kan tơm an hun hao neh dak khlăy an hun hao neh dak kơp bâh ntơm geh Ban Chấp hành Trung ương Đảng khoá 13 săch ƀư Tổng Bí thư Ban chấp hành Trung ương Đảng Cộng sản Việt Nam khoá 13 ta khay 8 năm 2024.

Rơh nău kan Cách mạng pă dăp, ƀư kloh ueh nău kan ngih dak tĭng trong Nghị quyết mbrô 18-NQ/TW geh mbơh tơih răng dăng ta rơh mhe ngăch, đah nău kan têh ngăn bâh ntơm tât aƀăo n’hanh nău geh ngăch ndal, mô dơn n’huch rnoh leo ƀư, ntŭk kan, n’huch nuĭh kan, n’huch prăk kan ƀa ƀơ ma khlăy lơn lah lĕ n’hao geh săk rnglăy pah kan, săk rnglăy bâh n’gâng kan, n’huch bah ir nău ndranh klang n’gul, pă nău dơi leo kan geh ntrôl dăng tĭng trong dăch ƀon lan, gĭt vât ƀon lan, kơl an ƀon lan ueh lơn, lĕ pơk nău ueh mhe, mbluh aih ueh trong kan, njêng nău kan gay ma hun hao wăng sa- rêh jêng an lvang rơh let năp tay.

Bâh dŭt năm 2024 tât aƀaơ, n’gâng kan Chính trị lĕ ntrŭnh 9 Nghị quyết geh nău kan khlăy ngăn bâh lĕ rngôch ăp trong kan tơm khlăy bâh neh dak. Aơ lah ăp trong rƀŏng kan têh, tâm ban, mpơl nău mĭn rgâl mhe, mpŏng kan jŏ jong n’hanh răng dăng mpeh chính trị bâh Đảng, lah nău kan tơm ndơ̆ neh dak hun hao ƀư sâm geh têh ndrŏng n’hanh ueh mhe ta rơh rgâl săk neh dak.

Nău rêh nău kan đồng chí Tô Lâm

Tổng Bí thư Ban Chấp hành Trung ương Đảng khóa XIV

Deh nar:  10/7/1957        Bu klô/bu ur: Bu klô        Rnoi mpôl: Yuan.

- Ƀon tơm: Xã Nghĩa Trụ, nkuăl Văn Giang, n’gor Hưng Yên.

- Tâm rnăk vâl: Cán bộ.

- Nău kan ê lor geh săch dŏng : Kon hoc

-Nar geh săch lăp ƀư Công an nhân dân : 10/1974.  

- Nar lăp Đảng: 22/8/1981.       Nar lăp ngăn ngên: 22/8/1982

- Nău gĭt ntĭm nti:

        + Nti phổ thông: 10/10.

        + Chuyên môn nghiệp vụ: Đại học An ninh nhân dân.

        + Học hàm, học vị: Giáo sư, Tiến sĩ.

        + Lý luận chính trị: Cao cấp.

        + Ngoại ngữ: Anh C

Tổng Bí thư Tô Lâm lah Ủy viên Bộ Chính trị khóa XII, XIII, XIV; Ủy viên Trung ương Đảng khóa XI, XII, XIII, XIV; Đại biểu Quốc hội khóa XIV, XV.

Lơ 22.1.2026, ta Đại hội đại biểu lam dak lần thứ XIV bah Đảng, wa geh săch lah Uỷ viên Trung ương Đảng khoá 14, năm kan 2026-2031.

Ôi lơ 23/1/2026, ta rơh rƀŭn nchră tal 1 Ban Chấp hành Trung ương Đảng khoá 14, wa geh săch ƀư Uỷ viên Bộ Chính trị khóa XIV n’hanh geh mât ƀư  Tổng Bí thư khóa XIV.