Ôi ơm, mông nar pah kan tuch tăm lĕ n’gŭr răm ta ăp ndrĭch mir jay bil, jay màng rot jong ta nkual biăp Đơn Dương, n’gor Lâm Đồng. Biăp dơi rôk tôch, rao, tâl dŭng tĭng samƀŭt ndơ; nkao dơi njŭn tât ăp nkual ê nkra rgum. Wa Khắc Bình, nuĭh ƀon lan xă D’ran, răm rhơn an gĭt, rgâl mhe ta nkual biăp aơ tât ndrel đah nău ndâk njêng thôn ƀon mhe:

Kônh wa hun hao wăng sa geh ngăn. Knơm geh nău uănh tât, ntop kơl bah ngih dak jêng wăng sa geh hun hao lơn ăp năm. Nkra njêng kơt blân srat, ăp ndơ biăp, mrăch gŭng... ăp ntil tơm tăm aơ nkra njêng tĭng lŏ mir công nghệ mhe. Aƀaơ ntơm hun hao nău kan tăm nkao. Nău rêh aƀaơ hun hao lơn nkôp đah bah năp, nău rêh kônh wa lĕ rgâl na nê̆.

Ndâk njêng thôn ƀon mhe ta nkual biăp Đơn Dương geh 4 xă Đơn Dương, Ka Đô, Quảng Lập n’hanh D’ran bah n’gor Lâm Đồng, rgop rjăp đah trong nkra njêng mhe. Tât dŭt năm 2025, biăp n’hanh nkao công nghệ mhe geh nklăp 95% rnoh neh srih tăm; khlay nkra njêng lŏ mir rĭng geh rlău 220 rkeh prăk/ha/năm. Ăp xă aƀaơ lĕ tâm di thôn ƀon mhe n’hao prêh, leo lor.

Tĭng trong hun hao nsum, ăp ƀon lan rnoi mpôl đêt ta ntŭk rgâl mhe ngăch đŏng. Wa K’Bril, Kruanh thôn Kambute, xă Đơn Dương an gĭt, nău rgâl mô knŭng ta dăp rgâl nkra njêng ma hôm saơ na nê̆ ta nău blău tuch tăm n’hanh dơi geh nău rêh bah nuĭh ƀon lan:

Aƀaơ kônh wa lĕ kơt dŏng măy kay têh gay tuch tăm, ntuh kơl trong tŏ blău mhe, kỹ thuật tuch tăm nar lĕ dơi n’hao prêh. Bah nĕ rgâl mpeh trong joi nău rêh kơt nău geh, nău rêh ri đăp mpăn nar lơ hao. Thôn Kambute aƀaơ lah jay 2 dăp, rnoh rnăk ncho ô tô dŭt âk. Bah nĕ, muh măt bah thôn lah êng, ta xă lah nsum rgâl dŭt têh, rgâl tĭng nar.

 Tâm rnôk dăp tay ntŭk kan hành chính n’hanh pơk dŏng ntrong ƀư n’gâng kan ƀon lan 2 gưl, nău kơp uănh, nglăp tay nău rƀŏng ndâk njêng thôn ƀon mhe, dơi ăp xă nkual Đơn Dương mĭn lah nău kan khlay. Tĭng wa Trương Quang Kiên, Groi Kruanh UBND xă D’ran, thôn ƀon mhe dơi tĭng đah mbơh ƀư Nghị quyết 57 mpeh ntrôl dăng kơt dŏng khoa học công nghệ, rgâl mhe-mĭn ƀư mhe n’hanh rgâl mrô.

Nghị quyết Đại hội Đảng bộ xă D’ran năm kan 2025-2030 lĕ nchrŏng trong dŭt kloh. Tâm nĕ dŭt n’hâm lah ndâk njêng ăp ntrong ƀư gay hun hao, kơt dŏng công nghệ mhe an nkra njêng lŏ mir, ndâk njêng ăp HTX, rmôt kan ndrel, ƀư tĭng ăp ndơ OCOP, bah nĕ rgŏ jăp ăp doanh nghiệp ntuh kơl ngih măy nkret njêng ndơ lŏ mir, n’hao nău geh an nuĭh ƀon lan.

Hôm đah xă Đơn Dương mhe-jêng bah nkual têh Thạch Mỹ, xă Đạ Ròn n’hanh xă Tu Tra ơm-n’gâng kan ƀon lan lĕ mĭn kloh trong hăn an lvang bah năp tay. Wa Trần Hùng Dũng, Kruanh UBND xă Đơn Dương, an gĭt:

Jêh rnôk geh kôp rnoh an ƀư mpeh ndâk njêng thôn ƀon mhe lvang 2026-2030 ri xă geh trong nchrăp na nê̆ gay n’hao tay nău geh, rnoh hao nău rêh, ntŭk ntô gŭ âm, mât tay n’hanh n’hao uĕh ntung trong, nkra njêng, nău rêh jêng... M’hâm ƀư geh nău rƀŏng lah ndâk njêng xă thôn ƀon mhe uĕh.

Bah nkual lŏ mir Đơn Dương, n’gor Lâm Đồng an gĭt, bôk nău kan ndâk njêng thôn ƀon mhe dôl lăp lvang “n’hao uĕh”, rƀong tât thôn ƀon mhe, uĕh blău, nkra njêng hăn ndrel đah ntŭk tăch n’hanh trong khlay. Ăp nău rgâl uĕh nĕ mô knŭng ƀư rgâl muh măt thôn ƀon, n’hao nău rêh nuĭh ƀon lan, ma hôm rgop ƀư rgop ăp nău rƀŏng hun hao nâp nâl ma Đảng lĕ mĭn lah./.