Ăp nar bôk năm 2026, ta ntŭk rdâk ƀư Ngih samƀŭt Phổ thông nội trú 2 gưl Buôn Đôn (thôn Thống Nhất, xă Buôn Đôn, n’gor Dak Lak), rlău 10 nuĭh phung pah kan, kỹ sư ndrel âk măy mŏk bah nuĭh ndranh, tâm pă âk rmôt, ndăn koh loih, rlŭk bê tông tuh n’gâng, ntă mpir, rnoh êng kăt loih, nchrăp tuh bê tông grê dăp 1 rot me 3 dăp. Wa Trần Văn Long, Kruanh ntĭm rđău rdâk ƀư ngih an gĭt, ăp nuĭh ndranh hôm e tâm pă nuĭh kan, măy mŏk gay ntrôl ngăch ƀư. Aƀaơ ndơ ƀư rlău trong nchrăp n’gluh an:

Aƀaơ, ta ntŭk kan geh 5 nuĭh ndranh ăp nău kan, dôl tâm pă du nuĭh ndranh 1 hê kruanh ntĭm rđău, 5 kỹ sư ndrel 40-50 phung pah kan dôl ndâk ƀư 5 ntil ndơ bah nău nchrăp ƀư. Ăp ndơ ndranh dơi mbơh ƀư đăp mpăn ngăch n’gluh an. Mpôl hên dôl nsrôih nkra nău trôk nar duh, phang mro, rdâk ƀư âk ka gay jêh lor, jao an ƀon lan dŏng.

Tĭng ntoh măt nuĭh ntuh kơl, wa Võ Văn Lợi, Groi Giám đốc Ban Mât uănh nău nchrăp ƀư ntuh kơl ndơ ƀư ƀon lan dŏng n’hanh công nghiệp n’gor Dak Lak (Ban B), tât aƀaơ lĕ rngôch ăp ngih samƀŭt nội trú 2 gưl n’har bri ta n’gor lĕ jêh mbuh jâng neh, nchrăp tuh grê dăp 1. Rnoh sŏk pă prăk geh rlău 32%, tâm ban nklăp 120 rmen prăk, đăp mpăn di ngăch. Ntơm lăp tâm yan wai, Ban lĕ ndâk ƀư trong ntop kơl ăp nuĭh ndranh rgum ndâk ƀư gay jêh ngih samƀŭt tâm khay 8, n’ăp rnôk geh mih sial jêr jŏt. Wa Võ Văn Lợi mbơh.

Tât aƀaơ, ndơ ƀư ntơm đăp mpăn ngăch. Yơn, yor geh êng yan mih phŭt ta nkual n’har bri Dak Lak tâm năm 2026 geh jêr njrăng, mpôl hên lĕ ndâk ƀư ăp trong ntop kơl mpeh măy mŏk, ndeh rklư, nuĭh kan n’hanh ntơm rdâk ƀư 3 ka gay ntop an ngăch. Tă bah nĕ, dŏng dŭt n’hâm ăp nar trôk duh tâm yan wai gay mbơh rdâk ƀư.

 Tĭng wa Nguyễn Thiên Văn, Groi Kruanh UBND n’gor Dak Lak, jêh ntĭm rđău bah nuĭh ntuh kơl, ăp ntŭk n’hanh ăp nuĭh ndranh lĕ nsrôih ntrôl ngăch ndâk ƀư, ơm jêh ngih wâl gay rhŏ an kon hŏk nkual n’har bri, nkre mbah rhơn kơt ndơ̆ Nghị quyết Đại hội 14 bah Đảng tâm nău rêh. Wa Nguyễn Thiên Văn lah rjăp:

Mbơh ƀư Nghị quyết Đại hội 14 bah Đảng mhe dơi mbơh an, ƀon lan mbra rgop rgâl tâm di đah nău geh ngăn bah n’gor, gay ndâk ƀư ăp nău kơl ngăn ngên đah rmôt nai n’hanh kon hŏk nội trú, nta an uĕh ngăn an nai cô n’hanh kon hŏk đăp mpăn ntĭm n’hanh nti. Tă bah nĕ ƀư tĭng săk rnglăy nău rƀŏng ntĭm nti ta ntŭk ăp xă n’har bri lah êng n’hanh lam n’gor Dak Lak lah nsum.

Ăp n’gâng neh nâp nâl dơi ntăm, ăp n’gâng ntơm hao prêh, geh ndơ nkơng an ăp grê bê tông nâp ta ăp ngih samƀŭt nội trú nkual n’har bri Dak Lak. Bah năm nti 2026-2027, ntŭk aơ mbra jêng ntŭk mât rong nuĭh nti an rlău 3.000 kon hŏk n’har bri. Ăp kon se nĕ mbra nsrôih nti nsơm, nsrôih an tâm nău rêh rgŏ năp mô ngai, đah soan mom n’hanh nău nti bah nơm, rgop ndâk njêng nkual n’har bri Dak Lak nar lơ đăp mpăn, hun hao, geh âk nău uĕh.