Tĭng N’gâng kan Văn hóa, Thể thao n’hanh Pâl nđaih n’gor Khánh Hòa, năm 2025 lam n’gor wơt nklăp 16,4 rkeh bu năch, hao rlău 14,4% nkôp đah năm 2024. Tâm nĕ, năch dak bah dih geh nklăp 5.5 rkeh nuĭh, hao rlău 13,4%. Dĭng lĕ sŏk geh pâl nđaih geh 66,7 rbăn rmen prăk, hao 16,8%, lôch jêh 100% rnoh n’gluh an. Ăp săk rnglăy aơ an saơ pâl nđaih mât tay nău ƀư tơm “ntŭk hao jêng”, geh soan rêng hvi an ăp nău kan wăng sa dak lêng êng.

Năm 2026 nău kan pâl nđaih Khánh Hòa rgum ƀư mhe ndơ, pơk hvi ntŭk ntô ƀư ngăn. Rlău ăp ntŭk tât lĕ bên ta Nha Trang, Cam Ranh, âk ndơ, trong ntŭk mhe tqa nkual mpeh bah dâng n’gor dôl dơi ndơ̆ an dŏng, geh tay trong săch ân năch pâl nđaih tâm rơh rlu lễ, nar tết âm lịch Bính Ngọ. Tĭng nĕ, năch pala nđiah tât Khánh Hòa tâm nar tât mô knŭng njâr duh nar, dak lêng pŭt ma hôm geh dơi ƀư ngăn văn hóa Chăm uĕh ngăn, uănh joi ăp ntŭk tât kơt Bình Tiên, Vĩnh Hy, yôk choih Nam Cương, tháp Po Klong Garai. Nău pơk hvi ntŭk pâl nđaih dơi mpŏng mbra rgop dô̆t jong nar rlu rlău, hao rnoh dŏng bah năch pâl nđaih. Wa Nguyễn Văn Hòa, Giám đốc N’gâng kan văn hóa, Thể thao n’hanh pâl nđaih n’gor Khánh Hòa an gĭt:

Jêh rnôk nglăp nsum 2 n’gor Khánh Hòa n’hanh Ninh Thuận, bah năp đaơ dŭt âk ăp ntuk tât ta Khánh Hòa aơ geh tay ăntŭk tât ta mpeh bah dâng n’gor dŭt uĕh, wăch rgum dŭt âk năch pâl nđaih.

Tĭng Groi Giáo sư-Tiến sĩ Nguyễn Chu Hồi, groi Kruanh Rnâng kan Hội Thủy sản Việt Nam, jêh nglăp nsum rnoh neh dak lêng Khánh Hòa lĕ hao âk, yơn hao jêng wăng sa dak lêng, tâm nĕ pâl nđaih dak lêng gôl dak mât ƀư tơm ta n’gul, an geh “pă mrô nhân”. Nkual dak lêng Khánh Hòa geh tâm “Njônh 3 nkual san hô” mpeh bah dâng Biển Đông, geh rnoh âk ntil sinh học têh, n’gâng tơm khlay an hun hao pâl nđaih n’hanh nău kan joi ka. Yor nê, nău kan joi ka-pâl nđaih-mât ndrăy lah 3 nkô̆ nău mô dơi nkhah êng. Hun hao pâl nđaih dak lêng mô dơi nchoăt tĭng rneh geh ma an hăn ndrel đah mât ndrăy trong sinh thái, uănh ăp rạn san hô, njônh dak lêng, nkual mât ndrăy kơt an lah, ntil ndơ pâl nđaih tâm di đah nău geh êng bah tĭng ntŭk ntô, mbra mât uĕh ngăn kơl lor an dak lêng bah Khánh Hòa.

Nău geh ak bah njônh Nha Trang êng njônh Vân Phong. Uĕh ngăn bah njônh Nha Trang lah san hô, an hun hao tĭng trong nău kan joi kan pâl rlưn, rgâl bah sŏk joi an ƀư ngăn, nsĭt tay nău khlay wăng âk lơn.

 Bahntŭk mât uănh nău kan, wa Hà Văn Siêu, Groi Cục trưởng Cục Pâl nđaih Ngih dak Việt Nam, năl lah Khánh Hòa dôl rgum tŏng ăp nău geh gay jêng ntŭk hao jêng pâl nđaih bah lam dak n’hanh hao rmôt ntŭk tât bôk năp Đông Nam Á. Yơn lah, gay rgop nău rƀŏng aơ, n’gor an ntăm tay rup ndah ntŭk tât ta rup gui pâl nđaih lam ntŭr neh, n’hao uĕh ndơ n’hanh ndâk njêng moh êng pâl nđaih tâm ban lam ntŭr neh. Tĭng wa Hà Văn Siêu, bah năp măt Khánh Hòa an rgum jêh dăp rgum n’hanh ntung trong pâl nđaih mhe, uănh khlay lah nkra tach ndeh păr Cam Ranh, ntuh kơl trong ndrâm dak lêng, ndrâm duk pala nđaih n’hanh ntung trong boăt nthoi tâm ban. Nkre, hun hao ndơ pâl nđaih tĭng tâm nău dơh ăp njônh tơm, tĭng trong tâm rgop, ntop kơl, dêr tâm trŭp; ƀư geh ngăn âk ntil tĭng yan, tĭng nar, măng gay n’hŭch yan tuch tăm:

Cục Pâl nđaih Ngih dak Việt Nam mbra hăn ndrel đah Khánh Hòa tâm nău ndâk ƀư, ntăm ndơ moh êng pâl nđaih, ndơ̆ Khánh Hòa ntoh kloh na nê̆ lơn ta rup gui pâl nđaih lam ntŭr neh, jêng ntŭk pâl nđaih rlu rlău dak lêng lam ntŭr neh.

Đah trong hao jêng uĕh tâm năm 2025, nău kan Pâl nđaih Khánh Hòa dơi nchroh mbơh hao jêng tay tâm năm khay tât. Năm 2026, nău kan nsrôih geh prăk rlău 77.000 rmen prăk, dĭng lĕ nuĭh bu năch rlău 18,1 rkeh nuĭh, tâm nĕ năch dak bah dih rlău 6 rkeh nuĭh. Lvang 2025-2030 geh nău bah dih, đă Khánh Hòa an ntăm pâl nđaih ta ntŭk nklang tâm trong hun hao. Rnôk dơi ƀư uĕh, pŭt n’hanh nâp nâl, pâl nđaih mbra geh soan rêng hvi, ntrôl ăp n’gâng tơm êng kơt công nghiệp, logistics, nkual têh dak lêng n’hanh wăng sa dak lêng ndrel hun hao.

Groi Kruanh rnâng kan UBND n’gor Khánh Hòa Nguyễn Long Biên mĭn lah pâl nđaih-nău rhŏ lah ngoăy tâm 4 n’gâng tơm khlay hun hao wăng sa bah n’gor, tĭng ăp nghị quyết 09 bah Bộ Chsinh trị n’hanh Nghị quyết 01 N’gor ủy Khánh Hòa, rƀŏng tât hao jêng 2 kon mrô tâm lvang tât.

Sŏk joi ăp ndơ geh, nău dơh gay ntrôl rdâk hao, wăch rgum ăp nău nchrăp ƀư pâl nđaih têh, uĕh ngăn; hun hao ndơ pâl nđaih geh êng, m’ha êng; nkra ntung trong ngih wâl, nău rhŏ uĕh ngăn; ntrôl ngăch ăp nău nchrăp ƀư pâl nđaih khlay; hun hao wăng sa măng, trong nău rhŏ ndơ sông sa, năt rwăt ndơ, pâl rlưn răm m’ak gay n’hao wăch rgum năch âk; ntop kơl n’hanh dôh rklaih ăp jêr jŏt an nuĭh ƀon lan râng nău rhŏ pâl nđaih.