Ta jâng yôk Lang Biang têh hvi, kao êr dang ntơr ta ăp nor yôk. Ta nklang nău mprơ bâh ăp ngih sàn ma đar way ơm n’hanh ăp ngih têh kuăng ueh ndrŏng ta tổ dân phố B’Nơr B, phường Lang Biang- Đà Lạt, nkah tât bu ranh Cil Kwuyên ăp nuĭh lĕ geh ntêm an wa nău ryơk âk ngăn.Wa Nguyễn Thị Cẩm Giang, Groi Bí thư rnâng kan Đảng uỷ phường Lang Biang- Đà Lạt an gĭt.

 “Wa Cil Kwuyên lah nuĭh geh nău knơm tâm ƀon lan rnoi đê̆. Wa geh ƀư dŭt ueh nău nti, pah kan tĭng nău mĭn, trong kan, nău kan Hồ Chí Minh. Wa way geh nsrôih mbơh tơih nuĭh bên tâm rnăk vâl tâm ban kơt ƀon lan ta tổ dân phố ƀư tĭng ueh nău ntrŭnh, trong kan bâh Đảng, nău kơl pháp luật bâh Ngih dak, tât râng ăp nău kan tâm rlong bâh ta ntŭk khlăy ngăn lah rdâk njêng nkuăl ƀon têh ueh mhe. Lôch nĕ wa geh nsrôih tâm nău kan rgŏ jă, mbơh tơih an mpôl mom mât rbăy, n’hao ăp nău khlăy văn hoá way ơm”.

Tâm nău kahgĭt bâh nuĭh Lạch, du rnoi bâh nuĭh K’Ho gŭ rêh ta jâng yôk Lang Biang, aƀaơ ta phường Lang Biang - Đà Lạt, n’gor Lâm Đồng ndrel đah nău tâm gŭ ur sai mô toưng năm deh, nău way “kêh rpu” tă lah nău mbăk jâk ta âk rnăk vâl. Saơ geh nău tât mô ueh bâh nău tâm gŭ ur sai ơm khuch tât nău rêh let năp tay, wa Cil Kwuyên geh tâm nchră đah Mục sư ngih brah, mbơh rblang an ƀon lan kon chroh, jêng lĕ dơi geh bah nău aơ bâh âk năm ba năp. Đah nău way “kêh rpu”, tĭng nău way du bông nău rêh rĭ ahn geh 2 mblâm rpu dăm nkhĭt gay ma sa n’hao bôk vơt săk, ur 2 kon, sai 2 kon. Aơ lah nău mbăk jâk tă ƀư an âk rnăk tup tâm nău rnon bâh rơh aơ tât rơh êng Bu ranh Cil Kwuyên lah nuĭh ntơm leo ƀư jut jăng nău tâm kêh rpu bâh nuĭh Lạch.“Tâm du bông nău rêh mô dơi geh njêng rvăt 4 mblâm rpu nĕ. Gâp tâm rgop nău tâm ăp nuĭh nhân sỹ, nuĭh gĭt blău bâh ƀon lan he an geh tâm ndrĭh nklơi lĕ nău mô tâm di aơ. Lôch nĕ ndơ tâm Hôị đồng xã tâm rgop nău ndơ lăp Nghị quyết lôch nĕ mbơh tơih pháp luật ntĭm nti an ƀon lan lah mô dơi tâm nchâp. Ntơm nơh rơh bơ̆ mô geh bu kêh tât rơh kon. Aƀaơ mô hôm geh kơt nĕ tay. Gâp saơ kơt lah du rơh rgâl mhe cách mạng jê̆ jê̆ mpeh nău way”.

Yan năm mhe aơ, bu ranh Cil Kwuyên ntơm lăp 69 năm deh. Yơn wa mô geh săch nău rêh đăp mpăn ma hôm nha geh nsrôih ƀư tât râng rjaih nău ta Toà án nhân dân nkual 1 n’gor Lâm Đồng. Geh nău tâm pit neh ntu, nău tâm gŭ ur sai jêr ma phoăi kơt la nău kŏ dŭt, yơn đah nău gĭt vât pháp luật nkre nău way K’Ho wa lĕ geh doh rkolaih lĕ ăp nău kan  tâm di ngăn.

Nău khlăy ngăn, ê lor geh gĭt tât lah du hê nuĭh rjaih nău dŭt blău, bu ranh Cil Kwuyên tă lah nuĭh rong rpu dŭt blău ngăn tât rlău 80 mblâm rpu. Wa lah nuĭh K’Ho ta Lang Biang bôk năp kơt nti, tăm 130 tơm Hồng, an geh săk rnglăy nău wăng sa âk. Bâh rlău 40 năm ba năp, ta meng nău ƀư wăng sa blău, đah nău kan lah cán bộ tư pháp xã  n’hanh play nuih way geh mpŏng sĭt ta ntŭk rêh jêng, bu klô ndăm Cil Kwuyên lĕ hăn ta ăp ƀon lan, anh nkra ăp ntil sƀ mbơh tơih pháp luật an ƀon lan.

Aƀaơ bôl ma nău rêh rnăk vâl lĕ tŏng ăp, yơn jâng bu ranh KWuyên hôm mô rlu, ti hôm mô nsrŭng kan, wa nkoch. Gâp ŭch rnăk vâl, băl mpôl tâm ban kơt lĕ rngôch ăp nuĭh tâm ƀon tâm rnglăp, geh nău rêh ueh, mô geh ƀư tih đah pháp luật, trong hăn, nău kơl bâh ngih dak, jut jăng ăp nău way mô hôm tâm di. Năm mhe tât, dăn an ăp nuĭh geh nău ƀŭn lap, đăp mpăn, pah kan dơh nơih, ndrel pah kan jan sa, hun hao ƀon lan đăp mpăn”.

Đah n’gâng kan ta ntŭk, bu ranh ƀon Cil Kwuyên lah ntung njŏ nâp nâl đah nău mĭn Đảng n’hanh nuih n’hâm ƀon lan. Tâm ntŭk rêh jêng, bu ranh Kwuyên lah nuĭh ntoh ang an ƀon lahn. Nô Jusep, du hê nuĭh ƀon lan ta ntŭk nkoch.“Wa Kwuyên lah nuĭh che, nuĭh bơ̆ dŭt jăp tâm rnăk vâl. Wa geh âk nău tâm rgop tâm nău pah kan jan sa n’hanh nău rêh nău mĭn bâh ƀon lan ta aơ. Bâh nĕ tâm rgop, geh nău kơl mbơh tơih bâh wa ma nău tâm gŭ ur sai mô tŏng năm deh mô hôm geh, ƀon lan tâm nkual geh nklơi nău way kêh rpu. Wa lah nuĭh way geh hăn lor ƀư tĭng ăp nău ntrŭnh, trong kan bâh Đảng, ngih dak jêng lah geh ƀon lan tâm ƀon ryơk, knơm djăt ngăn”.

Tâm rnôk dăch aơ bu ranh Cil Kwuyên geh âk nău rhơn. Di rơh khay 9 mhe nơh wa geh rhơn ndrel đah mpôl kan ta n’gor Lâm Đồng râng rơh kahgĭt 80 năm Quốc khánh 2/9 ta Hà Nội. Wa dŭt rhơn geh tât râng Đại hội tâm rlong rŏng dak lam dak tal 11 mhe geh ƀư ta dŭt pơh ba năp nơh.

Rup wa Kwuyên nsrôih đah ăp rơh rƀŭn rgum tổ dân phố, ntĭnh ntăn kon său der nău mplư rlăm ta mạng, der manh prăk kon khlăy lah nău dŭt ueh ngăn bâh du hê bu ranh ryơk n’hao ta jâng yôk Lang Biang. Ăp săk soan bâh wa lĕ tâm rgop mât an tổ dân phố B’Nơr B, phường Lang Biang- Đà Lạt nar aơ way geh đăp mpăn hơm răm.