Lơ (6/1) ta Ngih Quốc hội, Đảng, Ngih dak lĕ ƀư nkah gĭt 80 năm Nar săch têh bôk năp Quốc hội Việt Nam (6/1/1946-6/1/2026). Răk nău ngơi ta nar ƀư nkoch kloh, lơ 6/1/1946 lah bôk năp nchrat ang pơk luh du rơh hun hao mhe bah rnoi nuĭh Việt Nam. Nău dơi bah rơh Săch têh lĕ mĭn lah nâp nâl nău dơi ƀư tơm bah nuĭh ƀon lan, bah săk ƀư dĭk rnŏ hao geh đăp mpăn, rdâk ƀư luh Ngih dak bah he, đah tŏng ăp nkô̆ nău pháp lý ntoh măt an lam ƀon lan he ta tâm dak n’hanh dak bah dih, n’hanh lah Ngih dak ƀon lan ƀư tơm bôk năp ta Đông Nam Á.

Lôch 80 năm bah năp, đah 15 năm kan, tâm bôl moh nău, Quốc hội geh âk nău rgop khlay tâm nău kan cách mạng uĕh ang bah Đảng, bah rnoi nuĭh, tâm di lah ngih pah kan đại biểu prêh ngăn bah Nuĭh ƀon lan, ngih pah kan têh ngăn ngih dak prêh ngăn n’hanh ntŭk boăt nthoi nău mĭn, bôk rngok, mpŏng ŭch bah lĕ rnoi nuĭh. Ntoh ngơi ta nar ƀư, Tổng Bí thư Tô Lâm du tơ̆ tay mĭn lah bah lịch sử bôk năp bah năm 1946, Quốc hội Việt Nam mô rlu têh hao, ngăch dăng, mĭn lah tay nău ƀư tơm ta nklang bah nău rêh chính trị-pháp lý neh dak, lah trong mât nău tơm khlay tâm ndâk njêng n’hanh lôch jêh Ngih dak pháp quyền xã hội chủ nghĩa Việt Nam. Rƀŏng tât nkah gĭt 100 năm ndâk njêng Đảng (1930-2030), 100 năm ndâk njêng neh dak (1945-2045) n’hanh gay ƀư tĭng nău mpŏng ŭch Việt Nam jêng neh dak hun hao têh dăng, uĕh lăng, đăp mpăn, Tổng Bí thư nkoch kloh nău mĭn ƀư tơm bah Quốc hội tâm nkra njêng hun hao geh nkô̆ khlay, pơk trong an rgâl mĭn ƀư mhe, an hun hao ngăch n’hanh nâp nâl neh dak.