Năm 2022, nô Nguyễn Thanh Đức ta xă Sông Lũy, n’gor Lâm Đồng, ntơm ƀư tĭng ntrong kan mât lêr wai ntop rgop đah mât sĭm rgŭt sa poăch. Nô nkoch: ntrong ƀư aơ dŏng ndơ geh neh ntu bah rnăk wâl, rhŏ an nău ŭch ntŭk tăch n’hanh rgop rgâl ntil tơm tăm, mpa rong nsĭt geh săk rnglăy âk...

Ntơm ndâk njêng nău kan đah ntrong ƀư mât lêr wai, khay bôk năp nô Đức mô hŏ geh nău blău mât mpa rong mhe aơ jêng mâp mô đêt jêr jŏt. Yơn gĭt saơ nău ŭch ntŭk tăch lêr luh ntŭk tăch dơh, tăch mô tŏng nău ŭch jêng nô nănh ntuh kơl tay đah ndoh ndơ, kỹ thuật, mĭn njêng gay mât n’hanh yơng êng ntil, ndơ̆ an ntŭk tăch rnoh ndơ âk lơn.

Nô Đức an gĭt, prăk bôk năp an du ndrung lêr wai (2 m vuông/ndrung) nklăp 300.000 prăk (geh jrŏng loih, bạt cao su gay ƀư ndrung n’hanh tăp lêr wai). Du ndrung lêr jêh nklăp 35 nar mât rong dơi tăch. Ndơ sa an lêr lah ntil ndơ dŏng an sĭm rgŭt, dơi an lêr sa ntop ăp ntil biăp: rkân, bum prŭm, nkŭr bum, pih... du nar an lêr sa 2 tơ̆ (ôi, kêng măng). Lêr mât ndơ geh ơm, kloh, đêt nuh srê, knŭng roh hoach du đêt. Gay lêr hun hao ngăch, ndrung lêr an tŏng ăp kloh nsơh, aih nđik, dêr n’ĭt mpêh đah dŏng n’ha pring kro mô lah vỉ dơ tăp djăr... Nô Nguyễn Thanh Đức nkoch:

Jêh rnôk nuh srê Covid-19 oh sĭt dâl mô lăp Sài Gòn tay, ơm geh ndrung lêr ta jay mât bah sa ơm, oh ntuh kơl pơk hvi tay ndrung wang gay mât sĭm rgŭt, dŏng ăch sĭm gay sŭi an biăp, jêh nĕ sŏk biăp nĕ ƀư ndơ sa an lêr n’hanh sĭm rgŭt.

Rnôk ntrong ƀư mât lêr wai an dơh, nô Đức lĕ ntuh kơl tay ndrung wang gay mât sĭm rgŭt. Nô Đức nkoch, mât sĭm rgŭt an đăp mpăn ndrung wang dŭt kloh, ntŭk ntô mât an aih nđik, mô n’ĭt mpêh gay dêr nuh srê. Nău an sĭm sa an rĭng n’hanh di mông, lah mô mbra khuch tât rơh deh tăp. Bah rnôk deh tât rnôk deh tăp knŭng tâm 50 nar n’hanh nar an tăp nklăp 7-8 khay lah rgâl mpôl mhe.

Ndơn yor dŏng lư̆k công nghiệp, nô dŏng lêr kon n’hanh ntop đah tăm biăp gay ƀư ndơ sa an sĭm. Sĭm bah nô tăch luh bah dih khlay 12.000prăk/mlâm âk lơn rgŭt mât công nghiệp khlay 8.000 prăk/mlâm. Nô Nguyễn Thanh Đức nkoch:  

Gay mât sĭm rgŭt sa poăch săk rnglăy, ri he mât m’ơk, ntop tay ăp ndơ sa kloh kơt: biăp, bum, play... gay n’hao kah poăch; jêh nĕ ntop tay ndơ sa bah krah lêr ma ta jay ơm geh hôm, an pơng sa tay gay n’hao kah poăch. Jêng poăch sĭm rgŭt ta aơ êng đah sĭm rgŭt tâm nong tĭng kơt công nghiệp way ơm.

Trong ƀư bah nô Nguyễn Thanh Đức lĕ nsĭt tay geh prăk đăp mpăn, n’hanh dôl tĭng gưl dơi pơk hvi ta xă Sông Lỹ, n’gor Lâm Đồng. Nô Nguyễn Mạnh Tường Huy, Bí thư Đoàn druh ndăm xă Sông Lũy, an gĭt, rlău ma nău ntrŭt nsôr druh ndăm hun hao, pơk hvi ntrong ƀư mât sĭm rgŭt, năm tât, ƀon lan mbra ndơ̆ tay âk ntrong ƀư nkra njêng mhe, ngăn ngên tât đah druh ndăm n’hanh kônh wa kan lŏ mir.

Ntrong ƀư aơ lĕ ndâk njêng nău kan geh 2 năm, Đức sŏk tă bah ta ƀon lan êng sĭt n’hanh jêh nĕ yơng ntil, mât rong tâm rgop đah tăm biăp gay tăch. Lĕ rngôch lah tăch online. Aơ lah ntrong ƀư mhe n’hanh nău gĭt tât kỹ thuật kơt mât rong dŭt na nê̆. Aơ ntrong ƀư bôk năp, tâm năm tât mbra rgŏ jă kơt pơk hvi ntrong ƀư aơ kơl an ăp băl đoàn viên druh ndăm geh ndrel nău mĭn trong hăn gay ndrel ndâk njêng nău rêh, ndâk njêng nău kan n’hanh hao ƀư ndrŏng tâm di.

Mât lêr wai tâm rgop đah mât sĭm rgŭt dŭt dơh ƀư, lŏ mô kâp âk prăk, rgop an ăp druh ndăm nkual thôn ƀon. Nô Nguyễn Thanh Đức ta xă Sông Lũy, n’gor Lâm Đồng nchrăp nuih n’hâm ntĭm kỹ thuật kơt pă ntil an ăp nuĭh ŭch ndâk njêng nău kan đah nău ƀư “êng, mhe” aơ.