Wa Y Du, nuĭh Ba Na, lah nuĭh kan dak si ƀon Đê Kốp-Đuol, xă Mang Yang, n’gor Gia Lai. Ƀa ƀơ ăp pơh, wa tât ăp rnăk wâl tâm ƀon gay nkoch trêng trong njrăng n’gang kop ji, trong răk ntŭk ntô gŭ âm, uănh nđôi săk soan nuĭh ranh, bu ur bŭn n’hanh nar chuh an kon se jêt. Tĭng wa Y Du, săk rnglăy bah dak si thôn ƀon kloh na nê̆. Bah năp đaơ nuĭh ƀon lan dŭt âk rwăt êng dak si rnôk kop ji, rnôk ji mbăn mư tât ngih dak si. Aƀaơ lĕ êng, kônh wa lĕ joi tât ngih dak si rnôk geh nău đah săk soan, chuh ăp khay an kon se, bu ur bŭn ăp khay tât ngih dak si gay uănh nđôi, but săm.

Ngih dak si aƀaơ lĕ dơi ntuh kơl uĕh âk hôm. Kônh wa ta ƀon lan aƀaơ wât lĕ uĕh lơn, ăp rnôk kop ji, he tât but uănh jêh nĕ mbơh ntĭm hăn ngih dak si lah kônh wa hăn but uănh, săm ji tam lơn.

Ăp nuĭh kan dak si thôn ƀon kơt Y Du lah ntung nthoi tâm trong dak si n’hanh nsum mpôl, lah nuĭh nkoch trêng ăp nău mbơh săk soan, dak si đah nău ngơi nơm n’hanh trong wât bah kônh wa ƀon lan.

Ta Ngih dak si ntŭk kan 3 xă Gào, wa Định Thị Cất, Groi trạm trưởng an gĭt ăp năm dăch aơ nău kan dak si bah dâng ta xă geh âk nău rgâl uĕh ngăn. Trong kan nkoch trêng săk soan dơi ƀư ƀa ƀơ, tâm rgop ăp nar rƀŭn thôn, rgum rƀŭn nsum mpôl, bah nĕ n’hao na nê̆ wât bah nuĭh ƀon lan. Lah ntŭk geh rlău 65% rnoh nuĭh lah rnoi mpôl đêt, rnoh nuĭh râng bảo hiểm y tế hao tĭng năm n’hanh aƀaơ lĕ geh bơi 90%. Aơ lah nău mbơh dôl rhơn, yor rnôk geh bảo hiểm, nuĭh ƀon lan mbra đăp mpăn lơn rnôk tât but uănh ji, nchrăp gĭt nău rhŏ ta ngih dak si ndơn yor săm ta jay. Tĭng wa Cất, dak si bah dâng lĕ rgop n’hŭch ăp nuĭh an trơn ngih dak si mô khlay, kơl ntêm nkrem prăk n’hanh mông nar an nuĭh ƀon lan nkual jru ngai.

Mât uănh săk soan bôk năp an nuĭh ƀon lan ri săk rnglăy bôk năp lah chuh njrăng n’gang, aƀaơ nuĭh ƀon lan dơi wât jêng săk rnglăy dŭt âk. Trong kan njrăng n’gang ji, nkoch trêng trong nchrăp deh kon đêt ƀư tĭng dŭt uĕh. Tal 3 tay lah mpeh trong kan njrăng kop ji, cán bộ jŭr nkoch trêng ri nuĭh ƀon lan dŭt tĭng, khân pơng wât dŭt uĕh hôm.

Wa Nguyễn Đăng Quang, Kruanh UBND xă Gào, n’gor Gia Lai an gĭt, jêh rnôk ƀư tĭng ntrong ƀư n’gâng kan ƀon lan 2 gưl, jăng gưl nkuăl, nglăp nsum xă, neh ntu hvi, rnoh nuĭh âk rlău 3-4 tơ̆. Nău n’hao ntuh kơl, n’hao ntĭm nti nău way kan, hăr ty kan an rmôt nai dak si n’hanh rmôt pah kan dak si thôn ƀon lơ jêng khlay gay tŏng ăp mât uănh săk soan bôk năp an nuĭh ƀon lan tâm nu nău mhe.

Lơn lah an geh nău kơl tay an rmôt dak si thôn ƀon-rmôt rgop ƀư tơm tâm trong kan mât njrăng săk soan nsum mpôl ta ăp ƀon lan. Wa Nguyễn Đăng Quang lah:

Mpŏng Đảng, Ngih dak uănh tât tay an trong dak si bah dâng, dak si thôn ƀon, lơn lah trong kơl an rmôt dak si gay bu đăp mpăn pah kan. Gay đăp mpăn nău kan, tâm di nău ŭch mât săm bôk năp. Yor aƀaơ n’gâng kan xă têh, hăn ngai lơn.

Dơi lah, trong dak si bah dâng, dak si nsum mpôl ta Gia Lai lĕ n’hanh dôl mât uĕh tơm khlay mât uănh săk soan bôk năp, njrăng n’gang kop ji, nkoch trêng n’hao nău wât nuĭh ƀon lan, n’hŭch mbak jâk kop ji, n’hŭch jêr an ngih dak si bah lơ n’hanh ndơ̆ dak si tât êp đah nuĭh ƀon lan. Tâm rnôk ntrong ƀư n’gâng kan ƀon lan lĕ geh nău rgâl têh, xă hvi, ƀon lan âk, gay dak si bah dâng, dak si nsum mpôl mât uĕh nău khlay aơ, đă Ngih dak an uănh tât, ntuh kơl mpeh nuĭh kan, năp ndoh ndơ, ngih wâl n’hanh ntĭm nti nău way kan.