Gŭ kâp sŏk dak si jêh rnôk but uănh, wa Đoàn Thanh Phương, thôn Hội Phú, xă Tuy An Đông an gĭt:

Ngăn ngên lah uĕh ăp ngih pah kan lŏng bôk tôr, ngih dak, rnôk ma mpôl hên mih dak lip ri knŭng gĭt puăl ta op jay dơm, lĕ rngôch ngih wâl roh lĕ. Jêh rơh dak lip têh kơt nĕ ăp rmôt kan lŏng bôk tôr lĕ an ndơ, chop khâl n’hanh ngih dak, ăp ngih pah kan lĕ kơl but uănh ji, an dak si ngăn ngên lah uĕh.

Djôt dŭng dak si mhe sŏk, wa Lê Thị Hương ta phường Đông Hòa, n’gor Dak Lak nkoch nău răm rnok dơi ăp y nai dak si bah dŭt ngai, sĭt tât ntŭk mât uănh săk soan.

Tăng mpôl ntoh măt tâm nkual ƀon têh Hồ Chí Minh sĭt but uănh ji an nuĭh ƀon lan mpôl hên dŭt rhơn, ăp nai dak si nuĭh kan dŭt n’hâm, leo kônh wa tĭng na nê̆. Gâp dŭt lah uĕh, dŭt răm.

Bah lơ 23/11 tât aƀaơ, ndrel đah rmôt nai dak si ta n’gor, Dak Lak lĕ wơt dơn 5 mpôl nai dak si kơl kan tât bah Hà Nội, Hải pHòng, Đồng Nai, Nkual ƀon têh Hồ Chí Minh... mbơh ƀư but uănh ji ta 11 xă geh khuch khat mih dak lip, đah 22 ntŭk but uănh hăn ăp ntŭk. Êng Đồng Nâi đă 3 mpôl nai dak si ntop kơl.

Thạc sĩ, nai dak si Chuyên khoa II Nguyễn Trọng Nghĩa, Groi Giám đốc Ngih dak si Nhi Đồng Đồng Nai an gĭt knŭng tâm 2 nar pah kan ta xă Hòa Mỹ n’hanh Tuy An Đông, mpôl lĕ but uănh bơi 1.500 nuĭh ƀon lan, tâm nĕ kon se dŭt âk ntưp ăp ji siăk muh, duh, brêt têh; nuĭh têh mâp âk nău mpeh ntô, hao huyết áp, khung n’hanh geh bih găih yor rhuk sôt.

Mpôl hên nchrăp dŭt uĕh, gâp djôt du rmôt nai dak si tâm nĕ geh n’ăp nai dak si nhi khoa, nai dak si nuĭh têh, nai dak si săm ngăch n’hanh du bôk ndeh wơt săm ngăch, du bôk ndeh rdêng ndơ. Têh ƀư mpôl but uănh bah gâp geh tŏng dak si. Tâm dak si geh 2 rmôt: du rmôt lah 1 rbăn dŭng dak si rnăk wâl pă an dơm kơt dak si duh, bah duh, bah ji, ji ndŭl... Tal 2 lah dak si djôt gay but uănh ji nchih săk dak si.

Tâm ban đah but uănh săm ji, nău kan dak si n’gor Dak Lak kơl lor mkra ntŭk ntô gŭ âm jêh dak lip. Ăp rmôt săm ngăch bah N’gâng kan dak si tâm rgop công an, tahen n’hanh n’gâng kan ƀon lan rwach rgum tay ndŏk nja, mkra săk mpa khĭt, răk rao-puh kaman dak dŏng. Ta ăp nkual geh dak soăt, hóa chất măch rhoai dơi puh na nao gay n’hŭch geh nuh srê kop ji. Ntu dak dơi rao koaih, puh kaman đah Cloramin B; trong kan groi nđôi ăp kop ji tâm ntưp kơt duh rtoh luh mham rih, ji ndŭl, jâng ty mbung dơi n’hao. Nai dak si Châu Trọng Phát, Groi Giám đốc Ntŭk uănh nđôi kop ji n’gor Dak Lak an gĭt:

Ăp nar mpôl hên ndâk njwêng bah 5 tât 10 rmôt, mbơh ƀư jŭr ăp ntŭk. Bah meng nău nkoch trêng ntop kơl nsum mpôl tâm nău mkra ntŭk ntô gŭ âm, răk njrăng kop ji mpôl hên n’hao ăp trong groi nđôi gay saơ ăp kop ji geh ntoh. Bah meng nĕ mpôl hên nchrăp ntĭm nuĭh ƀon ăp trong mkra gay geh tu tơm dak đăp mpăn kơt nkoch trêng mpeh răk rao đăp mpăn ndơ sông sa an nuĭh ƀon lan ta ăp ntŭk.

Knơm tâm nău lăp ndăn bah nău kan dak si ta ntŭk ndrel nău ntop kơl ngăch bah ăp mpôl nai dak si ăp n’gor, tât aƀaơ rlău 500 nuĭh ƀon lan ta ăp xă nkual dak lip dơi but uănh, săm ji n’hanh pă dak si. Ăp rmôt nai dak si hăn ăp hăn ăp ntŭk mbơh ntĭm đŏng săk soan ntĭm mât uănh ta jay n’hanh ntop kơl ndoh ndơ dak si khlay, kơl nuĭh ƀon lan n’hŭch geh nuh srê kop ji, rdâk hao tay gŭ âm n’hanh đăp mpăn nău rêh jêh dak lip.