Ta năm rlău 70, ăp nar ôi, wa Nguyễn Thị Hoàng Minh, ta Tổ dân phố 12, phường Buôn Ma Thuột, n’gor Dak Lak hôm e rĭng tât jrô tiăr nti gym êp jay gay tiăr ngăch săk soan. Wa Minh nkoch, bah năp đaơ wa tă klach nău nti gym lah hoach n’hanh mô tâm di đah nuĭh âk năm. Yơn rnôk săk soan hŭch, ƀa ƀơ ji nting n’ăng, wa dŭt n’hâm tiăr nti ăp nău nti tâm di. N’hanh bah nĕ, jrô gym jêng ntŭk kơl wa tiăr nti săk soan, tâm di uĕh aih nuih n’hâm, krêp dêh tay đah kon sau n’hanh băl bên.

Gâp tât jrô gym aơ dơi geh rlău du năm hôm. Rnôk bôk năp ri ăp oh mpôl tiăr nti geh ntop kơl n’hanh tiăr nti an mpôl hên ăp nău ƀư n’gơch. Jêh nĕ rnôk sĭt nti gâp saơ nuĭh ngăch, prăl, nsing nơm, nuih n’hâm aih rah wah n’hanh nău rêh nđơr.

Hôm đah wa Vũ Ngọc Dũng ta phường Tuy Hòa, n’gor Dak Lak, bộ môn cầu lông nkre lah nău răm, nkre lah trong an wa tiăr nti săk soan rnôk rlu ranh. Rlău 10 năm nkrêp dêh đah mâng vợt, wa lĕ geh du đêt giải ta ăp gưl, yơn nău ƀư wa răm ngăn geh nuĭh ur hăn ndrel đah nơm ta jâng gung nti.

Ta năp đaơ ri gâp pâl bóng bàn, pah play, chưng play. Yơn bah rnôk ntrong leo cầu lông âk lơn ri rlău 50 năm gâp ntơm rgâl tiăr nti môn cầu lông. Bah nĕ tât aƀaơ râng du âk giải. Tâm rnăk wâl ri ur gâp râng an bộ môn aơ, dŭt âk yor ŭch săk soan ngăch prăl lah khlay.

Lah kơt gym mô lah cầu lông an geh tach jâng gung, jrô tiăr nti ndoh ndơ ăp môn kơt thể dục dưỡng sinh lŏ geh âk nuĭh ranh săch yor geh nău âk n’hanh dơh nti. Mô kâp geh ndơ ntop kơl, ăp nău nti n’gơch, tâm rgop jâng ty n’hanh uănh nđôi n’hâm nsôr kơl nuĭh nti bĭch hăk lơn, n’hŭch ji nting n’ăng, n’hao ngăch săk soan play nuih, trong n’hâm, trong proch.

Aƀaơ hin, ta n’gor Dak Lak, âk câu lạc bộ thể dục dưỡng sinh dơi ndâk ƀư n’hanh mât uĕh na nao, nta an ntŭk pâl rlưn uĕh an nuĭh âk năm deh. Mô knŭng n’hao săk soan, tă bah nău rgum rƀŭn câu lạc bộ, ăp nuĭh hôm geh dơi tâm mâp, tâm nkoch nău blău ơm mât uănh săk soan nuĭh ranh, nta an nău răm n’hanh nuih n’hâm uĕh. Aơ lah nău uĕh kơl bộ môn aơ rêng hvi bah nkual têh tât thôn ƀon. Wa Huỳnh Thị Ban Lan, Câu lạc bộ Dưỡng sinh phường Buôn Hồ, an gĭt:

Câu lạc bộ dưỡng sinh bah mpôl hên geh 37 nuĭh, rnôk bôk năp ri rgum an răm, n’hao săk soan. Jêh nĕ phường ndâk njêng câu lạc bộ n’hanh kuăl jă lĕ rngôch ăp oh yuh râng, nsĭt tay nău răm đah nuih n’hâm n’hanh săk soan. Rnôk ta phường geh ăp bôk nău ƀư ri oh yuh ndrel râng n’hanh ƀa ƀơ hăn tâm nđŭr đah câu lạc bộ thể thao bah n’gor Dak Lak.

Đah trong way ƀư “Rêh răm, rêh ngăch dăng, rêh geh nău uĕh”, câu lạc bộ nuĭh âk năm deh tâm n’gor lĕ ndâk ƀư trong nchrăp rgum rƀŭn, ƀư ăp nău nti tâm di đah săk soan, nău ŭch n’hanh ndơ geh bah tĭng nuĭh. Tă bah nĕ, ntrong leo thể dục thể thao bah nuĭh âk năm deh nar lơ hun hao, rgop n’hao săk soan n’hanh krêp dêh nsum mpôl. Tĭng wa Triệu Thị Ngoan, Kruanh Hội nuĭh âk năm deh n’gor Dak Lak, jêh nglăp nsum, bôl mô đăp mpăn mpeh ƀư yơn ta ăp hội bah dâng ta năp đaơ, ăp ntrong leo bah nuĭh âk năm deh hôm e dơi mât ƀa ƀơ.

Bôl aƀaơ Rmôt nuĭh âk năm deh mô hŏ dơi ndâk njêng ta 102 xă, phường mhe yơn ta âk rmôt bah dâng ơm ri ăp u che hôm e mât trong leo n’hanh ƀư âk nău kan geh nkô̆ nău kơt tâm nđŭr văn hóa, njroh mprơ, thể dục thể thao, thể dục dưỡng sinh, tâm nđŭr pah play ka su,... gay wăch rgum nuĭh âk năm deh râng. Tă bah nĕ nuĭh âk năm deh dơi tiărr nti săk soan, rêh răm, rêh ngăch prăl, rêh uĕh lăng.

Aƀaơ, n’gor Dak Lak geh bơi 290 rbăn nuĭh âk năm deh. Ndrel đah nău hun hao dăng bah ăp ntrong leo thể dục thể thao n’hanh nău uĕh ngăn ngên nsĭt geh, nar lơ âk nuĭh âk năm deh dŭt n’hâm râng tiărr nti. Ăp ntŭk pâl nĕ mô knŭng kơl khân pơng ngăch dăng, ŭch nău rêh ma hôm rêng hvi nuih n’hâm rêh uĕh, rêh răm-ngăch prăl-geh nău uĕh.