Dak si dak gŭn ndrel đah văn hóa, ntĭm nti lah ăp n’gâng tơm dŭt khlay, mô knŭng lah rnoh an ma hôm nuih n’hâm gay hun hao nuĭh kan. Nĕ lah ntoh ngơi bah Tổng Bí thư Tô Lâm rnôk Quốc hội tâm nchră ta rmôt mpeh 2 bôk nău kan rƀŏng tĭng lam dak mpeh mât chăm săk soan, rnoh nuih n’hanh hun hao n’hanh bôk nău kan rgâl mhe, n’hao uĕh ntĭm nti lvang 2026-2035. Tĭng Tổng Bí thư, nău rƀŏng lam dak mô knŭng êng nău kan ntĭm nti n’hanh dak si, ma bah lĕ kon nuĭh, lam ƀon lan an lăp. Đah dak si, Tổng Bí thư dŭt đă rgâl tơm khlay rgâl an mât uănh săk soan bôk năp n’hanh nchrăp, mkra tât tu tơm ăp nkô̆ nău ntŭk ntô gŭ âm, dak kloh uĕh, đăp mpăn ndơ sông sa-ăp nkô̆ nău tă bah luh kop ji. Lah mô nkra tât lôch, bôl ntuh kơl tay ndâng âk ngih dak si mô dơi tŏng nău ŭch.

Đah dak si dak gŭn, khlay lah mât chăm săk soan bôk năp, an ndơ̆ nchrăp lor. Hôm aƀaơ hin dôl hăn âk but uănh săm si, kơt dôl săm lor dơm-yor nchrăp lor mô jăp jêng ji hao. An mĭn lah tĭng ntil nău ngoăy, moh ndơ nău dôl hôm e? 5 năm tay he geh dơi trok đŏng lah mô? an dŭt na nê̆ m’hâm ƀư. Ji djăt ta lam ntŭrneh jăng lơi jŏ hôm, an moh ntŭk ntưp njrăng dŭt hoach prăk. Viêm gan m’hâm, ntưp m’hâm? Gâp an lah bôk nău kan lam dak an hăn lăp ăp nău na nê̆, ăp nău rƀŏng.

Bôk nău kan rƀŏng tĭng lam dak mpeh săk soan, rnoh nuĭh n’hanh hun hao lvang 2026-2035 dơi Quốc hội mbơh an, đah nău rƀŏng lĕ rngôch lah đăp mpăn ăp nuĭh ƀon lan dơi mât uănh da dê, mât chăm săk soan bôk năp, njrăng n’gang ji bah ơm, bah ngai, ta bah dâng dâl, n’hŭch kop ji; n’hao rnoh deh, nsrôih rnoh bu ur bu klô rnôk deh geh tâm bah rnôk deh, tâm di đah rnoh ranh, n’hao uĕh rnoh nuĭh; n’hao mât uănh săk soan an ăp rmôt dơh geh khuch; rgop n’hao săk soan, nuih n’hâm, rup săk, năm rêh n’hanh uĕh nâp nău rêh bah nuĭh ƀon lan, ndâk njêng neh dakViệt Nam n’hanh ngăch dăng.

Mpeh nău ntrŭnh ntuh kơl Bôk nău kan rƀŏng tĭng lam dak mpeh mât chăm săk soan, rnoh nuĭh n’hanh hun hao lvang 2026-2035, bôk nău kan rƀŏng tât mât uănh săk soan lam ƀon lan, n’hao blău kan dak si ta bah dâng, njrăng n’gang kop ji bah ơm, rgâl uĕh nâp nuĭh ƀon lan, rdâng ranh ngăch n’hanh ntop kơl an rmôt dơh khuch. Kruanh N’gâng kan dak si Đào Hồng Lan an gĭt:

Mpeh ăp nău nchrăp ƀư, nkô̆ nău pah kan bah bôk nău kan, lĕ rgum nuĭh kan gay mbơh ƀư tĭng. Nkô̆ nău khlay gay n’hao uĕh bah dak si ta bah dâng, dak si nchrăp rdâng, ntrôl dăng trong kan rnoh nuĭh, hun hao tŏng ăp uĕh tam rnoh nuĭh, tâm di đah ngăch ranh rnoh nuĭh, mât chăm nău rêh jêng an ăp nuĭh dơh khuch. Aơ lah ăp nkô̆ nău, n’gâng tơm, bah trong dak si n’hanh rnoh nuĭh, dôl an dơi rgum nuĭh kan gay dôh rklaih jêr jŏt, wăk kol tâm rnôk mbơh ƀư tĭng. Ăp ntŭk kol gay mbơh ƀư geh ăp nău rƀŏng trong kan têh lĕ nkoch an nghị quyết trung ương.

Nău rƀŏng na nê̆ bah Bôk nău kan rƀŏng tĭng lam dak mpeh mât chăm săk soan, rnoh nuĭh n’hanh hun hao lvang 2026-2035 rgop ƀư tĭng nău rƀŏng rnoh xă, phường, đặc khu geh Kôp rnoh an ƀư lam dak mpeh dak si xă lah 90% tâm năm 2030 n’hanh 95% tât năm 2035. Nsrôih rnoh nuĭh dơi geh samƀŭt săk soan điện tử n’hanh mât uănh săk soan tĭng bong nău rêh geh 100% bah năm 2030. Rnoh ntŭk uănh nđôi kop ji ăp n’gor, nkual ƀon têh tŏng dơi xét nghiệm tác nhân, kháng nguyên, kháng thể ăp nău ji tâm ntưp klach, dak kloh uĕh, răk ngih samƀŭt tĭng nău ntrŭnh bah n’gâng kan dak si tât năm 2030 geh 100%. Rnoh ngih dak si xă, phường, đặc khu mbơh ƀư tĭng nchrăp rdâng, mât uănh, săm du đêt ji mô tâm ntưp tĭng nău ntĭm bah N’gâng kan dak si tât năm 2030 geh 100% n’hanh mât na nao tât năm 2035. Rnoh brêt têh  kon se bah dâng 5 năm tât năm 2030 hŭch jŭr bah dâng 15% n’hanh tât năm 2035 hŭch jŭr bah dâng 13%.