Ăp nar dŭt năm, Nkual mât ndrăy bri dak Kon Ka Kinh wơt mpôl kruanh n’gor Gia Lai na nê̆ hăn ta ntŭk, uănh nu nău bri, ăp ntil si dak n’hanh nchrŏng trong hun hao pâl nđaih si dak. Jêh bơi du mông hăn bri, uănh saơ nău âk ntil sinh học n’hanh nău uĕh geh ơm, Kruanh UBND n’gor Gia Lai Phạm Anh Tuấn rhơn ta năp ntŭk ntô geh ơm kơt kăl e.

Dơi lah, Bri Ngih dak Kon Ka Kinh lah mpa khlay geh ơm an mô knŭng an Gia Lai, ma hôm an Việt Nam n’hanh lam ntŭr neh. Aƀaơ, mpôl pah kan geh tŏng ăp n’gâng kan, nău kan n’hanh ntŭk kan pâl nđaih ndrel hăn uănh gay mĭn joi trong mkra nkre mât ndrăy, nkre ƀư uĕh lơn nău khlay pâl nđaih, nkre jă băl mpôl lam ntŭr neh tât hăn uănh nkual sinh quyển uĕh aơ.

Wa Ngô Văn Thắng-Giám đốc Bri ngih dak Kon Ka Kinh an gĭt, bri lah ngoăy tâm âk tring si dak ntoh lư ngăn bah njok Trường Sơn. Đah hang rhiăng ntil si têh, ăp ntil mpô mpa bri khlay n’hanh âk trong uĕh ơm, Kon Ka Kinh geh tŏng ăp ndơ gay jêng ntŭk tât si dak uĕh ngăn bah Gia Lai. Năm tât, nchrŏng trong bah ntŭk kan hun hao pâl nđaih si dak, kơl joi nău rêh pâl nđaih nâp nâl an ƀon lan ta ntŭk n’hanh rgop mât njrăng bri nâp nâl.

Năm tât, mpôl hên mbra ntrôl dăng mât uuănh gay mât ntŭk ntô, nău khlay bri rhŏ an trong kan mât ndrăy; nkre n’hao tâm rgop đah ăp ntŭk kan lữ hành ndâk njêng du đêt ndơ, nău rhŏ n’hanh ntung trong rhŏ an năch; rlong ƀư du đêt tour-trong hăn geh nău ntĭm nti, mĭn njêng; mpla nsơ rup ndah mir tât ăp viện, ngih samƀŭt. Mpôl hên mbra ndâk ƀư ngih samƀŭt rhăch nău, nău nchrăp gay dăn đă ntuh kơl jêh ntung trong, rhŏ an uĕh ngăn ân năch pâl nđaih.

Ndrel tâm trong si dak pâl nđaih ntŭk ntô uĕh đah Kon Ka Kinh lah trong lŏ ntung gung Đăk Tơ Pê (xă Kdang), ƀah mô ngai nkual têh Pleiku. Tâm rup gui duh nar kêng măng, n’ăp ntŭk ntô kơt ntoh yor ăp mpơng êr-pŭt-uk tâm srah, jêng du rup gui yôk prêh hvi. Nău uĕh nĕ ƀư ntŭk aơ mbrơi jêng ntŭk tât, check-in, chŭp rup bah âk năch. Gĭt saơ kloh nău geh ơm, Đảng bộ, n’gâng kan ƀon lan xă Kdang, n’gor Gia Lai dôl ntơm nchrŏng trong hun hao ăp tour pâl nđaih nsum mpôl, năch pâl nđaih ƀư ngăn hăn ndrel đah ntŭk ntô geh ơm uĕh. Wa Lê Thị Huệ, Bí thư Đảng ủy, Kruanh HĐND xă Kdang an gĭt:

Xă dôl hăn uănh n’hanh mbra kuăl jă ntuh kơl tâm năm tât. Xă mpŏng ŭch năm 2035, nkual pâl nđaih aơ mbra hăn lăp dŏng, lah ntŭk tât bah năch dăch ngai.

Aƀaơ, t nkual yôk prêh mpeh bah lơ nhâp nar n’gor Gia Lai dŏng ndơ geh ơm têh ngăn an hun hao pâl nđaih si dak đah âk ntŭk uĕh, geh âk nău uĕh bah bri lâng dak rngot. Biển Hồ-đôi mắt Pleiku, mât nău ƀư khlay tâm nuih n’hâm ƀon lan n’hanh năch pâl nđaih. Măt dak lâng sol gui tŭk, ăp tơm n’ho têh rhiăng năm jêng du ntŭk rup gui nkre têh hăng nkre rbân r’ên. Tă nĕ mô ngai, yôk ŭnh Chư Đang Ya lah ntŭk tât uĕh bah druh ndăm n’hanh ăp nuĭh chŭp rup n’hanh nuĭh ƀon lan ăp yan nkao êr dang. Nô Nguyễn Việt Cường, chŭp rup bah Hà Nội, nkoch nău uĕh rnôk rơh bôk năp jôt jâng tât nkual neh aơ:

Ngăn ngên dŭt ŭch, dŭt uĕh. Gâp mpŏng ƀon lan mbra hun hao ntŭk aơ, gay âk nuĭh dơi tât uănh âk lơn tay.

Gay nta an hun hao, ăp năm dăch aơ, Gia Lai lĕ ntuh kơl lôch jêh trong tât ăp nkual mât ndrăy n’hanh ntŭk têh khlay; dăp tay ăp nău rhŏ ntoh êng ta ăp ntŭk check-in; nkre n’hao uĕh nuĭh ntĭm nsum mpôl n’hanh rgop tâm di dăp rgum wơt năch ta ăp ntŭk pâl nđaih si dak. Knơm pơk hvi nău ƀư ntrôl ngăch, Gia Lai lĕ ntoh na nê̆ lơn ta ăp trong pâl nđaih 2 nkual Tây Nguyên-Duyên hai miền Trung, jêng luh ndơ âk ntil bah trekking, hăn uănh bri, ƀư ngăn lŏ mir tât pâl nđaih dak n’glău-yôk bri-văn hóa. Năm 2025, n’gor lĕ wơt rlău 10 rkeh năch, du gâl mô đêt tâm rnoh nĕ bah ntil pâl nđaih si dak ta mpeh bah lơ nhâp nar. Wa Đỗ Thị Diệu Hạnh-Giám đốc N’gâng kan Văn hóa, Thể thao n’hanh Pâl nđaih Gia Lai an gĭt, tâm, lvang 2026-2030, pâl nđaih dơi mĭn lah ngoăy tâm âk nău khlay wăng sa bah n’gor:

Rgum mât ndrăy, mât uĕh ăp nău khlay văn hóa, ntŭk ntô uĕh, lịch sử. Rgum ndâk ƀư mpla nsơ moh êng ndơ bah pâl nđaih, rgum boăt nthoi Đông-Tây, hun hao pâl nđaih dak lêng, pâl nđaih nsum mpôl, pâl nđaih ƀư ngăn. N’glêh dŭt lah nta an nuĭh kan hun hao pâl nđaih, ƀư luh ăp ndơ pâl nđaih uĕh tâm rgŏ năp.

Hun hao pâl nđaih si dak dôl pơk luh an Gia Lai du trong hăn nâp nâl, gay nâm ơm dơi mât, nău khlay ta ntŭk dơi kuăl dâk, nkre nta joi nău rêh jŏ jong an nuĭh ƀon lan. Nĕ lah n’gâng tơm gay Gia Lai hun hao wăng sa ƀon lan tĭng trong uĕh nđĭr n’hanh nâp nâl tâm rgŏ năp.