Ăp nar aơ, ta trong n’har bri xă Quảng Trực, n’gor Lâm Đồng, ntơr ang cờ chăng manh gŭr nklang bri uĕh nđĭr n’hanh mir cà phê, mắc ca, tiêu. Măng tât, ŭnh điện ang ta âk trong hăn. Nĕ lah ndơ ƀư “Mpoh ang trong n’har bri” yor Mpôl druh ndăm xă Quảng Trực ƀư. Nô Y Nhật Minh-Groi Kruanh Ủy ban MTTQ, Bí thư Đoàn xă an gĭt, lam xă lĕ nglăp rlău 5 km trong điện mpoh ang, rgop đăp mpăn rnă njrăng, gay ƀon lan đăp mpăn. Nkhêp di rhơn năm mhe-rhơn Đảng, druh ndăm n’har bri Quảng Trực râng uănh nđôi n’har bri ndrel tahen n’har bri n’hanh ƀư ăp nău văn hóa, njroh mprơ, tŭr chĭng-njroh xoang, jêng mông nar răm m’ak.

Tâm ban đah nău kan mât nâp n’har bri, Đoàn xă Quảng Trực hôm ndơ̆ văn hóa way ơm plơ̆ tay tâm rgum rƀŭn đoàn. Ăp nar rgum rƀŭn hăn ndrel chĭng gông, nău mprơ bunong lĕ kơl rnoh đoàn điên râng rgum rƀŭn ƀa ƀơ hao bah 60% tât rlău 85%. Năm tât, Đoàn xă mbra pơk hvi tay ntrong ƀư mpoh ang trong n’har bri, ƀư âk rmôt druh ndăm nkre uănh nđôi, nkre nkoch trêng gay ăp đoàn viên geh nău kan na nê̆, hăn ndrel rlău đah ƀon lan bah nơm.

Uĕh lăng năm mhe dôl hôm e ta xă Thuận An, n’gor Lâm Đồng, ntŭk ntrong leo văn hóa, njroh mprơ druh ndăm dơi mât na nao. Nô Y A Rôn-Groi Bí thư Đoàn xă an gĭt, bah năm 2022 tât aƀaơ, nô lĕ na nê̆ ƀư rlău 20 nar rgum rƀŭn, trêng ntĭm nău mprơ Bunong, wăch rgum hang rhiăng nuĭh đoàn viên, druh ndăm rchong râng. Âk băl mom bah ntŭk mô gĭt mprơ aƀaơ lĕ dơi tâm ơh, mprơ tâm ăp rơh lễ hội bah ƀon lan. Năm 2025 mhe rlău, nô Y A Rôn lap râng đại hội đại biểu druh ndăm Việt Nam đah “Trong hăn chăng-mĭn njêng, nti nsơm bah druh ndăm” ta Trung Quốc. Nô nkoch:

Rơh hăn kơl gâp pơk luh âk nău, lơn lah saơ kloh lĕ nău kan bah druh ndăm Bunong tâm rơh mhe. Dơi mâp âk nuĭh dơi tâm nđŭr nti ăp nău uĕh bah ăp băl tâm dak n’hanh dak bah dih. Năm tât, he mbra ndâk njêng tay ăp câu lạc bộ nău mprơ druh ndăm, nkre quay clip, ndơ̆ nău mprơ Bunong tâm mạng xã hội gay âk nĭt lơn, gay ăp rơh druh ndăm ntô̆ n’hao n’hanh mô chuêl tu tơm bah nơm.

Ndrel đah ăp nău ƀư văn hóa, âk druh ndăm Bunong ta Lâm Đồng lĕ janh ndâk njêng nău kan bah nău uĕh rnoi mpôl đêt. Ta ƀon Bu Dak, xă Thuận An, H’Her, bu ur druh nuĭh Bunong, lĕ hun hao ntrong ƀư cheh tanh, nta nău kan ƀa ƀơ an rlău 10 oh yuh, đah nău geh rlău 5 rkeh prăk du hê du khay. Tĭng nău ŭch dŏng mhe, yuh ndơ̆ ndơ tâm Facebook, Zalo, TikTok, ƀa ƀơ livestream nkoch mbơh ndơ. Yuh H’Her an gĭt: ntrong ƀư aơ lĕ geh giải 3 ta rơh tâm rlong Bu ur rdâk njêng nău kan n’gor Dak Nông (ơm).

Gâp ŭch oh yuh gĭt tanh geh prăk đăp mpăn, kônh wa mbra mât êng nău kan. Gâp mpŏng ndơ cheh tanh Bunong mô knŭng tach tâm dak ma hôm ntoh ta ăp ntŭk tăch điện tử lam ntŭr neh, gay âk nuĭh wât n’hanh ŭch lơn văn hóa rnoi nuĭh nơm.

Tâm ntil nău nghệ thuật, Ca sĩ Điểu Náp Bunong-aƀaơ pah kan ta nău kan văn hóa n’gor Dak Lak, lĕ săch mĭn ƀư mhe nghệ thuật ƀư ntung nthoi ndơ̆ văn hóa Bunong tât êp đah ƀon lan. Tâm ăp nău mprơ, nô joi ndơ way ơm Bunong, tâm rgop âm nhạc mhe n’hanh chĭng gông Tây Nguyên, jêng nău uĕh ơm, geh âk trong rêng hvi. Ca sĩ Điểu Náp Bunong nkoch nău răm: mhe rlău ban nhạc Nap Bunong Band bah nô geh giải A nău ƀư way ơm mhe n’hanh nhạc nhẹ ta Tâm nđŭr ăp ban Nhạc n’gor Dak Lak pơk hvi năm 2025. Kênh Youtube “Điểu Náp Bunong Official” đah ăp nău ƀư njroh mprơ nghệ thuật uĕh, tâm nĕ saơ kloh nău ntĭt mpơl bah văn hóa Bunong lĕ wăch rgum nău uănh bah âk băl druh ndăm.

Du tác phẩm gâp râng ŭch kơl nuĭh druh ndăm wât da dê văn hóa Bunong mô di lah nău bah kăl e ir, ma dôl rêh tâm nău rêh aƀaơ. Năm tât, gâp ŭch geh tay âk tác phẩm nkoch nău rêh mhe bah ƀon lan, gay văn hóa dơi nthoi du trong geh êng.

Bah ăp ndơ ƀư “Mpoh ang trong n’har bri”, tât nău ndâk njêng nău kan bah cheh tanh, mĭn ƀư mhe nghệ thuật djôt tay n’hâm têh hvi, ăp nău ƀư nâp nâl bah ăp băl druh ndăm Bunong dôl rgop ƀư rgâl muh măt ƀon lan, gay nău way ơm hăn ndrel rgâl mhe. Lăp tâm năm mhe Bính Ngọ 2026, druh ndăm nuĭh Bunong rêng hvi tay nău ŭch nsơr, ndrel ty ndâk njêng ƀon lan đăp mpăn, geh âk nău uĕh, mât nău nsing nơm rgŏ năp uĕh ang nâp nâl bah Tây Nguyên.