Nuĭh Bunong ta xã Quảng Trực, n’gor Lâm Đồng way geh ryơk n’hao lah nkual căn cứ Cách mạng. Mât kơl tât nau rêh nkual n’har bri, ăp năm ba năp, Bôk nău kan nkô̆ mpŏng ngih dak mpeh n'’ huch ach o nâp nâl lĕ geh ntuh kơl rdâk njêng ƀư lôch trong ndeh hăn, dak bât, ndrel đah bôk nău kan jut jăng ngih rông mpông sat, kơl an ƀon lan đăp mpăn nău pah kan jan sa. Wa Thị Brao, nuĭh geh nău knơm ta ƀon Bu Prăng 1, xã Quảng Trực an gĭt, ƀon lan nuĭh Bunong way n’hao nău ơm cách mạng, tâm rnglăp rdâk njêng ƀon tơm lơ ma têh ndrŏng. “Di rơh năm mhe, gâp ŭch ƀonlan săk dăng lăng ngăch, tâm rnglăp, tâm pêt tâm kơl, mô tâm nglah tâm mưch, ndrel an hun hao nău pah kan jan sa mât nău ueh êng rnoi nơm bâh ƀon lan. Ƀon Bu Prăng 1hên aơ lah nkual căn cứ cách mạng, bâh kăl e ƀon lan mât rbăy n’hanh n’hao ăp ndơ way ueh ơm tâm nău rêh. Nău rêh bâh ƀon lan ăp nar lơ ma đăp mpăn, ƀon lan geh nău mât kơl, rgŏ jă kon său hăn nti, kơt nti khoa học kĩ thuật, dŏng tâm nău pah kan jan sa gay ma n’hao nău geh tơm cao su, cà phê. Bâh nĕ, ntop rdâk njêng nău rêh lơ ma hơm răm, đăp mpăn”.

 Nuĭh ƀon lan Bahnar ta xã Ia Băng n’gor Gia Lai, vơt năm mhe Bính Ngọ đah nău răm hơm bâh nău rgâl mhe lĕ rngôch. Bâh ntơm kanŭng gĭt ƀư ba, aƀaơ ƀon lan lĕ kơt nti, dŏng ăp nău mhe tâm nău khoa học kĩ thuật tâm nău mât rong, tăm tơm công nghiệp..geh nău geh âk. Điện, trong, ngih nti geh ntuh kơl rdâk ƀư ueh, têh, kloh, âk rnăk lĕ geh rvăt năp ndeh ô tô, máy móc kơl an nău pah kan jan sa n’hanh ăp ntil ndơ dŏng…Nău rêh ƀon lan geh n’hao, nău knơm ta Đảng, Ngih dak, lơ ma nâp nâl. Săo geh nău rgâl mhe aơ, wa Đĭnh, nuĭh ƀon lan ta ƀon Biă Tih, xã Ia Băng an gĭt. “Aƀaơ, bâh geh tăm cà phê, rnoh khlăy cà phê hao, dŭt âk nuĭh ta ăp ƀon, nuĭh rĭ rvăt ô tô, rvăt máy cày, êng ndeh máy rĭ lĕ rngôch ăp rnăk geh da dê, ăp nuĭh geh da dê. Nău rêh aƀaơ dơh ngăn, nău aơ lah bâh geh kơt nti kan oh nô yuan jêng nău rêh lĕ geh hơm răm đăp mpăn lơn âk ngăn.

Ta xã Ngọk Tụ n’gor Quảng Ngãi, nô A Xương nuĭh Xơ Đăng, lah đảng viên mom, Kruanh rnâng kan leo kan Mặt trận nkre kan kruanh rmôt kan rnă njrăng Thôn Đăk Pung. Nô an gĭt, thôn ƀon hun hao nâp nâl bâh geh rgâl nău mĭn, nău kan, ƀư ueh nău ntrŭnh bâh Đảng, nău kơl pháp luật bâh Ngih dak, tâm rnglăp, tâm kơl tâm nău rêh. “Aƀaơ, ƀon lan ta ntŭk lĕ geh gĭt dăch đah âk nău mbơh mhe, rgâl mhe rnoh mbrô…Rnôk geh nău ntrŭnh bâh Ngih dak hên geh mbơh tơih, rgŏ jă an ƀon lan gĭt mpeh công nghệ mbrô, nău nchih mbơh rnoh mbrô mpeh rnoh ƀon lan, ntĭm ƀon lan gĭt vât n’hanh dŏng công nghệ, taỉ app VneID, ntĭm ƀon lan dơh nơih tâm nău geh gĭt đah ăp nău kơl bâh ngih dak mpeh mbơh nău mhe, ăp nău kan ƀư săm ƀŭt êng săk nơm, rnăk vâl…Gâp dŭt rhơn aƀaơ ăp rnăk tâm thôn ƀon lĕ geh rgâl nău mĭn trong kan, nănh geh rgâl nău tuch tăm mô jêng ta nroh neh gay ma tăm tơm công nghiệp geh rnoh khlăy âk, kơt cao su, cà phê n’hanh du đê̆ tơm tăm êng. Ƀon lan nsrôih pah kan jan sa an hun hao nău rêh jêng.

Rhơn đah nău rêh ăp nar lơ ma rgâl mhe, wa Nay H’Thu, Groi Bí thư Chi bộ ƀon Tong Sê, xã Ia Pa, n’gor Gia Lai, rhơn nkoch an gĭt, đảng viên an geh hăn lor bôk năp tâm ăp nău kan gay ma ƀon lan lơ ma hơm răm:“Năm ơm lĕ rlău,năm mhe hŏ tât, nău ŭch bâh hên lah rnăk vâl an geh ngăch dăng, đăp mpăn ueh lăng. Gâp ŭch ăp oh mon kon său gơih nti gay ma ba kơi tay jêng ăp nuĭh gĭt blău an  ntŭk rêh jêng. Săk gâp nơm way geh nkah êng an geh rêh ueh, mpŏng let năp, ƀư ueh an ƀon lan tâm nău ƀư tĭng, ndrel hun hao wăng sa, rdâk njêng nău rêh ueh lơn”.                

Nkoch nău sa Tết, wa Y Tloi Niê, kruanh ƀon Cư̆ Păm, xã Dăng Kang, n’gor Đăk Lăk an gĭt, năm mhe nơh ƀon lan tâm ƀon geh âk nău jêr jŏt yor trôk nar mih sial. Geh nău mât kơl bâh ngih dak, ƀon lan lĕ đăp mpăn nău rêh vơt naem mhe. Wa ŭch năm mhe nău rêh bâh ƀon lan ta nkual geh mih sial dak buk ueh lơn. “ Gâp knơm tâm năm mhe, Ngih dak kơl tay gay ma ƀon lan mpŏng tât hơm răm. Ta meng nĕ, gâp lĕ geh tay ăp nău kơl an ăp bu gru tur chĭng, kơl an khân păng geh tay nău nsrôih mât rbăy n’hanh n’hao nău ueh êng mpôl rnoi”.

 Năm 2025, Mom ndăm xã Hoà Ninh, n’gor Lâm Đồng lĕ geh mbơh âk nău kan khlăy ngăn ngên tâm nău rêh. Ntŭk kan lĕ tâm rgop đah Ngih nti Đại học Đà Lạt rdâk njêng 2 nău kan “Mpoh ang trong ƀon” ta thôn 5a n’hanh 10a; nkre lah pă an rhiăng nklâm ndơ geh săm ƀŭt, ndơ dŏng nti an kon hoc ach o rlet rlău nău jêr jŏt, leo ƀư mbơh tơih rgŏ jă mpeh njrăng rdâng ma tuý, nău tâm lơh ta ngih nti đah mom ndăm. Đoàn thanh niên xã tât râng mât uănh săk rnglăy rnoh prăk manh bâh ngân hàng chính sách xã hôị đah rnoh rnon 30 rmen prăk kơl an rhiăng mom ndăm geh ntŭk knơm nâp nâl gay ma hun hao pah lan kan sa, tăch rgâl. Yuh Ka Sôi- Bí thư Đoàn thanh niên xã Hoà Ninh n’gor Lâm Đồng an gĭt: “Gay ma rgâl nău rêh an ƀon lan nkual yôk, gâp ŭch ngih dak an geh tay nău kơl kan ntrôl an văn hoá n’hanh ntĭm nti cán bộ lah nuĭh rnoi đê̆ ta ntŭk. Đah mpôl kan mom ndăm, gâp nkah ăp băl kahgĭt nău wa Hồ nti mpeh nău dơi dăng bâh nău tâm rnglăp. Ăp bu ndăm an lah du hê nuĭh ntoh ang gơih pah kan jan sa, ntop kan âk an săk soan nơm gay ma rdâk njêng ƀon tơm. Kanŭng geh nău tâm rnglăp dơn ngoăy du nuih n’hâm, he mơ geh mât rbăy nău ueh n’hanh ndơ̆ ƀon lan hăn hao”.

Nglăp nsum bâh ăp xã Gia Bắc, Sơn Điền (ntơm nơh), xã Sơn Điền mhe bâh rnăk dŭt ach o ngăn ta n’gor Lâm Đồng, đah âk rnoi đê̆ nuĭh. Ta nkual njônh ngai, mom ndăm ta xã dôl n’hao soan mom gay ma rdâk njêng ƀon tơm. Yuh Ka Hành- Bí thư Đoàn Thanh niên xã Sơn Điền, an gĭt, kahgĭt nău ntĭnh bâh wa Hồ. “Du năm ntơm bâh yan puh, du nău rêh ntơm bâh mom ndăm, mom ndăm lah năm mhe yan puh bâh ntŭk rêh jêng”. Mpôl kan mom ndăm xung kích tâm ăp nău kan tâm rlong.“Tâm năm mhe 2026, gâp ŭch geh âk nău mhe lơn. Nĕ lah nău rgum ăp mpôl kan gay ma kơl an rnăk oh kon se hôm nha jêr jŏt, ntŭk leo kan ăp nău kan văn hoá, thể dục thể thao, tâm ban kơt nău ŭch njêng câu lạc bộ chĭng gong an ăp oh kon se ta aơ. Ăp nău êng mpôl hên nchrăp dơn lĕ âk nău kan mom ndăm, trong cơ “ang-nđir- kloh-ueh”, tăm kao ta ntŭk rup nkah ndrăy ăp Anh hùng liệt sĩ xã Sơn Điền; leo ƀư nău kan njrăng rmok dak an oh kon se jê̆...Gâp ŭch mom ndăm he an geh nsrôih nti tât dŭt tât lôch gay ma geh gĭt nău mhe, gĭt trong kan, hun hao an rnăk vâl n'hanh ƀon lan nơm"”.

Yuh H’Vinh, mom ndăm xã Đức An, n’gor Lâm Đồng lah ngoăy tâm âk nuiưh ntoh lư, nsrôih tât râng tâm ăp nău kan tâm rlong ta ntŭk. N’hao nău pah kan bôk năp hăn lor bâh mom ndăm tâm nău ƀư tĭng Nghị quyết Đại hội Đảng ăp gưl, H’Vinh ndrel đah âk đoàn viên, mom ndăm tâm ƀon hăn bôk năp pah kan, jan sa, rdâk njêng nău rêh văn hoá, ntop rdâk njêng ƀon lan ăp nar lơ ma rgâl mhe, hun hao nâp nâl. Yuh H’Vinh nkoch. “Năm 2025 lah du năm geh âk nău dơi bâh neh dak he, mpơl saơ nău dơi bâh Đaị hội Đảng. Bâh ăp nău mpŏng kan tâm di bâh Đại hội, ndrel đah nău leo kan uănh kan na nê̆ bâh Đảng uỷ xã, ta ntŭk lĕ mât kơl lĕ rngôch nău hun hao wăng sa, rêh jêng, văn hoá bâh ƀon lan, bâh nĕ njêng nău rgâl mhe ueh, klơh aih tâm nău rêh ƀon lan. Lah mom ndăm, nsrôih pah kan Đoàn ta ntŭk n'hao nnăuway hăn bôk năp bâh mom ndăm, ntop săk soan nơm ta nău hun hao bâh ƀon lan.