- Bôk năp, dăn rhơn Ca sĩ Điểu Náp Bunong đah ăp nău dơi geh ntoh lư tâm năm mhe nơh.

Ca sĩ Điểu Náp Bunong: “Ơ, tâm năm 2025, ban nhạc “Nap Bunong Band” bâh hên geh giải A ta Liên hoan ăp ban nhạc n’gor Đăk Lăk pơk hvi. Mhe nơh gâp hăn mprơ ta âk ntŭk kơt Bến Tre, Hà Nội, nkuăl ƀon têh Hồ Chí Minh, Đăk Lăk..Tât ăp ntŭk nĕ gâp geh mbơh ăp ntŭk ueh ta nkual neh Bunong n’hanh mbơh mpeh chĭng gong, ndơ nsoh, ndơ sa, đâp ma ndơ dong pah kan bâh u che kăl e bâh rnoi nơm an ăp băl êng gĭt.

- Dơi gĭt, mê kon Bunong ƀon tơm ta Dak Ndrung, n’gor Đăk Nông (ơm), aƀaơ lah xã Đức An, tỉnh Lâm Đồng, yơn ntoh lư bâh Đoàn ca muá nhạc n’gor Đăk Lăk. Mơh ntơm jêng ndơ̆ mê tât đah nău kan văn hoá ta Đăk Lăk nĕ eh?\

Ca sĩ Điểu Náp Bunong: “Gâp ntơm nti ta Ngih nti Cao đẳng Văn hoá Nghệ thuật ngor Đăk Lăk, tốt nghiệp Trung cấp năm 2014 n’hanh lôch nti đại học liên thông ta năm 2019. Lôch nĕ, gâp pah kan ta Đoàn Ca muá nhạc n’gor Đăk Lăk. Tâm nău kan nghệ thuật, gâp tĭng dòng nhạc Tây Nguyên, nkre lah tâm rgop đah nhạc mhe  gâp dŏng chĭng gong n’hanh ăp ntil ndơ uh goh way ơm bâh nuĭh Bunong. Nău kan aơ nkre geh ntop mât rbăy nău ueh văn hoá, mât geh nău êng bâh nău mprơ Bunong, nkre kơl an ăp nău mprơ tâm di n’hanh dơh đah băl mom djăt.

-Lah ndrĭ tâm nău ntơ săk mê geh Bunong, rlong mê rblang na nê̆ nău ntơ săk nĕ?

Ca sĩ Điểu Náp Bunong: “Gâp pah kan tâm nău kan văn hoá jêng gâp ntơ lah Điểu Náp Bunong, nău ŭch lah rnôk bu nkah tât Điểu Náp rĭ bu gĭt gâp lah nuĭh Bunong hôm ntơ lah M’nông, jêng gâp ntơ săk Bunong ba kơi an ăp nuĭh dăch ngai gĭt tât Bunong âk lơn, djăt ntơ săk lah bu gĭt hôm.

- Ơ, kơt nĕ mhâm mê mbơh nău ueh Bunong he ta nău kan nghệ thuật mê eh?

Ca sĩ Điểu Náp Bunong: “Gâp nơm mô rlu kơt nti, joi gĭt n’hanh mât rbău nău ueh êng bâh rnoi nơm, bâh nău tâm pât, nău nkoch ndrong tât ăp nău way ơm. Bâh nĕ, gâp ŭch gĭt âk lơn tât nău khlay Bunong n’hanh mbơh ăp nău ueh nĕ tât băl mpôl ta mạng xã hội. Nău ueh rnoi nơm bâh u che nklơi tay rĭ tât rơh ba kơi an geh mât mô an chuêl, nău ueh êng lah du nău ueh ma tĭng he lĕ nău rêh, bâh rơh aơ tât rơh êng gay ma bu gĭt he lah Bunong.

- Ơ, dŭt ueh ngăn rnôk me geh gĭt mprơ naư mprơ mhe nkre lah ndơ̆ nău gĭt mhe nĕ kơl an nău ŭch rŏng đah nău way ơm he nơm. Tĭng mê mĭn, mhâm ƀư gay ma trĕ lam , nti trêng an ăp kon se mât rbăy nău ueh rnoi he nơm mêh?

Ca sĩ Điểu Náp Bunong: “Tĭng gâp mĭn, gay ma mom ndăm mât rbăy nău way ơm bâh rnoi nơm, năp lor lah an geh joi gĭt, tâm nđur n’hanh kơt nti. ăp ntŭk kan đoàn mom ndăm an geh ƀư ndrel rơh tâm mâp ăp pơh mô lah ăp khay, nta nău dơh nơih gay ma mom ndăm geh gĭt đah nău mprơ, nkoch ndrong, nău nchih, chĭng gong n’hanh ăp ntil ndơ uh goh way ơm. Rnôk nău ueh êng geh mât rbăy bâh rơh aơ tât rơh êng mơ dơi rêh mbro tâm nău rêh mhe aƀaơ?

- OLah du hê nuĭh mom, mhâm geh mơh ntil ndơ nkoch gay ma trĕ lam, mpơl naư ueh eneg rnoi nơm mêh?

Ca sĩ Điểu Náp Bunong: “Kăl e nơh, ŭch bu gĭt tât rnoi nơm rĭ an geh ăp lễ hội rĭ mơ bu gĭt tât he, geh tât râng geh saơ. Hôm aƀaơ, kanŭng geh rơh tâm mâp, geh nău way ueh êng lah he ndơ ta mạng xã hội lah ăp nuĭh ta ăp ntŭk gĭt da dê nĕ lah nău tâm mâp, nău way bâh Bunong. Ŭch bu gĭt tât nău ueh êng rnoi Bunong rĭ he nơm lah nuih mbơh trêng ăp nău ueh, ăp nău êng, ntoh lư bâh rnoi nơm ta mạng xã hội gay ma ăp nuĭh gĭt tât n’hanh ryơk n’hao.

- Di rơh năm mhe Bính Ngọ 2026, Ca sỹ Điểu náp Bunong mơh nău ŭch njoăl đah ăp nuĭh djăt radio nău ngơi VN mêh?

Ca sĩ Điểu Náp Bunong: “Năm tay hôm mbra ƀư tay nău mprơ, hăn mprơ ăp ntŭk ngăn khlay lah gâp mbra dŏng mạng xã hội gay ma mbơh âk lơhn mpeh văn hoá Bunong bâh Kênh YouTube Điểu Nap Bunong Official, gay ma ăp ntŭk guiĭt nău ueh ntŭk ntô ndơ sa ntoh lư bâh Bunong he.

Năm mhe gâp njoăl nău rhơn tât u che kônh wa băl mom du năm mhe ngăch dăng geh nău dơi, băl mom gơih nti djăt nău bu ranh, mô chuêl nău ueh êng bu nong he.

- Lah ueh Ca sĩ Điểu Náp Bunong lĕ nkoch mpeh nău rŏng đah văn hoá Bunong. Dăn njoăl tât nô du năm mhe ngăch dăng lăng ngăch, hơm răm đăp mpăn, geh ueh ta trong kan nghệ thuậtt n’hanh ntop ndơ̆ nău ueh Bubong, nău ueh tây Nguyên tât âk ƀon lan.