Ntơm bah ơm ôi, âk mpưm kônh wa rgum tâm Ngih rgum rƀŭn nsum mpôl ƀon Jarah, xã Nâm Nung, n’gor Lâm Đồng gay râng ƀư nau vay Tăm blang mprang ƀon. Tâm nau khuch n’gôr bah chĭng gong, nah ao tanh mhe, nŭih ƀon lan ntơm tur chĭng “Vơt năch”. Du hê bu ndăm rnoi Bunong nơm mbơh:

‘Gâp moh lah Y’Bằng, nar aơ gâp geh râng ndrel kônh wa ƀon Jarah ƀư nau vay Tăm blang mprang ƀon tâm bon Jarah gay geh nau mih lăng prăng ueh, gay đăp mpăn mô geh srê ji, ndrel nŭih ƀon lan rêh đăp mpăn ndrel ŭch ân săk play lau mbôn gay kônh wa geh nau rhơn răm, kônh wa ta aơ mro mât nau yau bah nơm tă bah rơh aơ tât rơh êng, nau vay ơm ueh aơ mô dơi nchlơi ôh”.

Ntơm bah năp ngih rƀŭn ƀon Jarah lah n’gâng njuh bah rnoi Bunong geh nkra ueh ngăn. Ta aơ, ăp ndơ geh leo ôp brah yang geh kônh wa nchrăp ueh. Ndơ nchrăp geh 3 yăng ndrănh, du mlâm bôk sur, jrêng, sah ônh mli, du nkôn brai nglang gay mbŭk dak mham djar, ndrel rup kơt rpu, ndrôk, be, djar, ăp ntil ndơ tuch tă, ndrel ăp ndơ sa bah rnoi Bunong đŏng. Ndrel ndơ mô dơi mô geh ê lah tơm Blang gay ma nking ân ƀon. Tâm nau rnôk ôp brah ri bu răch:

“Ơi brah yôk, brah dak, brah bri...nar aơ ta aơ ƀon lan dăn ăp brah yang tât râng uănh nau ôp brah nking n’gang ân ƀon lan, tăm tơm blang, dăn ân ăp brah yang sâm mât chăm ân tơm jêng ueh. Phung hên kŏ dăn brah yang mât chăm nau rêh ƀon lan ân ueh lăng, mô geh nau ji kuet. Ta aơ, phung hên ƀư nau ôp brah kuăl ăp brah yang tât ta aơ ndrel ngêt ndrănh sa sur đah ƀon lan’.

Jêh lôch răch brah, bu ranh ntơm kuăn tong, ntơm ân geh nau ngêt sa tâm nau ƀư Tăm blang mprang ƀon. Rmôt tur chĭng ndrel njroh nthoi jêng jŭm dar nê gay tu, gay njroh âk nau ueh.

Nŭih răch brah rnôk aơ lah wa H’Dêm, nŭih blau ngăn tâm ƀon Jarah, xã Nâm Nung. Wa hôm blau nau ƀư Tăm blang mprang ƀon geh ƀư jêh rnôk lôch kăch rek. Nau ôp brah ri geh ƀư 3 nau tơm, bôk năp lah ôp brah huêng u che yau ye, jêh ri tât ôp brah boh ba, lih n’hâm soan, ndrel dăch dŭt lah nau ƀư ngêt sa ndrel nau ƀư tăm blang mprang ƀon.

Lôch ôp, bu ranh ƀư kât brai tâm ty ân kônh wa geh săk dăng lăng ngăch, ân ƀon lan tâm ƀon ndrel bu năch tât râng. Lôch tăm tơm blang bah năp mpông ƀon, ntŭk rgum rƀŭn nsum bah ƀon Jarah, wa H’Đêm nkoch:

 Tâm nau ƀư ôp brah tăm blang mprang ƀon, gâp ntoh măt ân kônh wa ƀon lan dăn ân brah yang mprang du lơi ăp nau tih bah ƀon lan ndrel dăn brah yang mât ân ƀon lan đăp mpăn”.

Bu ranh Y Xuyên, ƀon Jarah, mbơh: aơ lah nau vay tă bah jŏ bah rnoi Bunong, ntoh nau rhơn jêh du yan kăch rek geh dơi, ƀon lan săk dăng lăng ngăch, ndrle ŭch năm mhe geh âk nau ueh lơn. Bu ranh Y Xuyên nkoch: Nau ƀư ôp brah tăm blang mprang ƀon mhe geh N’gâng kan Văn hoá-Thể thao ndrel pâl n’aih kơp dơn lah ndơ ơm yau bah neh dak:

‘Nau khlay ngăn bah “tăm blang mprang ƀon” lah gay mât, mô ân nŭih mhik nsŭk đă, lơh  rai nau ueh lăng đăp mpăn tâm ƀon, ndrel ŭch kon sau mô geh nau ji kuet, kônh wa săk dăng lăng ngăch; ƀư mir jan ma mô geh mpa bri lơh ndrel sa. Aơ

Nau vay Tăm blang mprang ƀon bah rnoi Bunong tâm ƀon Căn cứ cách mạng Nâm Nung, n’gor Lâm Đồng hŏ lôch tâm nau khuh n’gor bah chĭng gong ndrel nau rhơn bah nsum mpôl ƀon lan. Ntơm bah nau ơm yau khlay tât nau khuch n’gor bah nar tâm mâp, ăp dĭng lĕ nê mpŏng tât du năm mhe geh mih lăng prăng ueh, săk play lay mbôn, ƀon lan đăp mpăn, dăng săk jăn, tâm rnglăp ndrel lŏ nsum ty mât, ƀư ueh nau ơm yau khlay bah che, mbŏ nơm./.