Nghệ nhân Y Kŭt Niê ntơm tĭng đah nău mprơ n’hanh chĭng gông way ơm bah năm 18 năm. Wa nkoch: Kăl e mô geh samƀŭt sam tra mô lah kơt jrô nti kơt aƀaơ, he knŭng gĭt tĭng jâng ăp bu ranh ƀon, nghệ nhân ranh, djăt khân pơng mprơ, uănh khân pơng tŭr chĭng jêh nĕ nti mbrơi mbrơi du đêt.

Gâp mprơ nău mprơ n’hanh tŭr chĭng gông bah rnôk 18 năm. Bah năp nĕ, gâp way djăt ăp nghệ nhân hăn mprơ tŭr chĭng jêh nĕ kơt nti. Mbrơi mbrơi, gâp geh nău blău ơm n’hanh ntơm ntĭm tay an kon sau tâm ƀon. Năm 2007, gâp geh rơh ntĭm ăp oh ta Ngih samƀŭt Dân tộc nội trú. Jêh 3 khay nti, ăp mon lĕ blău tŭr chĭng. Jêh nĕ, gâp râng Rmôt njroh mprơ way ơm ta Đồng Mô, Sơn Tây, Hà Nội n’hanh tĭng đah rmôt tât năm 2019.

Tĭng năm khay, ăp er nău mprơ Êđê, nteh chĭng gông n’gang nteh rngot rngăt bah boăt lĕ jêng du ntil ndơ mô dơi mô geh tâm nău rêh bah wa Y Kŭt Niê. Mô knŭng blău gŏ tŭr, wa hôm ƀư êng mboăt n’hôm. Nău khlay lơn lah nghệ nhân Y Kŭt Niê mô mât nău khlay nĕ an êng nơm. Đah wa, nău ntĭm tay an rơh druh ndăm lah lĕ nău kan bah nuĭh hăn lor bah năp.

Gay ƀư geh du mboăt, way roh du n’gul khay. Lah mô ru âk nău kan êng ri geh rnôk bơi du khay mư jêh. Tĭng gâp, ăp nuih hăn bah năp ân geh nău blău trêng ntĭm an rơh mon sau, gay mô an roh nău uĕh bah rnoi mpôl he. Hôm ăp băl mom ri an nchrăp trong ndơn tay, tâm nđŭr đah rơh hăn lor bah năp gay nti, tâm ôp tâm rgop nău wât blău uĕh lơn.

Nghệ nhân Y Kŭt Niê dơi kônh wa ryơk yor ntrong leo lor n’hanh nuih n’hâm lĕ đah nău kan. Wa nsrôih mât n’hanh trêng mbơh văn hóa way ơm, bah nău ê nkra, uh mboăt, tŭr chĭng tât râng ăp ntrong leo nsum bah ƀon lan, ntĭm an druh ndăm tâm nkual. Nô Y Tía Niê, ta ƀon Ea Mlay, xă Mdrăk, n’gor Dak Lak, lah du hê nuĭh bah rmôt chĭng dơi Nghệ nhân Y Kŭt Niê ntĭm, nkoch an:

Nghệ nhân Y Kŭt Niê lah du hê dŭt leo trong tâm ƀon. Tâm rnôk nău way uĕh ơm bah rnoi mpôl đêt he dôl mbrơi mbrơi roh, wa hôm e nsrôih mât n’hanh trêng hvi, bah nău uh mboăt, tŭr chĭng an tât nsrôih râng ăp ntrong leo ăp nău ƀư bah ƀon lan. Lơn lah, ăp wa geh n’hâm soan ntĭm tay an rơh druh ndăm, mpŏng ăp oh wât, ŭch n’hanh nthoi văn hóa bah rnoi mpôl đêt he.

Đah nău nâp nâl, nuih n’hâm n’hanh nău rŏng âk đah văn hóa rnoi mpôl đêt, nghệ nhân lĕ n’hanh dôl rgop khlay tâm nău mât rƀay, mât uĕh ăp nău khlay văn hóa way ơm Êđê. Ăp nău jâk nĕ mô knŭng mât tay chĭng, nău mprơ an nar aơ, ma hôm mât rong nău uĕh an ăp rơh bah kơi./.