Tâm nar mprang êr n’hanh lhêt lhơt sial tâm ăp nar bôk năm 2026, rnôk yôk bri Tây Nguyên nsoh bah lơ săk he kho ao mhe ntơr uĕh, kônh wa nuĭh Xơ Đăng ta buôn H’ring (xã Cư M’gar, Đắk Lắk) hôm khuh n’gôr pơk nar ngêt sa têh. Aơ lah rnôk ƀư ôp brah nsĭt ba n’hao rhe – ntung njŏ huêng brah tât đah kon nuĭh – ntơm pơk ngăn, ndjôt nkre ăp rup uĕh văn hóa way ơm n’hanh rsang bok.

Gay nchrăp an nar têh khlay dja, lĕ ma buôn H’Ring kơt lah mô bĭch. Ntơm bah ndrâm dak bôk ƀon hăn tât tĭng năk ŭnh jay roh mprĭp grep. Tơm njuh prêh dơi rdâk nklang jâng gung tâm ban kơt du nău kuăl jă huêng brah tât râng ngêt sa. Ta dông puăch ndrănh ôp brah, ăp ndơ dŭt kah khlay sŏk luh bah bri dơi pla kalơ: Ntơm bah mƀêk prung, ndrănh yăng kah hâr, tât ka dak me, puăch dĭng ngâr n’hanh lĕ ma puăch đe. Nê mô dơn lah ndơ sa, ma lah suan rhal; lah  rgum mpêt bah me neh lôch du năm kan mô gŭ rlu. Nkoch mpeh nău khlay bah nar rgum ngêt sa, yuh H’Luyết, buôn H’ring, xã Cư M’gar rhơn nkoch:

“Ndơ tuch tăm năm aơ jŭr geh, rnoh khlay hôm hao tay đŏng jêng kônh wa tâm ƀon lĕ dĭng nuĭh rhơn nđơr da dê. Mông nar nsĭt ba n’hao rhe ƀư rhơn mƀak, khuh n’gôr. Ma nar ƀư ôp brah, kon său hôm dơi djăt u che, me bơ̆ nkoch tay ăp nău way ơm bah u che yău ye, ntơm bah nê dêh rŏng tay n’hanh uănh khlay nău way ơm uĕh lăng bah rnoi nuĭh he.”

Mô dơn lah rnôk gay nkah gĭt sĭt n’glĭng, Nsĭt ba n’hao rhe hôm lah ntŭk êt lhăt nău tâm rnglăp, ntŭk ăp nău tă ơm gĭt kan tuch tăm dơi trêng nti tay rlău ăp rơh. Nkoch mpeh tâng jru văn hóa bah nău way dja, wa Joang Chả, Bí thư chi bộ buôn H’ring an gĭt:

“Nuĭh Xơ Đăng geh lễ hội nsĭt ba n’hao rhe dơi ƀư ăp năm. Lôch du năm pah kan jan sa jâk r’ah, rnôk tât khay kăch reh, kônh wa mbra sŏk ba mhe ndjôt peh n’hanh ƀư nar rhơn sa ba mhe. Lễ hội geh nkô̆ hôr dăn mih lăng prăng uĕh, dăn brah neh, brah trôk nar jăt kơl an năm mhe mih lăng prăng uĕh, nău rêh ngăch lăng, wăng sa geh hao lơn.”

Ndrel đah kônh wa ƀon tơm ta ntŭk, nău way nsĭt ba n’hao rhe năm aơ ta buôn H’Ring wăch rgum dŭt âk mpưm năch. Tâm nău nteh chĭng gong n’gloh lam bri neh têh hvi, yuh Lê Thị Long, năch tât bah nkual ƀon têh Hồ Chí Minh nkoch nău rhơn rnôk aơ lah tâl 2 yuh râng ƀư ôp brah dja.

“Tâl 2 gâp râng lễ hội. Ƀư nsĭt ba n’hao rhe saơ săk tơm bah ƀon lan Xơ Đăng ta aơ n’hanh kônh wa ta aơ dŭt dăch dêh, răm mƀak. Rlău ma lễ hội chĭng gong gâp hôm dơi rlong sa ăp ndơ bah ƀon lan đŏng. Gâp dăn kônh wa ta aơ năm mhe ngăch lăng dăng soih, rhơn mƀak, ndơ tuch tăm jŭr geh”

Ƀư ôp brah nsĭt ba n’hao rhe năm 2026 ta buôn H’ring geh nkô̆ khlay đah n’gâng kan ta ntŭk n’hanh ƀon lan. Aơ lah nău kan văn hóa têh lor bôk năp dơi ƀư rnôk trong nchrăp n’glăp nsum, dăp rgum ăp tŏng n’gâng kan gưl xã. Ta nău rhơn nsum bah ƀon lan, wa Nguyễn Tuấn Anh, Groi kruanh UBND xã Cư M’gar an gĭt:

“Lôch n’glăp nsum, n’gâng kan ta ntŭk ndơ̆ nkô̆ nău mât ndray ntik n’hao rnoh khlay văn hóa ăp rnoi nuĭh lah nău dŭt khlay. Dŭt rhơn lah rnôk lĕ rngôch nkô̆ tâm ban kơt trong leo ƀư lễ hội tă bah nuĭh ƀon lan nơm tâm ƀon ƀư. N’gâng kan n’hanh gưl ủy dơn ntop kơl du gâl prăk dŏng ƀư n’hanh du đêt nkô̆ khlay dơm, hôm ƀa ƀă kônh wa nơm ƀư êng. Ma trong lễ hội, nuih n’hâm tâm rnglăp, krêp dêh tâm ƀon lan Xơ Đăng tâm ban kơt đah ăp rnoi nuĭh gŭ rêh ta ƀon kiău ma dơi n’hao dăng đŏng.”

Ƀư ôp brah nsĭt ba n’hao rhe mpôch dŭt tâm nău rhơn mƀak, jêng rse ntêng lêng krêp dêh ƀon lan tâm nar bôk năm mhe. Ăp ngan ndrănh kah hâr n’hanh ndăch rvăch n’gôr gră tâm ban kơt nău an năl saơ suan rêh dăng bah săk tơm Xơ Đăng ta dor yôk Dak Lak. Ntĭnh sĭt buôn H’ring, nău nkah mpeh du năm khay hơm răm n’hanh nău tâm rŏng nuĭh nha hôm n’gloh mbro tâm nău nteh chĭng gong nklang bri dak têh hvi./.